«Absalutny chaos». Kamała Charys raskrytykavała Trampa ŭ pieršaj pramovie paśla parazy na vybarach
Eks-vice-prezident ZŠA i supiernica Donalda Trampa na vybarach 2024 hoda ŭ svajoj pieršaj paśla paražeńnia vialikaj publičnaj pramovie abrynułasia z krytykaj na Donalda Trampa i jaho administracyju za ich biezrazvažnuju palityku, jakaja pahražaje krainie cenzuraj i recesijaj. Jaje vystup supaŭ z adznakaj u 100 dzion prezidenctva Trampa, piša Bi-bi-si.
U pryvatnaści, jana zajaviła, što taryfnaja palityka Trampa źjaŭlajecca «vialikim rukatvornym ekanamičnym kryzisam u sučasnaj historyi amierykanskaha prezidenctva».
«Niekatoryja ludzi apisvajuć toje, što adbyvałasia apošnija miesiacy, jak absalutny chaos. I, viadoma, ja razumieju čamu. Heta, biezumoŭna, tyčycca hetych taryfaŭ. Taryfaŭ, jakija — jak ja i pradkazvała — vidavočna zaprašajuć recesiju», — skazała Charys.
Jana vitała amierykancaŭ, jakija adkryta vystupajuć suprać hetaj palityki, jakaja, pavodle jaje słoŭ, pavialičyć paŭsiadzionnyja vydatki hramadzian, paŭpłyvaje na piensijonnyja rachunki i mały biźnies. Pieršaje vystupleńnie Charys paśla paražeńnia na vybarach prajšło ŭ San-Francyska na hała-mierapryjemstvie arhanizacyi Emerge America, jakaja dapamahaje žančynam budavać palityčnuju karjeru i bałatavacca na vybarach.
Kamała Charys havaryła nie tolki pra ekanamičnuju paviestku Trampa, jana nazvała ŭsiu jaho prezidenckuju prahramu «vuzkim, ehaistyčnym bačańniem Amieryki, dzie jany [kamanda Trampa] karajuć tych, chto kaža praŭdu, padtrymlivajuć łajalistaŭ, nažyvajucca na svajoj uładzie i pakidajuć usich astatnich na volu losu».
Jana papiaredziła, što kali sistema strymak i procivah u ŭradzie razvalicca, kraina sutykniecca z kanstytucyjnym kryzisam.
«Heta kryzis, jaki ŭrešcie zakranie ŭsich, bo heta budzie aznačać, što praviły, jakija abaraniajuć našy asnoŭnyja pravy i svabody, jakija harantuć kožnamu z nas prava hołasu ŭ tym, jak pracuje naša ŭrad, bolš nie buduć mieć značeńnia», — skazała eks-vice-prezident.
Paśla taho, jak demakratyčnaja administracyja pakinuła Bieły dom, Kamała Charys redka źjaŭlałasia na publicy. Pavodle jaje słoŭ, na pramovu ŭ San-Francyska jaje natchnili amierykancy, jakija śmieła supraćstajali dziejańniam Trampa z pačatku jaho druhoha terminu, i sudździ, što praciahvajuć padtrymlivać viaršenstva zakona ŭ krainie.
«Mahčyma, situacyja stanie jašče horšaj, pierš čym pačnie palapšacca. Ale my da hetaha hatovyja», — skazała Charys u zaviaršeńnie svajoj pramovy.
Sustreču Ryžankova ź Sikorskim paprasiŭ Minsk. Što kamanda Cichanoŭskaj abmiarkoŭvała z palakami da i paśla jaje11
Kamientary
ja ni razu nie fanat kvazidiktatora trampa, no SŠA eto choť i problemnaja i ubierkorrumpirovannaja, no poka jeŝio diemokratija.
tak čto ja by poriekomiendovał jej i jejo kukłovodami vsio žie načať s rassmatrivanija siebia v zierkało.