«Biełaruś 1» padmanuła Alaksandra Knyroviča, kab uziać kamientar dla prapahandysckaha filma

Alaksandr Knyrovič raspavioŭ «Lusterku», što dziaŭčyna, jakaja jamu patelefanavała, pradstaviłasia vałanciorkaj, što źbiraje słovy padtrymki dla siamji pamierłaha.

— Heta było 9 ci 10 śniežnia: mnie ŭ Telegram napisała niejkaja asoba, padpisanaja žanočym imiem; pa maniery znosin možna było mierkavać, što heta maładaja dziaŭčyna. Jana skazała, što ja napeŭna viedaju pra trahiedyju [z Uładzimiram Usieram], i paprasiła zapisać videa z majoj dumkaj pra toje, što adbyłosia, paviedamiŭšy, što źbirajecca apublikavać jaho ŭ pamiać pra žurnalista. Ja niekalki dzion sprabavaŭ jaje vieryfikavać i prasiŭ dać choć niejkija źviestki pra siabie, ale surazmoŭnica spasyłałasia na toje, što jana niepubličnaja asoba i nie viadzie sacsietki. Kali b havorka nie išła pra śmierć čałavieka, ja b admoviŭsia, — patłumačyŭ surazmoŭca.

Knyrovič adznačyŭ, što adpraviŭ dziaŭčynie fajł praciahłaściu kala 40 siekund. Adnak u vynikovy mantaž prapahandystaŭ trapiła tolki pałova zapisu.

— Jany pakinuli tolki tuju častku kamientara, u jakoj ja havaryŭ pra samu trahiedyju. Astatnija 20 siekund byli pra toje, što ja vielmi spadziajusia, što hetaja achviara była nie marnaj u baraćbie z režymam, — adznačyŭ Knyrovič.

Alaksandr pryznajecca, što dapuskaŭ dumku pra mahčymuju pravakacyju, ale vyrašyŭ pastupić sumlenna.

— Ja padumaŭ, što navat kali heta pravakacyja, to nie baču, jak jaje možna vykarystać. Jašče padumaŭ: što ž u mianie za taki ŭzrovień davieru, kali ja navat u takoj situacyi ŭ niečym padazraju ludziej. Zapisaŭ kamientar i adpraviŭ 12 śniežnia. Surazmoŭnica rassypałasia ŭ padziakach, čym mianie jašče raz ździviła. Paśla hetaha jana źnikła. Ciapier kantakt vydaleny, kancy abrezanyja, — raspavioŭ biznesmien.

Paśla vychadu filma Knyrovič, pavodle jaho słoŭ, byŭ rasčaravany mietadami pracy supracoŭnikaŭ dziaržaŭnaha telebačańnia.

— Moj maralny stan drenny z-za taho, što našy ludzi pamirajuć u emihracyi. Ja ŭvohule nie baču nijakaha minusu ŭ tym, što jany vykarystali moj vobraz i słovy. Jak ja napisaŭ u svaim Facebook, kali b dziaržaŭnaje TB źviarnułasia da mianie naŭprost, ja b daŭ im kamientar. Prosta tamu, što ja nie chavaju svajho mierkavańnia ci miescaznachodžańnia. Bolš za ŭsio mianie zasmučajuć sami pavodziny biełaruskich prapahandystaŭ. Napeŭna, u hetym niejak udzielničali i śpiecsłužby. Ahidna ad taho, jak z taho boku heta ŭsio zroblena. Adčuvańnia niehatyvu niama, ale jość škadavańnie, što hetyja ludzi ŭsprymajuć śviet praz pryzmu varožaści.

• 5
• 0
• 0
• 6
• 0
• 0
• 3
• 0