Tramp paabiacaŭ uvieści 100-pracentnyja pošliny na zamiežnaje kino i znoŭ adkryć turmu Alkatras
Prezident ZŠA ŭ niadzielu abviaściŭ praz dopisy ŭ sacsietcy, što maje namier vyratavać, na jaho dumku, pamirajučuju amierykanskuju kinaindustryju, uvioŭšy 100-pracentnyja pošliny na zamiežnyja kinastužki, a taksama znoŭ adkryć znakamituju turmu na vostravie Alkatras, jakaja ŭžo bolš za 60 hadoŭ słužyć zdymačnaj placoŭkaj i turystyčnaj słavutaściu, piša Bi-bi-si.
U poście pra kino ŭ svajoj sietcy Truth Social Donald Tramp zajaviŭ, što amierykanskaja kinaindustryja «pamiraje vielmi chutkaj śmierciu», tamu što inšyja krainy ŭsimi sposabami pieramańvajuć ludziej i studyi da siabie.
«Halivud i mnohija inšyja rajony ŭ ZŠA spustašajucca. Heta skaardynavanyja dziejańni inšych krain, i tamu heta — pahroza Nacyjanalnaj Biaśpiecy», — napisaŭ Tramp i abviaściŭ, što daručaje Ministerstvu handlu i Handlovamu pradstaŭnictvu ZŠA «nieadkładna pačać praces» uviadzieńnia 100-pracentnych myt na ŭsie zamiežnyja filmy.
Pavodle źviestak analitykaŭ, dola ZŠA ŭ vydatkach na vytvorčaść kino i kasavych zborach u śviecie sapraŭdy źnižajecca, ale Złučanyja Štaty ŭsio ž zastajucca biezumoŭnym lidaram na hetym rynku. Amierykanskaja kinaindustryja ŭžo ŭ peŭnaj stupieni paciarpieła ad impartnych myt Trampa: Kitaj u adkaz na ich vyrašyŭ, siarod inšaha, skaracić kvotu amierykanskich filmaŭ u svaim prakacie.
«Pamyłkovyja dziejańni ŭładaŭ ZŠA, što złoŭžyvajuć pošlinami ŭ dačynieńni da Kitaja, niepaźbiežna skaraciać cikavaść našaj unutranaj aŭdytoryi da amierykanskich filmaŭ, — zajaviła kitajskaja ŭstanova, jakaja kiruje kinateatralnym prakatam. — My budziem prytrymlivacca praviłaŭ rynku, pavažać vybar aŭdytoryi i ŭmierana skaračać kolkaść impartavanych amierykanskich filmaŭ».
Donald Tramp uvioŭ zabaronnyja myty na kitajski impart u pamiery 145%. Kitaj adkazaŭ 125-pracentnymi pošlinami na amierykanskija tavary.
Impart z usich inšych krain Donald Tramp da lipienia abkłaŭ 10-pracentnymi pošlinami, paśla čaho jany, pavodle aktualnaha stanu, pavinny rezka ŭzraści. U inšym poście Donald Tramp abviaściŭ, što vyrašyŭ znoŭ adkryć i pašyryć znakamituju turmu na vostravie Alkatras u buchcie San-Francyska. Jaje zakryli 62 hady tamu.
Pavodle zadumki Trampa, u hetaj turmie buduć utrymlivacca samyja niebiaśpiečnyja złačyncy, i jana stanie «simvałam zakona, paradku i pravasudździa».
Turma Alkatras pieršapačatkova była marskim fortam. Na pačatku XX stahodździa fort pieraabstalavali ŭ vajennuju turmu. Potym, u 1930-ch hadach, turma pierajšła ŭ padparadkavańnie hramadzianskaha Ministerstva justycyi. U joj siadzieŭ, naprykład, znakamity hanhstar Al Kaponie.
Paśla zakryćcia na Alkatrasie i pra Alkatras źniali niekalki mastackich filmaŭ, a ciapier jon słužyć turystyčnaj słavutaściu.
Zakryli ž turmu z-za taho, što jaje było zanadta doraha ŭtrymlivać: na sajcie Fiederalnaha biuro turmaŭ havorycca, što Alkatras abychodziŭsia ŭ try razy daražej, čym inšyja fiederalnyja turmy.
U čym pryčyna niezadavolenaści žycharoŭ mikrarajona Lebiadziny ŭ Minsku? Voś što nasamreč tam płanavali budavać6
U čym pryčyna niezadavolenaści žycharoŭ mikrarajona Lebiadziny ŭ Minsku? Voś što nasamreč tam płanavali budavać
Babaryka turemščykam: «U mianie było, ciapier niama, ale jość šaniec, što budzie. A ŭ vas nie było, niama i nie budzie. I ŭ vašych dziaciej nie budzie»99
Kamientary
Turmy zamiest adukacyi navuki ?? Pryarytet vidavočien