Трамп паабяцаў увесці 100-працэнтныя пошліны на замежнае кіно і зноў адкрыць турму Алькатрас
Прэзідэнт ЗША ў нядзелю абвясціў праз допісы ў сацсетцы, што мае намер выратаваць, на яго думку, паміраючую амерыканскую кінаіндустрыю, увёўшы 100-працэнтныя пошліны на замежныя кінастужкі, а таксама зноў адкрыць знакамітую турму на востраве Алькатрас, якая ўжо больш за 60 гадоў служыць здымачнай пляцоўкай і турыстычнай славутасцю, піша Бі-бі-сі.
У посце пра кіно ў сваёй сетцы Truth Social Дональд Трамп заявіў, што амерыканская кінаіндустрыя «памірае вельмі хуткай смерцю», таму што іншыя краіны ўсімі спосабамі пераманьваюць людзей і студыі да сябе.
«Галівуд і многія іншыя раёны ў ЗША спусташаюцца. Гэта скаардынаваныя дзеянні іншых краін, і таму гэта — пагроза Нацыянальнай Бяспецы», — напісаў Трамп і абвясціў, што даручае Міністэрству гандлю і Гандлёваму прадстаўніцтву ЗША «неадкладна пачаць працэс» увядзення 100-працэнтных мыт на ўсе замежныя фільмы.
Паводле звестак аналітыкаў, доля ЗША ў выдатках на вытворчасць кіно і касавых зборах у свеце сапраўды зніжаецца, але Злучаныя Штаты ўсё ж застаюцца безумоўным лідарам на гэтым рынку. Амерыканская кінаіндустрыя ўжо ў пэўнай ступені пацярпела ад імпартных мыт Трампа: Кітай у адказ на іх вырашыў, сярод іншага, скараціць квоту амерыканскіх фільмаў у сваім пракаце.
«Памылковыя дзеянні ўладаў ЗША, што злоўжываюць пошлінамі ў дачыненні да Кітая, непазбежна скарацяць цікавасць нашай унутранай аўдыторыі да амерыканскіх фільмаў, — заявіла кітайская ўстанова, якая кіруе кінатэатральным пракатам. — Мы будзем прытрымлівацца правілаў рынку, паважаць выбар аўдыторыі і ўмерана скарачаць колькасць імпартаваных амерыканскіх фільмаў».
Дональд Трамп увёў забаронныя мыты на кітайскі імпарт у памеры 145%. Кітай адказаў 125-працэнтнымі пошлінамі на амерыканскія тавары.
Імпарт з усіх іншых краін Дональд Трамп да ліпеня абклаў 10-працэнтнымі пошлінамі, пасля чаго яны, паводле актуальнага стану, павінны рэзка ўзрасці. У іншым посце Дональд Трамп абвясціў, што вырашыў зноў адкрыць і пашырыць знакамітую турму на востраве Алькатрас у бухце Сан-Францыска. Яе закрылі 62 гады таму.
Паводле задумкі Трампа, у гэтай турме будуць утрымлівацца самыя небяспечныя злачынцы, і яна стане «сімвалам закона, парадку і правасуддзя».
Турма Алькатрас першапачаткова была марскім фортам. На пачатку ХХ стагоддзя форт пераабсталявалі ў ваенную турму. Потым, у 1930-х гадах, турма перайшла ў падпарадкаванне грамадзянскага Міністэрства юстыцыі. У ёй сядзеў, напрыклад, знакаміты гангстар Аль Капоне.
Пасля закрыцця на Алькатрасе і пра Алькатрас знялі некалькі мастацкіх фільмаў, а цяпер ён служыць турыстычнай славутасцю.
Закрылі ж турму з-за таго, што яе было занадта дорага ўтрымліваць: на сайце Федэральнага бюро турмаў гаворыцца, што Алькатрас абыходзіўся ў тры разы даражэй, чым іншыя федэральныя турмы.
Цяпер чытаюць
Бабарыка зоймецца бізнэсам — ужо адкрыў кампанію ў Германіі8
Бабарыка зоймецца бізнэсам — ужо адкрыў кампанію ў Германіі
«Я стаў шчаслівы». Праца на будоўлі прыносіць добрыя грошы, а грамадская актыўнасць — маральную сілу. Былы каліновец Кусь расказаў пра тое, як вярнуў унутраную раўнавагу1313
«Я стаў шчаслівы». Праца на будоўлі прыносіць добрыя грошы, а грамадская актыўнасць — маральную сілу. Былы каліновец Кусь расказаў пра тое, як вярнуў унутраную раўнавагу13
«Галандскі архітэктар», які адбудаваў Вострую браму і паставіў сабе дом-крэпасць у Гайцюнішках, аказаўся ніякім не галандцам. Але яго спадчына захапляе1010
Каментары
Турмы замест адукацыі навукі ?? Прыарытэт відавочен