Minharvykankam pryniaŭ rašeńnie ŭvieści ŭ dačynieńni da bujnoha budaŭničaha pradpryjemstva «Minskprambud» časovaje źniešniaje kiravańnie. Inšyja padrabiaznaści nie raskryvajucca, bo dakumient maje hryf «dla słužbovaha karystańnia», piša ibmedia.by
Akramia taho, spynieny dopusk akcyj AAT «Minskprambud» da biržavych tarhoŭ na Biełaruskaj valutna-fondavaj biržy.
Zhodna z Zakonam «Ab pytańniach pieradačy pad časovaje źniešniaje kiravańnie, pryniatym u pačatku 2023 hoda, takoje rašeńnie prymajecca ŭ dačynieńni da kamiercyjnych arhanizacyj, kali jość ryzyka spynieńnia ich dziejnaści ci straty dla pracoŭnych kalektyvaŭ, asabliva kali siarod ułaśnikaŭ majucca zamiežnyja asoby.
«Minskprambud» — pryvatnaje pradpryjemstva, u składzie akcyjanieraŭ 6 jurydyčnych i 1030 fizičnych asob, mnohija ź jakich — ciapierašnija abo byłyja rabotniki kampanii. Jość i zamiežnyja akcyjaniery.
Pavodle infarmacyi ibMedia.by, rašeńnie ab uviadzieńni źniešniaha kiravańnia pryniali na fonie ŭnutranaha kanfliktu ŭ kampanii. Na 26 maja 2025 hoda byŭ zapłanavany pazačarhovy ahulny schod akcyjanieraŭ, dzie płanavałasia razhledzieć pytańnie ab daterminovym spynieńni paŭnamoctvaŭ hienieralnaha dyrektara Aleha Daškieviča. Na jaho miesca prapanoŭvaŭsia Andrej Łaskaviec. Adnak schod u vyniku nie adbyŭsia.
U skład chołdynhu «Minskprambud» uvachodziać 14 arhanizacyj: budaŭničyja hienpadradčyki, vytvorcy budaŭničych materyjałaŭ, prajektnyja i žyllova-kamunalnyja struktury, a taksama sanatoryj «Biarezina».
Pradpryjemstva stvarałasia dla budaŭnictva zavodaŭ-hihantaŭ (MTZ, MAZ, «Haryzont», «Atłant» i inšyja), ale ź ciaham času profil dziejnaści pašyryŭsia. «Minskprambud» budavaŭ takija abjekty, jak aŭtavakzał «Centralny», «Minsk-Arena», Pałac Niezaležnaści, HC «Stalica» i inšyja. Da 2021 hoda firma zdała bolš za 5000 kvater ahulnaj płoščaj 350 tysiač m². Kampanija taksama vykonvaje budaŭničyja zakazy ŭ Rasii.
U 2024 hodzie vyručka kampanii vyrasła da 284,5 miljona rubloŭ, ale čysty prybytak źniziŭsia da 3,9 miljona.
Kamientary