Siastra Hanny Siałuk: Amieryka i «Jeŭrabačańnie» nam nie patrebnyja, jość rynak Rasii i Kazachstana

Namieśnica dyrektara «Muzyčnaj miedyjakampanii» Taćciana Kułakova — rodnaja siastra Hanny Łukašenki, jakaja piša pieśni pad psieŭdanimam Hanna Siałuk. Pa infarmacyi «Biuro», hety pradziusarski centr naležyć Pałacu Respubliki Upraŭleńnia spravami Łukašenki (30%) i pryvatnaj kampanii «ANSŁ pradakšn» (70%). ANSŁ nahadvaje skaročanyja inicyjały Hanny Siarhiejeŭny Łukašenki (tolki pa-rusku). Ale sama jana supracoŭnicaj u «Muzyčnaj miedyjakampanii» nie značycca i nijakaha prybytku ad jaje nibyta nie atrymlivaje.

U efiry ANT Kułakova raskazała, jak uźnikła ideja stvaryć pradziusarski centr. Pa jaje słovach, usio pačałosia paśla 2020 hoda, kali jana i inšyja kalehi nieaficyjna dapamahali biełaruskim artystam z raskrutkaj, arhanizacyjaj kancertaŭ, ale praca stała surjoznaj, i pryjšłosia aformić heta jak biznes:

«Prosta ŭ nas atrymałasia tak, što paśla 2020 hoda mnohim našym artystam davali niejkija kansultacyi pa prasoŭvańni, pa niejkich krokach u raskrutcy, dapamahali ŭ arhanizacyi kancertnaj dziejnaści, dapamahali ŭ arhanizacyi padboru repiertuaru, naładžvańni ŭzajemaadnosin z presaj. I heta niejak usio adno za adnym, i atrymałasia, što ty nie možaš skazać «ja dyrektar artysta». Nu chto ty taki? To-bok, niama niejkaj jurydyčnaj padaploki. I tamu była stvorana muzyčnaja miedyjakampanija».

Kułakova zapeŭnivaje, što ciapier muzyčnaja industryja Biełarusi «na ŭzdymie, u jakim jana nie była na praciahu mnohich hadoŭ».

Pa jaje słovach, raniej «ludzi prosta hadami śpiavali adnu i tuju ž pieśniu, i heta było niecikava», ciapier ža «artysty ŭsie vielmi vysokaha ŭzroŭniu pa svaim majsterstvie, pa svajoj charyźmie, pa svaim repiertuary».

Pry hetym Kułakova nie bačyć nijakich prablem, ź jakimi siońnia sutykajucca biełaruskija artysty. «Jeŭrabačańnie» i amierykanskija łejbły im nie patrebnyja, a dla prasoŭvańnia dastatkova Rasii i Kazachstana.

«Skažam adkryta: u amierykanskich łejbłach našy artysty nie byli. Tamu tut prablem niama. A toje, što jany [nie] ŭdzielničajuć u «Jeŭrabačańni», vy viedajecie, tak i nie treba. Miarkujučy pa tym, što adbyvajecca ŭ hetym konkursie apošnija niekalki hadoŭ, mnie padajecca, što i nie treba. A rynak rasijski — kali łaska, jon adkryty. Rynak Kazachstana adkryty».

Kułakova zapeŭnivaje, što misija ich pradziusarskaha centra — pošuk novych imionaŭ i raźvićcio muzyčnaj industryi krainy.

«Chaciełasia b, kab hetych imion było jak maha bolš. Viedajecie, samaja naša vialikaja meta i misija — heta kali ludzi buduć kazać: ja lublu svajo biełaruskaje, i ja chaču jaho čuć, ja chaču jaho kupić», — davodzić žančyna i zapeŭnivaje, što ŭ jaje płejliście «niama nivodnaha inšaha artysta, akramia biełaruskaha».

• 1
• 1
• 8
• 10
• 2
• 0
• 2
• 0