Hałoŭnaja zbroja — videapłatformy i sacsietki. Stała viadoma, jak łukašenkaŭskaja prapahanda sprabuje ŭpłyvać na vyniki polskich vybaraŭ

Pavodle ekśpiertaŭ, centralnuju rolu ŭ infarmacyjnaj kampanii adyhryvaje «Radyjo Biełaruś», jakoje naležyć Biełteleradyjokampanii.

3 červienia 2022 hoda ES uvioŭ sankcyi suprać BTRK, pryznaŭšy jaje instrumientam dziaržaŭnaj prapahandy. Sankcyi ŭklučali zamarozku aktyvaŭ, zabaronu na techničnuju padtrymku i raspaŭsiud kantentu praź jeŭrapiejskija płatformy. Niahledziačy na heta, «Radyjo Biełaruś» praciahnuła i navat uzmacniła svaju prysutnaść u sacsietkach, asabliva siarod polskamoŭnaj aŭdytoryi.

Pakolki biełaruskija dziaržaŭnyja ŚMI zabłakavanyja ŭ Polščy, prapahandysty pačali aktyŭna vykarystoŭvać dastupnyja płatformy — tyktok, jutub, X i fejsbuk.

U žniŭni i vieraśni 2023 hoda, napiaredadni vybaraŭ u Polščy, radyjo zapuściła šerah prajektaŭ na polskaj movie: jutub-kanał, a zatym akaŭnty ŭ telehramie, tyktoku i X. U dakładzie adznačajecca, što «Radyjo Biełaruś» faktyčna viadzie šyrokuju ličbavuju kampaniju, nakiravanuju na ŭpłyŭ na prezidenckija vybary ŭ Polščy 2025 hoda. Łukašenkaŭskaja prapahanda imkniecca padarvać davier da demakratyi, pahłybić padzieł u hramadstvie i padtrymlivać abo dyskredytavać asobnych kandydataŭ.

Kiraŭnik mižnarodnaha viaščańnia Biełaruskaha radyjo Valeryj Raducki adkryta pryznaŭ, što hetyja prajekty źviazanyja z vybarami ŭ Polščy, jany majuć na mecie krytykavać polskuju ŭładu i pakazvać, jak u krainie manipulujuć hramadskaj dumkaj.

U kastryčniku 2023 hoda radyjo pačało tok-šou «Dumki pra Polšču», jakoje nibyta pavinna «adkryć vočy» palakam na situacyju ŭ ich krainie. Pavodle dakładu, radyjo sprabuje padarvać davier da polskich demakratyčnych instytutaŭ, śćviardžajučy, što vybary — padman, a ich vyniki mohuć być anulavanyja pad ciskam ES.

Na tyktok, pa stanie na 7 maja 2025 hoda, «Radyjo Biełaruś» vykłała 930 videa, jakija nabrali bolš za 9,2 miljona prahladaŭ. Bolšaść padpisčykaŭ — u Polščy. U sietcy X było bolš za 3 tysiačy publikacyj, što vyklikała značnuju aktyŭnaść polskich karystalnikaŭ. Jutub-kanał maje bolš za 2 000 videa z ahulnaj kolkaściu prahladaŭ 5,5 miljona. U fejsbuku taksama zrobleny sotni pastoŭ, hałoŭnym čynam na polskuju aŭdytoryju.

Usiaho na 7 maja 2025 hoda akaŭnty polskamoŭnaj redakcyi «Radyjo Biełaruś» vykłali bolš za 7 790 pastoŭ i videa, ahulnaja kolkaść prahladaŭ skłała 16 miljonaŭ, a ŭzajemadziejańniaŭ — nie mienš za 542 tysiačy. 

U śniežni 2024 hoda «Radyjo Biełaruś» aktyŭna prasoŭvała dvuch kandydataŭ — Macieja Maciaka i Aldonu Skirhieła (jakaja nie zmahła sabrać podpisy dla rehistracyi). U svaich materyjałach radyjo śćviardžała, što vybary ŭ Polščy nielehitymnyja, a sudy i vybarkam padparadkoŭvajucca źniešniamu ŭpłyvu.

U adnym z rolikaŭ Maciak zajaviŭ, što jaho rehistracyja sutyknułasia ź ciskam, a polskija ŚMI aśviatlajuć kampaniju pieraduziata. Jon vykazvaŭ simpatyi da Rasii, zaklikaŭ spynić padtrymku Ukrainy i havaryŭ pra mir z Maskvoj i Piekinam. Na vybarach hety kandydat atrymaŭ tolki 0,2% hałasoŭ.

Prapahanda taksama akcentuje temy mihracyi i vajny va Ukrainie, malujučy Zachad jak krynicu ŭsich prablem Polščy, a ZŠA i Francyju — jak tych, chto atrymlivaje z hetaha karyść. Adzin z hałoŭnych hierojaŭ antypolskaj kampanii — były polski sudździa Tomaš Šmit, jaki ŭciak u Biełaruś. Jon rehularna źjaŭlajecca ŭ videa «Radyjo Biełaruś» i raspaŭsiudžvaje zajavy, što, naprykład, Jeŭrasajuz praz polskaha premjera Donalda Tuska moža anulavać vyniki vybaraŭ, upłyvajučy na sudovuju sistemu.

Dakład adznačaje, što niahledziačy na sankcyi i jeŭrapiejskaje zakanadaŭstva (DSA), płatformy nie błakavali kantent «Radyjo Biełaruś» dla jeŭrapiejskich karystalnikaŭ. Tyktok častkova abmiežavaŭ dostup tolki za niekalki dzion da vybaraŭ.

• 0
• 0
• 0
• 3
• 1
• 0
• 2
• 0