Hrodzienski «Nioman» druhi raz zapar staŭ uładalnikam Kubka Biełarusi pa futbole
U vyrašalnym matčy hrodziency pieramahli z bujnym likam 3:0 žodzinski «Tarpieda-BiełAZ».
Usie try hały byli zabityja ŭ druhim tajmie. Spačatku na 56-j chvilinie adznačyŭsia Ivan Sadaŭničy, na 59-j pośpiech zamacavaŭ Siarhiej Pušniakoŭ, a na 80-j rysu padvioŭ Jahor Zubovič.
«Nioman» zavajavaŭ Kubak Biełarusi treci raz u historyi, prytym sioletni pośpiech — druhi zapar, bo ŭ minułym hodzie trafiej taksama dastaŭsia hrodziencam, jakija pieramahli ŭ finalnym matčy ź likam 2:0 «Isłač». A pieršy raz jany stali ŭładalnikami hetaha pryzu u dalokim 1993 hodzie, pieramohšy na minskim stadyjonie «Dynama» ź likam 2:1 rečycki «Viedryč».
Akramia ŭłasna hulni, sioletni finał zapomnicca tradycyjna ekscentryčnymi pavodzinami hałoŭnaha treniera «Niomana» 57-hadovaha Ihara Kavaleviča, jaki ŭznačalvaje kamandu ŭžo 9 hadoŭ. Jon to padbivaŭ nahoj ułasnuju kiepku, to paśla hulni ahalaŭ svoj zusim nie spartyŭny tors.
Darečy, Ihar Kavalevič — usiebiełaruski rekardsmien siarod hałoŭnych trenieraŭ, jakija zavajoŭvali sa svaimi kamandami Kubak Biełarusi. Ciapierašni trafiej dla jaho ŭžo čaćviorty, bo ŭ 2009 i 2012 hadach jamu ŭdałosia heta dvojčy zrabić ź inšaj kamandaj — navapołackim «Naftanam».
Pierad matčam adznačyŭsia taksama niadaŭna pryznačany staršynia Hrodzienskaha abłvykankama Juryj Karajeŭ, jaki nie tolki davaŭ nakazy «Niomanu», ale i sam prabivaŭ pienalci hałkipieru Maksimu Białovu. Jamu navat udałosia adzin raz zabić, choć vyhladaje, što bramnik prosta paddaŭsia.
Ciapier čytajuć
Ci mahčymy druhi Čarnobyl? I što ciapier robiać ludzi na toj AES? Navukoŭka adkazvaje na važnyja pytańni7
Kamientary