U rasparadžeńni rasśledavalnikaŭ «Biuro» źjavilisia danyja pra zarabotnyja płaty klučavych supracoŭnikaŭ «Muzyčnaj miedyjakampanii» — pradziusarskaha centra, u jakim pasadu hienieralnaha pradziusara zajmaje niaviestka Alaksandra Łukašenki, bolš viadomaja jak aŭtarka piesień pad psieŭdanimam Hanna Siałuk.
Jak piša «Biuro», sama Hanna Łukašenka (Siałuk) supracoŭnikam u «Muzyčnaj miedyjakampanii» nie značycca i nijakaha prybytku ad jaje nibyta i nie atrymlivaje.
Adnak firma spraŭna pieraličaje hanarary top-mieniedžaram pradakšna — dyrektaru Andreju Huzielu i namieśniku dyrektara Taćcianie Kułakovaj, rodnaj siastry Hanny Łukašenki.
Andrej Huziel pracavaŭ kancertnym dyrektaram u biełaruskich vykanaŭcaŭ — Sašy Nema i Łarysy Hrybalovaj, supracoŭničaŭ z Alaksandram Rybakom i navat vałodaŭ ułasnym pradziusarskim centram «Hrand mjuzik».
Ciapier Huziel šukaje budučych zorak biełaruskaj estrady na dziaržpradpryjemstvach.
Za hetuju pracu ŭ 2022 hodzie Andrej Huziel atrymaŭ ad «Muzyčnaj miedyjakampanii» prykładna 31,5 tysiačy biełaruskich rubloŭ.
U 2023 hodzie ŭ pradziusarskim centry front pracaŭ pavialičyŭsia, i zarobak Huziela pačaŭ raści. Usiaho tady pradziusar atrymaŭ ad «Muzyčnaj miedyjakampanii» krychu bolš za 94 tysiačy biełaruskich rubloŭ.
Ź miesiaca ŭ miesiac jaho akłady varjavalisia ad 6162 da 9878 rubloŭ, u toj čas jak siaredniaja zarabotnaja płata ŭ 2023 hodzie pa krainie była 1902 rubli.
Talenty ŭłasnaj siastry hienieralny pradziusar Hanna Łukašenka aceńvaje krychu bolš ścipła.
U 2022 hodzie Taćciana Kułakova adpracavała ŭ «Muzyčnaj miedyjakampanii» niapoŭnych 3 miesiacy, za što atrymała trochi bolš za 16 tysiač biełaruskich rubloŭ. U 2023 hodzie Kułakova zarabiła kala 79,5 tysiačy biełaruskich rubloŭ.
Ź miesiaca ŭ miesiac jaje akłady źmianialisia ad 4360 da 9878 rubloŭ — to bok u siarednim za miesiac jana zarablała bolš, čym siaredniestatystyčny biełarus, u 3,5 razu.
Jak piša «Biuro», «Muzyčnaja miedyjakampanija» naležyć Pałacu respubliki Upraŭleńnia spraŭ Łukašenki (30%) i pryvatnaj kampanii «ANSŁ pradakšn» (70%).
Heta «ANSŁ pradakšn» zapisanaja na Andreja Urubleŭskaha (95%) — adnaho z padnačalenych Dźmitryja Łukašenki. Ale, imavierna, Urubleŭski vykonvaje ŭ «ANSŁ pradakšn» funkcyju naminalnaha ŭładalnika, kab utaić udzieł u kampanii žonki svajho patrona.
ANSŁ vielmi nahadvaje inicyjały žonki siaredniaha syna Łukašenki Dźmitryja — ANna (pa-rusku) Siarhiejeŭna Łukašenka.
Ciapier čytajuć
«Byŭ upeŭnieny, što ja niedatykalnaja asoba dla rasijan». Pieršaje intervju Jurasia Ziankoviča na svabodzie3
Kamientary