U Dziarždepartamiencie ZŠA buduć radykalna skaračać struktury, zaniatyja pravami čałavieka
Dziaržsakratar ZŠA Marka Rubia anansavaŭ maštabnuju restrukturyzacyju svajho viedamstva, pa vynikach jakoj mnohija zamiežnyja prahramy Dziarždepartamienta buduć zhornutyja, a značnaja častka jaho supracoŭnikaŭ zvolnienaja, piša Bi-bi-si.
Nazvaŭšy źniešniepalityčnaje viedamstva «razdźmutym, zabiurakratyzavanym» i «prychilnym radykalnaj palityčnaj ideałohii», Rubia zajaviŭ, što dziejnaść, «nie adpaviednaja asnoŭnym nacyjanalnym intaresam Amieryki», trapić pad skaračeńni.
U pryvatnaści, udakładniŭ dziaržsakratar, budzie rasfarmavany adździeł, jaki zajmajecca manitorynham parušeńniaŭ pravoŭ čałavieka ŭ zamiežnych krainach, vajennych złačynstvaŭ i hienacydu.
Rubia nazvaŭ hety adździeł «płatformaj levych aktyvistaŭ dla viadzieńnia viendet» suprać kansiervatyŭnych lidaraŭ. Jon pryvioŭ prykłady Polščy, Vienhryi i Brazilii; u Polščy i Brazilii ideałahična blizkija da Trampa lidary ŭ apošnija hady stracili ŭładu.
Pres-sakratarka Dziarždepartamienta Temi Brus zajaviła:
«Pierad nami stajać vielizarnyja vykliki pa ŭsim śviecie, kab realizavać źniešniuju palityku prezidenta Trampa pa pryncypie «Amieryka pierš za ŭsio». My pavinny zrabić Dziaržaŭny departamient znoŭ vialikim. U svajoj ciapierašniaj formie Departamient razdźmuty, biurakratyčny i niazdolny vykonvać svaju nadzionnuju dypłamatyčnuju misiju ŭ hetaj novaj ery supiernictva vialikich dziaržaŭ».
Płan maštabnaj rearhanizacyi Dziaržaŭnaha departamienta Rubia pradstaviŭ 22 krasavika ŭ vyhladzie novaj struktury arhanizacyi.
Miarkujučy pa apublikavanaj schiemie, samaj radykalnaj źmienaj źjaŭlajecca likvidacyja cełaj struktury Dziarždepartamienta, jakaja znachodziłasia ŭ padparadkavańni namieśnika dziaržsakratara pa biaśpiecy cyvilnaha nasielnictva, demakratyi i pravach čałavieka.
Niekatoryja elemienty hetaj struktury, u tym liku biuro pa spravach demakratyi i pravoŭ čałavieka, a taksama biuro pa spravach biežancaŭ, buduć skasavanyja i abjadnanyja ŭ adzinaje ŭpraŭleńnie pa zamiežnaj i humanitarnaj dapamozie.
Ahulnuju kolkaść pasad u centralnym aparacie Dziarždepartamienta płanujecca skaracić z 734 da 602 (amal na 18%), piša New York Times sa spasyłkaj na ŭnutrany dakumient viedamstva.
Rubia daručyŭ svaim čynoŭnikam u samy najbližejšy čas padać jamu płany pa skaračeńni na 15% kolkaści supracoŭnikaŭ, jakija pracujuć u ZŠA. Pra skaračeńni ŭ zamiežnych misijach ZŠA pakul ničoha nie paviedamlajecca.
ZŠA zaŭtra prapanujuć Ukrainie i Jeŭropie pryznać Krym rasijskim — The Washington Post
Pakazali partret Trampa, jaki jamu ŭ sakaviku padaryŭ Pucin
Vens prybyŭ u Deli abmierkavać z Modzi taryfy i handlovuju ździełku. U Indyi vizitu radyja nie ŭsie
Mask hatovy pakinuć pasadu, bo «stamiŭsia ad napadak levych»
«U Viciebsku zachodziŭ u tralejbus i kazaŭ «Słava Ukrainie!». Ukrainca ŭ 67 hadoŭ pasadzili za kamienty, napisanyja paśla hibieli chrosnaj dački pad abstrełam u Kijevie1010
Kamientary