«Rasijskija mu-mu vyhladajuć blednavata». Što pra ataki Izraila na Iran pišuć rasijskija vajenkary

Siła izrailskaha ŭdaru i paralič iranskaj armii dy SPA stali šokam dla rasijskich vajenkaraŭ.

«Izrail praciahvaje nanosić udary pa Iranie: Tehieran pakul vyhladaje jak chłopčyk dla bićcia…» — napisaŭ u abied 13 červienia Juryj Padalaka, jaki tradycyjna adlustroŭvaje aficyjnuju pazicyju i vahajecca tolki razam ź linijaj partyi.

«Kali koratka pra toje, što adbyvajecca siońnia na Blizkim Uschodzie (prynamsi, pa stanie na ciapierašni momant) — adbyvajecca prosta źbićcio Irana, — praciahvaje Padalaka.

— Miarkujučy pa ŭsim, ni ataki Izraila na kiraŭnictva «Chiezbały» ŭ Livanie, ni padzieńnie režymu Asada ŭ Siryi ŭ Tehieranie tak nikoha ničomu i nie navučyli.

A tamu Iran zaraz vyhladaje absalutna biazzuba suprać udaraŭ izrailcian, jakija nie spyniajucca da hetaha času.

Mienavita tamu Izrail pavyšaje staŭki i hulaje ŭžo na maksimalny vynik — źviaržeńnie režymu ajatałaŭ. Pra što adkryta ŭ svaim videazvarocie skazaŭ premjer-ministr krainy Nietańjachu. Pryčym šancy ŭ jaho dla hetaha jak nikoli vysokija. Ułady ŭ Tehieranie pakazali svaju słabaść, jakaja stała vynikam zakaścianiełaści sistemy (jakaja nie choča źmianiacca). Za što i raspłačvajecca (uśled za Siryjaj)», — žurycca Padalaka.

Treba adznačyć, što Iran za apošnija hady staŭ najbližejšym sajuźnikam Rasii — razam z Paŭnočnaj Karejaj. Heta iranskaj vytvorčaści «šachiedy», pierajmienavanyja ŭ «Hierani», štonočy bjuć pa ŭkrainskich haradach, ich achviarami stali ŭžo sotni ludziej.

Aŭtar kanała pra avijacyju Fighterbomber napisaŭ svoj post raniej za Padalaku i, moža, tamu prajaŭlaje bolš aptymizmu. Jon źviartaje ŭvahu na toje, što Izrail ździejśniŭ udar pa Iranie, niahledziačy na toje, što pamiž dźviuma krainami — dźvie inšyja dziaržavy i 1500 kiłamietraŭ adlehłaści.

Pa słovach aŭtara, «naohuł nie zakłapacili Izrail niečyja mierkavańni, zajavy, słovy padtrymki iranskamu narodu, abvinavačańni ŭ ahresii, mahčymyja sankcyi i hetak dalej» — ź jaŭnym namiokam na toje, što i Rasii treba bambić svaich praciŭnikaŭ, nie zvažajučy na suśvietnuju hramadskuju dumku.

Druhi momant, adznačaje błohier-avijatar, heta toje, što pra mahčymy napad «viedaŭ apošni sabaka ŭ dvary». Vychodzić, i Iran taksama viedaŭ pra padrychtoŭku ataki i pryniaŭ niejkija miery. Adnak albo ich było niedastatkova, albo Izrail paśpiachova ich abyšoŭ.

Pavialičyć

Biez ZŠA nie abyšłosia

«Rybaŕ», u svaju čarhu, źviartaje ŭvahu na toje, što «irancy abvinavacili ZŠA ŭ saŭdziele, i pa zajavach Trampa možna mierkavać, što jany niedalokija ad iściny».

I robić vyvad: «Takim čynam izrailskaje kiraŭnictva dabiłasia taho, čaho tak chacieła — sadziejničańnia Biełaha doma va ŭdary pa Iranie, i ciapier usia ŭvaha prykavanaja da taho, jak adkaža Iran».

«Hetaj vajny nie było b, kali b Tramp nie byŭ prezidentam», — žartuje błohier Ramanaŭ, pierakručvajučy mantru prezidenta Štataŭ.

Pra toje, što napad Izraila na Iran nie adbyŭsia «biez dazvołu, uzhadnieńnia i pramoj padtrymki ZŠA», pieradaŭ z kałonii i Ihar Strałkoŭ.

Pa jaho mierkavańni, «my majem pačatak vialikaj blizkaŭschodniaj vajny, u jakoj u Irana pazicyi vielmi słabieńkija».

Jak tłumačyć Strałkoŭ, Izrail padrychtavaŭsia da napadu, paśladoŭna asłablajučy svaich praciŭnikaŭ. Spačatku byŭ «prybrany» prezident Irana, jaki padtrymlivaŭ Siryju i Asada. Jaho pierajemnik vyvieŭ iranskija vojski ź Siryi, što značna asłabiła siryjski ŭrad.

U vyniku za dva tydni Siryja była raźbitaja: bolšaja častka jaje terytoryi pierajšła pad kantrol Turcyi, a stratehična važnyja Hałanskija vyšyni — da Izraila. Ciapier Iran nie maje mahčymaści napaści na Izrail pa sušy, nie sutyknuŭšysia z Turcyjaj, armija jakoj vielmi mocnaja, i tamu Iranu było b ciažka ź joj vajavać.

«Ciapier Izrail, naturalna, vykarystoŭvajučy svaju značnuju pieravahu ŭ rakietnym i avijacyjnym uzbrajeńni, nanosić udary pa Iranie, nie raźličvajučy na ​​surjozny i pa-sapraŭdnamu balučy adkaz, — piša Strałkoŭ i papiaredžvaje: — Kali Iran niejkija dziejańni raspačnie, mahčyma, da spravy padklučacca ZŠA, jakija stajać za śpinaj Izraila i skarystajucca mahčymaściu razhramić Iran».

Panikavać? Nie panikavać?

Fighterbomber zaklikaje dumać, što ciapier nielha dakładna acanić vyniki napadu Izraila. Na jaho pohlad, nie moža iści havorki pra niejkija krytyčnyja paškodžańni jadziernaj infrastruktury Irana. Imavierna, Izrail prosta adsunuŭ na niavyznačany termin datu, kali Iran zmoža mieć dastatkovuju kolkaść rakiet ź jadziernymi bojezaradami. Ale na kolki mienavita — na niekalki dzion ci hadoŭ — nichto nie viedaje.

U adroźnieńnie ad Strałkova, jaki pradrakaje vajnu, Fighterbomber mienš kateharyčny. Jon miarkuje, što Iran u najbližejšy čas naniasie tradycyjny ŭdar u adkaz. Ale kali jon nie vykarystaje jadziernuju zbroju abo niejkija nieviadomyja dahetul srodki masavaha paražeńnia, to ŭsio moža spynicca na hetym etapie.

Vajenkar adznačaje: Izrail paviedamiŭ, što vykarystaŭ 330 rakiet i 100 bieśpiłotnikaŭ. Heta — zvyčajny maštab štodzionnych «kambinavanych udaraŭ», jaki Rasija rehularna nanosić pa Ukrainie. Takich udaraŭ užo byli sotni, ale vynik mocna adroźnivajecca. Ukrainskaja SPA zastajecca bajazdolnaj i efiektyŭnaj, tady jak iranskuju źniščyli pieršym ža ŭdaram.

Pra toje, što «vajna pamiž Iranam i Izrailem źviadziecca da abmienaŭ rakietna-drona-avijacyjnymi ŭdarami. (…) Plus buduć dziejańni jemienskich chusitaŭ na sudnachodnych šlachach», piša Maksim Kałašnikaŭ.

Jak jon tłumačyć, mahčymaści abodvuch bakoŭ abmiežavanyja: u Irana niama jadziernaj zbroi. A izrailskaja avijacyja moža dasiahać tolki paŭnočna-zachodniaj častki Irana. Radyus bajavoha dziejańnia F-35 — krychu bolšy za 1000 kiłamietraŭ, u F-16 — ad siły paŭtary tysiačy kiłamietraŭ.

Heta značyć, adznačaje vajenkar, «pracavać im daviadziecca kryłatymi rakietami». Tamu škoda iranskaj jadziernaj prahramie budzie abmiežavanaj: «hłybokija padziemnyja schoviščy jaŭrejam urazić niama čym».

Što tyčycca ZŠA, to, miarkuje Kałašnikaŭ, jany «ŭ vajnu nie palezuć».

Nastupstvy dla Rasii

Strałkoŭ źviartaje ŭvahu na mahčymyja nastupstvy hetaha kanfliktu dla Rasii.

Pa-pieršaje, heta strata «paŭdniovaha kalidora». Praź Iran išli pastaŭki rasijskaj nafty i syraviny ŭ Indyju i inšyja krainy, i hety maršrut mieŭ stratehičnaje značeńnie. Ciapier siarod tranzitnych kirunkaŭ zastajecca tolki Kitaj na ŭschodzie.

Pa-druhoje, Iran, jaki ciapier pad udaram, stračvaje pramysłovyja abjekty i ŭžo nie zmoža pastaŭlać Rasii zbroju i bojeprypasy, jak raniej. Heta, jak ličyć vajenkar, akaža svoj upłyŭ na chod vajennych dziejańniaŭ va Ukrainie.

Kałašnikaŭ u svaju čarhu prahnazuje, što vajna pamiž Izrailem i Iranam padymie suśvietnyja ceny na naftu.

Adnak vajenkar ličyć nie heta hałoŭnym: «Raście pahroza ekanamičnaha abvału — možam upaści razam z Ukrainaj».

Što rabić Iranu

Padalaka raić: «Tehieranu treba iści na niestandartnyja dziejańni, jak tyja ž ich proksi chusity zrabili ŭ Jemienie, błakavaŭšy pracu Bab-el-Mandebskaha praliva.

Heta značyć, im treba błakavać Armuzski praliŭ i šantažavać usich tych, chto ciapier pacirajučy ruki hladzić za źbićciom Irana tym, što jon abrynie suśvietny handal naftaj».

Vajenkar upeŭnieny: «Hetuju movu jany zrazumiejuć. Nijakich navat 10-20 rakiet pa Izraili, jakija prarvucca skroź SPA CACHAŁa, takoha vyniku nie daduć».

Nastupstvy dla Ukrainy

Fighterbomber ličyć, što ŭdar Izraila pa Iranie ŭskosna «raźviančaŭ navinu ab pieradačy «Patryjotaŭ» Izrailem — Ukrainie». Pa jaho słovach, «treba być idyjotam pačynać vajnu z praciŭnikam za 1500 kiłamietraŭ, addajučy asnoŭny srodak abarony niejkim ch**łam. A jaŭrei dakładna nie idyjoty».

Kałašnikaŭ, u svaju čarhu, źviartaje ŭvahu na zładžanyja dziejańni Izraila, na fonie jakich rasijskija «mu-mu vyhladajuć blednavata». 

U svaju čarhu vajenkar Romanov kpliva pierapoščvaje zajavu pres-sakratara Pucina Dźmitryja Piaskova z aficyjnymi słovami «zakłapočanaści i asudžeńnia rezkaj eskałacyi napružanaści» pamiž Izrailem i Iranam.

Na pohlad Romanov, kali kanflikt pieratvarycca ŭ praciahłuju irana-izrailskuju vajnu, heta niepasredna paŭpłyvaje i na Ukrainu.

• 1
• 0
• 27
• 1
• 0
• 2
• 0
• 0