Hałoŭnakamandujučy USU: Rasija ŭzmacniaje intensiŭnaść bajavych dziejańniaŭ
Rasijskija vojski značna ŭzmacnili intensiŭnaść bajavych dziejańniaŭ, skancentravaŭšy asnoŭnyja namahańni na Pakroŭskim napramku, niahledziačy na zajavy pra hatoŭnaść da trochdzionnaha spynieńnia ahniu ŭ mai. Pra heta zajaviŭ hałoŭnakamandujučy Uzbrojenymi siłami Ukrainy Alaksandr Syrski, piša Rasijskaja słužba Radyjo Svaboda.
«Adsutnaść pierśpiektyvaŭ u apieratyŭnym i taktyčnym płanie nie spyniaje voraha — jon uparta sprabuje prarvać abaronu našych vojskaŭ na hetym napramku i vyjści na administracyjnuju miažu Dnieprapiatroŭskaj vobłaści. Z hetaj metaj rasijskaje kamandavańnie štodnia kidaje ŭ boj novyja padraździaleńni, honić svaich vajskoŭcaŭ na śmierć, daje spravazdačy pra iluzornyja pośpiechi i pieramohi», — napisaŭ Syrski ŭ Telegram.
Jon dadaŭ, što pryśviaciŭ dzień pracy ŭ bryhadach, jakija trymajuć abaronu mienavita na hetym učastku, «z metaj vyrašeńnia prablemnych pytańniaŭ i akazańnia dapamohi kamandziram častak u arhanizacyi bajavych dziejańniaŭ».
Vydańnie The Wall Street Journal u aŭtorak adznačyła, što ŭkrainskim siłam viasnoj udałosia stabilizavać liniju frontu na ŭschodzie Ukrainy. Adnak USU čakajuć u bližejšy čas novaha nastupu rasijskich vojskaŭ, źviazvajučy heta z zakančeńniem pieryjadu biezdarožža i źjaŭleńniem listoty na drevach, što ŭskładnić vykarystańnie bieśpiłotnikaŭ i, naadvarot, sprościć prymianieńnie ciažkoj techniki.
Zhodna z danymi prajekta DeepState i inšych manitorynhavych kanałaŭ, asnoŭnyja namahańni rasijskich vajskoŭcaŭ ciapier skancentravany na poŭdzień i ŭschod ad Pakroŭska, a taksama pad Tareckam u Danieckaj vobłaści. Na niekatorych učastkach rasijskija vojski nablizilisia da miažy z Dnieprapiatroŭskaj vobłaściu.
U Kramli dniom 28 krasavika zajavili, što prezident Rasii Uładzimir Pucin addaŭ zahad rasijskim vojskam spynić ahoń u «dni 80-hodździa Pieramohi» — 8, 9 i 10 maja. Prezident Ukrainy Uładzimir Zialenski, kamientujučy hetaje paviedamleńnie, nahadaŭ, što Ukraina padtrymlivaje ideju ZŠA ab spynieńni ahniu, a taksama prapanoŭvała 30-dzionnuju paŭzu, i nazvaŭ zajavu Pucina «jašče adnoj sprobaj manipulacyi».
Kamientary