Reanimatołah Martaŭ raskazaŭ, jak vyratavaŭ žančynu z čatyrma skraznymi ranieńniami serca
«Voś heta była viesiałość. Poŭny, zrazumieła, pierdymanokl. Ale my ratavali da apošniaha. Jana vyžyła. Na svaich nahach syšła».
Zahadčyk adździaleńnia aniestezijałohii i reanimacyi Viciebskaj balnicy chutkaj dapamohi Uładzimir Martaŭ adnym ź pieršych ahučyŭ sapraŭdnuju śmiertnaść ad kavidu. U krasaviku 2021 hoda jon byŭ zvolnieny z pracy, a ŭ 2024 hodzie zatrymany na terytoryi Rasii. Paźniej stała viadoma, što mužčyna zmoh vyjechać u Litvu.
U intervju jutub-kanału Volhi Vialička Martaŭ raskazaŭ pra nieardynarny vypadak z svajoj tryccacihadovaj praktyki.
Jak zhadvaje doktar, adnojčy da ich u adździaleńnie pastupiła žančyna z čatyrma ranieńniami serca.
«Žančyna pakutuje na ciažkuju depresiju, patrapiła ŭ psichijatryčnuju balnicu, joj vypisali leki, padabrali schiemu [lačeńnia], vypisvajuć. Vydali na try dni tabletak. Jana prymaje try dni tabletki, idzie ŭ psichanieŭrałahičny dyspansier. Joj havorać: «Vaša vypiska nie pryjšła, prychodźcie zaŭtra», — raskazvaje akaličnaści doktar.
Pa słovach doktara, na nastupny dzień žančyna ździejśniła sprobu zrabić sabie śmierć:
«Jana rankam pajšła ŭ vannuju, padumała: «U čym sens?» — i pačała tykać siabie vostrym doŭhim styletam u žyvot. Vielmi važna, što spačatku ŭ žyvot. Zrazumieła, što nie pamiraje, i pačała tykać u serca. Try ranieńni ŭ žyvot (tam piačonka, usio), i čatyry ŭ serca, usie skraznyja».
U vyniku žančyna patrapiła ŭ reanimacyju da Martava.
«Voś heta była viesiałość. Poŭny, zrazumieła, pierdymanokl (mocnaje ździŭleńnie — NN). Ale my ratavali da apošniaha. Jana vyžyła. Na svaich nahach syšła», —
zaŭvažaje doktar i tłumačyć, što vyratavańniu žyćcia paspryjała toje, što žančyna spačatku paraniła siabie ŭ žyvot:
«Z žyvata paciakła kroŭ, upaŭ cisk. I kali jana tykała ŭ serca, kroŭ užo nie biła strumieniem, a vyciakała. I my paśpieli».
Pa słovach Martava, u pacyjentki jašče nie adbyłasia tampanada — heta aznačała, što kroŭ z paškodžanaha serca nie paśpieła całkam zapoŭnić pierykard (abałonku serca).
Chirurh terminova ŭskryŭ pierykard, kab vypuścić nazapašanuju kroŭ i źniać cisk z serca. Paralelna pačałosia masiŭnaje pieralivańnie kryvi, kab stabilizavać cisk i kampiensavać stratu kryvi.
Pakul kamanda pracavała nad padtrymańniem žyćciova važnych funkcyj, prybyŭ kardyjachirurh. Jon adrazu prystupiŭ da apieracyi: zašyvaŭ rany na sercy.
«Tam byŭ taki śmiešny epizod, jaki zapomniŭsia. Kali pasiarod apieracyi jana ŭsio-taki pačała pamirać, i spyniłasia serca. A serca ŭ rukach. I kardyjachirurh pačynaje ŭžo adkryty masaž. Tyn-tyn-tyn. A ŭ jaho jašče dzirki nie ŭsie zašytyja. I ŭ jaho z serca [kroŭ] tykaje ŭ tvar — pryś, pryś, pryś.
A ŭ mianie na manitory bačna, što vykidu niama. To-bok tam CO₂ nul. To-bok u arhanizm [kisłarod] nie pastupaje, mozh zaraz zahinie. Ja kažu: «Davaj, karaciej, adzin tam pryś (praciahvaje ściskać serca — NN), druhi tam [zašyvaje]»,
— zhadvaje ź śpiecyfičnym humaram Martaŭ i dadaje:
«Jana vyjšła. Na svaich nahach, z mazhami».
Ciapier čytajuć
Piśmieńnica Taćciana Zamiroŭskaja raskazała pra novuju knihu, sny pra Łukašenku, košt žyćcia ŭ Ńju-Jorku i toje, čamu złuje na niekatorych biełarusaŭ1616
Kamientary