«Papiaredničaŭ praciahły kanflikt». Śledčyja raskazali padrabiaznaści pra zabojstva padletka ŭ homielskim kaledžy
25 sakavika ŭ Homielskim darožna-budaŭničym kaledžy adbyłasia trahiedyja: pamiž dvuma 17‑hadovymi navučencami ŭźnik kanflikt, u vyniku jakoha adzin ź ich nanios druhomu niekalki ŭdaraŭ nažom. Paciarpiełaha špitalizavali, ale ŭratavać jaho nie ŭdałosia — jon pamior u balnicy. Padrabiaznaści hetaj historyi raskazali va Upraŭleńni Śledčaha kamiteta pa Homielskaj vobłaści.
Śledstva ŭstanaviła, što heta nie byŭ raptoŭny incydent. Kanflikt pamiž chłopcami ciahnuŭsia doŭhi čas. Pavodle źviestak, u adnosinach pamiž imi nazirałasia varožaść, mahčyma navat elemienty ckavańnia. Adnak, niahledziačy na heta, situacyja nie atrymała naležnaj uvahi z boku adkaznych supracoŭnikaŭ kaledža.
U dzień trahiedyi abodvuch navučencaŭ nakiravali ŭ adnu padhrupu dla prachodžańnia vytvorčaj praktyki ŭ majsterni vučebnaha palihona. Mienavita tam i adbyłasia svarka, jakaja pierarasła ŭ hvałt.
Pa słovach adnaho z navučencaŭ, napiaredadni incydentu ŭ napadnika ŭźnikli dadatkovyja prablemy — nibyta niechta paškodziŭ jahony rovar. Heta mahło stać katalizataram, paśla čaho jon pryjšoŭ u kaledž z nažom i vykarystaŭ jaho padčas kanfliktu.
Śledčy kamitet padkreśliŭ, što ŭ kaledžy nie była naležnym čynam arhanizavanaja indyvidualnaja prafiłaktyčnaja praca z padletkami. Nastaŭniki i administracyja nie pryniali dastatkovych mier, kab praduchilić raźvićcio niebiaśpiečnaj situacyi, i faktyčna praihnaravali najaŭny kanflikt.
U suviazi z hetym u Respublikanski instytut prafiesijnaj adukacyi było nakiravana aficyjnaje pradstaŭleńnie. Jano tyčycca nieabchodnaści likvidacyi niedachopaŭ u arhanizacyi vychavaŭčaha i navučalnaha pracesu.
Pytańnie apieratyŭna razhledzieli na naradzie ŭ farmacie videakanfierencyi z udziełam pradstaŭnikoŭ Ministerstva adukacyi, kiraŭnictva kaledža i piedahahičnaha składu. Na sustrečy abmierkavali kankretnyja miery pa palapšeńni kantrolu za pavodzinami navučencaŭ, uzmacnieńni prafiłaktyki kanfliktaŭ i adkaznaść supracoŭnikaŭ, jakija dapuścili niedapracoŭki.
Kryminalnaja sprava praciahvajecca. Padazravanamu vystaŭlena abvinavačańnie ŭ zabojstvie, jon uziaty pad vartu. Śledstva praciahvaje vyśviatlać usie abstaviny i pryčyny trahiedyi.
Ciapier čytajuć
Łukašenka zaklikaŭ žycharoŭ Homielščyny nie chvalavacca z-za ŭltymatumu Zialenskaha adnosna retranślataraŭ58
Kamientary
Hlanuŭ, što za krynica. Pres-reliz SK!!!