«Kala 70% — biełarusy». Jak Playtika skaraciła varšaŭski ofis za adziny dzień

U izrailskaj hiejmdev-kampanii Playtika prajšła novaja chvala skaračeńniaŭ — na hety raz u polskim ofisie.

Pavodle źviestak mobilegamer.biz, sioleta było zvolniena da 160 čałaviek z kamand, što raspracoŭvali Best Fiends i Redecor.

Pišuć, što zvalnieńni adbylisia i ŭ izrailskim ofisie kampanii, ale hałoŭnym čynam jany zakranuli Varšavu, kudy kampanija aktyŭna rełakavała supracoŭnikaŭ ź Biełarusi.

Žurnalisty parazmaŭlali z byłymi i ciapierašnimi supracoŭnikami polskaj Playtika. Darečy, jany nastojvajuć, što supracoŭnikaŭ u Biełarusi nie zastałosia ni ŭ jakim vyhladzie — pracavać adtul zabaroniena.

Kaho i dzie zvolnili

Ich słovy paćviardžajuć apublikavanuju raniej infarmacyju, što asnoŭnaja kolkaść zvolnienych — u kamandzie Best Fiends, tam pakinuli tolki piersanał, jaki padtrymlivaje hulniu. Kamanda Redecor pieršapačatkova była nievialikaj — «30—40 čałaviek», pavodle słoŭ adnaho z supracoŭnikaŭ. U abiedźviuch kamand, nibyta, byli najhoršyja pakazčyki vyručki ŭ kampanii.

Akramia taho, pa infarmacyi čytačoŭ, zvalnieńni adbylisia i ŭ inšych kamandach, naprykład, u Solitaire Grand Harvest, Bingo, Shared department. Jak raspaviadajuć supracoŭniki, skaracili amal usich, chto byŭ pracaŭładkavany praz aŭtstaf-kampaniju Dvash. To bok ahulnaja kolkaść zvolnienych moža pieravyšać 160 čałaviek (ale ciažka skazać, z ulikam izrailskich supracoŭnikaŭ ci biez).

Nakolki raptoŭna

Na prośbu acanić pracent biełarusaŭ u skaročanych kamandach, čytačy nazyvali i 70%, i 80% — ahulna kažučy, bolšaść. Što tyčycca čakanaści padziei, mierkavańni razyšlisia: adny eks-supracoŭniki pišuć, što zvalnieńnie było absalutna niečakanym i vyklikała šok. Inšyja — što pra jaho možna było zdahadvacca pa finansavych pakazčykach praduktaŭ.

— Pra skaračeńni było zrazumieła zahadzia, — vykazvaje mierkavańnie eks-supracoŭnik. — Pa-pieršaje, pieranieśli terminy pierahladu zarobkaŭ. Pa-druhoje, paśla spravazdačy za pieršy kvartał stała jasna, što, choć vyručka vyrasła, čysty prybytak źniziŭsia praz pavieličeńnie vydatkaŭ na markietynh i R&D.

Padobnymi nazirańniami dzielicca inšy supracoŭnik:

— Niahledziačy na rost dachodaŭ da rekordnych značeńniaŭ dziakujučy niadaŭniamu M&A (merger & acquisition) Dominos Dice i SGH Disney, net revenue źniziŭsia na 42% u paraŭnańni z Q1 minułaha hoda.

Apošni miesiac było šmat razmovaŭ pra skaračeńni, bo stała mienš vakansij i pastupova skaračali «pluški».

Tak, raniej futboł/valejboł byŭ dva razy (mahčyma, na tydzień — devby), potym zrabili adzin. Da taho ž bolšaść zapłanavanych kamandzirovak skasavali, pakidajučy tolki samyja nieabchodnyja.

Jak prachodziła skaračeńnie

Pavodle acenak adnych, małankava. Inšyja adznačajuć, što raniej byvała i horš.

— Z supracoŭnikami, jakich źbiralisia zvalniać, na pačatku dnia praviali razmovy, i ŭžo paśla byŭ ahulny mitynh na ŭsiu kampaniju, dzie abviaścili pra skaračeńni.

Heta było nie tak stresava: u papiarednich iteracyjach spačatku byŭ mitynh, a potym błakavali kampjutary.

Ci buduć kampiensacyi

Bolšaść supracoŭnikaŭ kažuć, što tak — prynamsi, dla tych, chto pracuje ŭ Playtika niepasredna. Pamier kampiensacyi zaležyć ad stažu pracy, plus bonus ad kampanii, plus kampiensacyja za niavykarystany adpačynak. Tyja, chto pracuje praz kampaniju Dvash, u kampiensacyi nie ŭpeŭnieny.

Adnak i tyja, i druhija miarkujuć, što kampanija budzie dapamahać z pošukam novaj pracy. Mahčyma, u niekatorych atrymajecca adkłaści aficyjnaje zvalnieńnie na paru miesiacaŭ — dla padaŭžeńnia lehalnaha statusu ŭ Polščy.

Što dumajuć i adčuvajuć zvolnienyja (i tyja, kaho nie zakranuła)

— Raptoŭnaje skaračeńnie stała šokam dla ŭsich. Choć pra samu pracu ŭ Playtika nie mahu skazać ničoha drennaha: cudoŭny kalektyŭ, vydatnyja ŭmovy, dobry ofis.

— Šmat maich znajomych užo majuć zaprašeńni na sumoŭi. Heta jašče ničoha nie značyć, ale rynak jość, strachu [nie znajści pracu] niama.

— Čakańni ad rynku pracy, jak i paŭsiul u IT, nie samyja lepšyja.

— Što ciapier? Pošuk novaha pracoŭnaha miesca i mahčymy adpačynak.

— Zaraz na rynku pracy, u pryncypie, pavinien być «pir» dla najmu — skaračeńni prajšli liniejna, biez uliku dośviedu i ekśpiertyzy. Tym, chto zastaŭsia, naŭrad ci varta čakać pavyšeńnia zarobku — biudžet, chutčej za ŭsio, pojdzie na kampiensacyi zvolnienym. Pakolki kampanija nie raźvivaje ŭłasnyja prajekty, a kuplaje hatovyja rašeńni, čakać rostu pierśpiektyŭ nie davodzicca.

U vyniku zastajecca adkrytym pytańnie: kamu pašancavała bolš — tym, kaho skaracili, ci tym, chto zastaŭsia?

Kali buduć novyja zvalnieńni

— Dumaju, u najbližejšyja paŭhoda zvalnieńniaŭ nie budzie, — miarkuje adzin z supracoŭnikaŭ. — Bo hublajecca matyvacyja ludziej, i heta vialiki stres. Ludzi stresujuć — mienš praduktyŭnaści. Dy i nie buduć łajalnyja tyja supracoŭniki, u jakich niama ŭpeŭnienaści ŭ zaŭtrašnim dni. Dumaju, kampanija heta budzie adčuvać.

• 0
• 0
• 1
• 3
• 0
• 7
• 0
• 0