Čym ciapier žyvie Ksienija Vołkava z «Apošniaha hieroja»? Čverć stahodździa tamu hetaja biełaruska trapiła na trapičny vostraŭ

Ksienija Vołkava zaniała treciaje miesca ŭ šalona papularnym rasijskim šou «Apošni hieroj-2». Na prajekcie jana tady vyjhrała čyrvony džyp, jaki potym doŭha čakała ad arhanizataraŭ. Ale ŭ vyniku ŭsio ž atrymała padarunak i karystałasia mašynaj bolš za dzieviać hadoŭ.

Ksienija vyjšła zamuž za Uładzisłava Muraškieviča, jakomu naležała pryvatnaja telekampanija «Svoj kruh» u Minsku. Hučyć davoli pafasna, ale faktyčna heta było nievialikaje rekłamnaje ahienctva.

Dla Ksienii heta byŭ užo druhi šlub — ale praciahvajecca jon užo bolš za 20 hadoŭ. Muž z žonkaj šmat vandravali, dzieci ŭ ich naradzilisia adnosna pozna. Ciapier im 9 i 7 hadoŭ (a Ksienii 49). Žančyna pryznajecca, što kali b było mahčyma bijałahična, dyk naradziła b jašče paźniej. Bo žyćcio da dziaciej i paśla — heta dva vielmi roznyja žyćci.

Siamja žyvie ŭ domie pad Minskam, a ŭ staličnuju kvateru Ksienija jeździć pracavać. Ksienija taksama viadzie błoh na YouTube, pryśviečany svajmu chobi — parfumieryi. Časam adkazvaje na pytańni padpisčykaŭ.

Tak, u adnym ź videa Ksienija raspaviała, što cikavicca parfumaj pačała, kali jaje małodšaj dačce byŭ hodzik. Siamja adpačyvała ŭ Maroka, i padčas niejkaj ekskursii žančyna pačuła pra stvaralnika parfumiernaha brenda Sierža Lutansa. U Ksienii na toj momant nie było vialikaj kalekcyi parfumy, ale jana zacikaviłasia historyjaj.

Pavialičyć

Biełaruska zhadvaje pryncyp: kali chočaš niešta vyvučyć, rastłumač heta inšamu.

Tamu, kali jana rychtujecca zapisać videa dla svajho kanała, vyvučaje šmat novaha pra parfumu. Kaža, što razvažańnie nad roznymi vodarami dapamahaje joj rassłablacca.

Ksienija ličyć siabie nie ekśpiertkaj, a kalekcyjanierkaj parfumy. Śćviardžaje, što nie mieła nijakich błohierskich ambicyj.

Prosta chacieła raźvivacca ŭ svaim chobi i… znoŭ navučycca havaryć. Bo kali amal uvieś čas pravodziš z maleńkimi dziećmi, dyk pačynaješ razmaŭlać vielmi sproščanymi frazami. Ksienija ž u niejki čas adčuła, što dehraduje ŭ dekretnym adpačynku. A pahavaryć chacia b z kamieraj było pryjemna.

Adkazvajučy na pytańnie pra košt takoha chobi, Ksienija paśmichałasia: tłumačyła, što jaje muž-numizmat na nabyćcio roznych maniet vydatkoŭvaŭ značna bolš hrošaj.

Svajo žyćcio žančyna źviazała ź bijałohijaj. Padpisčykam Ksienija raspaviała, što nikoli nie maryła być bijołaham — u dziacinstvie chacieła być režysioram i padvodnym archieołaham.

Dziaŭčynka lubiła šmat čytać i časam lenavałasia iści ŭ biblijateku — tamu čytała knihi, jakija byli doma. A ŭ siamiejnaj biblijatecy chapała navukova-papularnaj litaratury.

Voś dziakujučy hetamu i vyjšła, što Ksienija pačała pieramahać u bijałahičnych alimpijadach, potym pastupiła ŭ Mahiloŭski abłasny licej na śpiecyjalnaść «chimija-bijałohija» — a adtul užo całkam łahičnym byŭ šlach na bijafak BDU.

Dvanaccać hadoŭ Ksienija adpracavała ŭ Akademii navuk, atrymała kandydackuju stupień. Zvolniłasia, bo ŭ niejki momant zrazumieła, što nie viedaje, kudy ruchacca dalej.

Ksienija adznačała, što bolš cikava pracavać małodšym navukovym supracoŭnikam. Bo kali ty idzieš na pavyšeńnie, u žyćci stanovicca nadta šmat roznych pasiadžeńniaŭ i spravazdač.

Tamu žančyna atrymała biznes-adukacyju i pajšła zajmacca siamiejnym biznesam. Potym zdaryŭsia pieršy dekretny adpačynak — i kali starejšamu synu Ksienii byŭ usiaho hod, jana dystancyjna pracaŭładkavałasia bijołaham u bujnuju IT-kampaniju.

Dyk jak ža takaja surjoznaja žančyna ŭ svoj čas trapiła na ekzatyčny vostraŭ? Usio dziakujučy jaje lubovi da pryhod — jašče ŭ školnyja hady jana pačała chadzić u turystyčnyja pachody. Pieršy siezon prajektu «Apošni hieroj» biełaruska hladzieła z zachapleńniem — ažno vočy hareli.

Pavialičyć

Dla małodšaj navukovaj supracoŭnicy z kapieječnymi zarobkami ideja palacieć na inšy kraj śvietu vyhladała jak niešta amal niemahčymaje.

Ksienija była ŭpeŭnienaja, što na ekstremalnaje šou jaje nie voźmuć, bo jana biełaruska (a aktyŭna rekłamavali kastynh dla rasijan i ŭkraincaŭ). Dyk jašče i ličyła siabie nie vielmi fotahieničnaj. Ale tak vyjšła, što padčas kamandziroŭki ŭ Maskvu jana nabyła časopis, dzie była nadrukavana ankieta dla ŭdzielnikaŭ kastynhu. Miesiac nasiła toj časopis u sumcy — zapoŭnić ankietu ŭhavaryli budučy muž i ciapier užo byłaja kaleha.

Kankurencyja była šalonaja — na kastynh druhoha siezona «Apošniaha hieroja» dasłali kala 50 tysiač zajavak. Ksienija da svajoj ankiety prykłała zusim nie paradnyja foty — ź niejkich vandrovak dy pachodaŭ, kab było zrazumieła, što jana aktyŭny čałaviek.

Ale ž trapiła ŭ tysiaču ščaśliŭčykaŭ, jakich zaprasili na vočny etap kastynhu ŭ Maskvu. Adbor doŭžyŭsia miesiac — byli jak psichałahičnyja testy, tak i roznyja palavyja vyprabavańni.

Ksienija ličyć, što joj dapamoh zdarovy pafihizm. 26‑hadovuju dziaŭčynu ździviła toje, jak šmat ludziej ščyra vieryli, što ŭdzieł u televizijnym prajekcie całkam źmienić ich žyćcio. Sama jana staviłasia da ŭsiaho jak da niezvyčajnaha dośviedu — jak da mahčymaści trapić u pirackija knižki svajho dziacinstva.

Pavialičyć

Paśla vychadu šou ŭ šmatlikich intervju Ksienii čaściej za ŭsio prychodziłasia adkazvać na dva pytańni: ci praŭda toje, što adbyvałasia na astravach, i ci sapraŭdy zdymačnaja kamanda nie karmiła ŭdzielnikaŭ.

Biełaruska paćviardžaje: usio praŭda. Režysura na šou była tolki na ŭzroŭni mantažu — režysior vybiraŭ, jakuju mienavita situacyju ŭklučyć u vynikovy vypusk prahramy. Praz heta niekatoryja ludzi pakazany vielmi adnabakova — chtości złydniem, chtości aniołam.

I tak, udzielniki sapraŭdy sami zdabyvali sabie ježu. Ksienija raskazvaje: za paŭtara miesiaca zdymkaŭ schudnieła na 12 kiłahramaŭ z ulikam taho, što lišniaj vahi ŭ jaje nie było.

Sama žančyna ŭ vyniku bačyła nie ŭsie sieryi sa svaim udziełam. Bo ŭ nulavyja pahladzieć šou možna było tolki ci kali ty svoječasova dabieh da televizara, ci kali pieradaču dla ciabie niechta zapisaŭ na kasietu.

Ciapier u internecie možna znajści ŭsio, ale ŭ Ksienii bolš čym za 20 hadoŭ nie ŭźnikła žadańnia pierahladzieć šou. Nijakaj žudasnaj traŭmy jana nie atrymała, ale ž pryznajecca, što była ŭpeŭnienaja: hledačy jaje chutka zabuduć.

Ale praz toje, što Ksieniju zaŭvažyła ŭsia Biełaruś, jana stała zorkaj, a žurnalisty zhadvali pra jaje i praz hady. Ad usieahulnaj uvahi jana stamlałasia.

I pa siońnia Ksienija ličyć, što ŭ jaje žyćci było značna bolš cikavych i vartych uvahi dasiahnieńniaŭ, čym haładoŭka na vostravie ŭ Paŭdniova-Kitajskim mory.

Pavialičyć

Ale ž usio ž ekstremalnaje šou pryniesła i svaje bonusy. Dziakujučy jamu Ksienija trapiła ŭ niekalkich fajnych televizijnych prajektaŭ (naprykład, šou «Biełarusy ŭ Afrycy»). Sponsary davali na ich hrošy, kali daviedvalisia, što ŭdzielničać budzie biełaruska z «Apošniaha hieroja».

Darečy, taja vandroŭka ŭ Małajziju stała dla Ksienii druhim zamiežnym vyletam u žyćci. Potym jana šmat vandravała razam z mužam, aktyŭna zajmałasia samymi roznymi vidami sportu. Ksienija ličyć siabie trapičnym čałaviekam — jana lubić śpiakotu, dobra pieranosić vysokuju vilhotnaść. Jana lubić špacyravać pa staražytnych jeŭrapiejskich vułačkach, ale ciahnie žančynu bližej da akijana.

Jašče adno jaje niebanalnaje chobi — vyvučeńnie karejskaj movy. Ksienija kaža, niama nijakaj mety, ale joj cikava, heta takaja hulnia dla mozhu. Vybirała pamiž japonskaj, kitajskaj i karejskaj. Japonskaja nie vielmi padabałasia pa hučańni. Kitajskuju Ksienija bajałasia kinuć praz składanyja ijerohlify. A voś z karejskaj zorki syšlisia.

• 20
• 3
• 4
• 1
• 0
• 1
• 0
• 0