Prajekt apart-hatela ŭ centry Minska, źviazanaha z Bałabam, zaviarnuli — zaminaje suviazi z kosmasam
Šmatpaviarchovy dom z apartamientami płanavała pabudavać tavarystva «Dynama», jakim kiruje były kamandzir minskaha AMAPa Dźmitryj Bałaba, ale znajšlisia važkija arhumienty suprać.
Prajekt budučaj novabudoŭli, jakaja pavinna była źjavicca ŭ Minsku na miescy dvuchpaviarchovaha internata pa Akademičnaj vulicy, 11B, niadaŭna vynosiŭsia na hramadskaje abmierkavańnie. Atmaśfiernyja dvuchpaviarchoviki ŭnutry kvartała za Akademijaj navuk źjavilisia adrazu paśla vajny. Kvatery ŭ ich vydavali rabotnikam Akademii navuk, a paźniej adzin z budynkaŭ staŭ internatam BFST «Dynama».
U studzieni 2025 hoda kiraŭnikom tavarystva «Dynama» vybrali byłoha kiraŭnika staličnaha AMAPa Dźmitryja Bałabu. A ŭžo ŭ kancy lutaha na hramadskaje abmierkavańnie byŭ vyniesieny vielmi syry prajekt šaścipaviarchovaha apart-hatela na hetym miescy, z pryhožymi rendarami i sa słaba prapracavanymi płanami.
Prajekciroŭščykam vystupiła architekturnaja studyja «Lichtar», jakaja navat nie maje ŭłasnaha sajta, sacsietak i partfolia prajektaŭ. Studyja znachodzicca ŭ Babrujsku, što samo pa sabie vielmi dziŭna, bo ŭ stalicy bolš čym dastatkova daśviedčanych prajektnych arhanizacyj, hatovych uziacca za taki prynadny prajekt. Dyrektaram studyi źjaŭlajecca Aleh Karankievič, były hałoŭny architektar Babrujska.
Pa vynikach abmierkavańnia ŭ administracyju Pieršamajskaha rajona pastupili ŭsiaho dva zvaroty. Adzin kalektyŭny zvarot napisali žychary susiednich damoŭ, jaki paličyli, što ŭ prajekcie dapuščanyja pamyłki ŭ raźliku patrebnaj kolkaści mašynamiescaŭ i ŭ vykanańni sanitarnych razryvaŭ.
Ale sapraŭdny niezvyčajnym akazaŭsia druhi zvarot, jaki dasłała Nacyjanalnaja akademija navuk Biełarusi. Navukoŭcy zajavili, što budaŭnictva hmacha ŭ hetym miescy ŭ pryncypie niemahčymaje. Pavodle ich słoŭ, novabudoŭla b častkova pierakryła pracoŭnyja siektary pryjomnaj anteny, što vykliča zboj u pracy Biełaruskaj kaśmičnaj sistemy dystancyjnaha zandavańnia Ziamli.
Architekturna-horadabudaŭničaja rada pry hałoŭnym architektary horada Minska, aznajomiŭšysia sa zvarotami, zaviarnuła prajekt, adpraviŭšy jaho na dapracoŭku i rekamiendavaŭšy praciahnuć pošuk abjomna-prastoravaha rašeńnia abjekta.
«Naša Niva» — bastyjon biełaruščyny
PADTRYMAĆ
Kamientary