Kir Starmier raskazaŭ, jakaja hałoŭnaja misija šmatnacyjanalnych sił zapeŭnieńnia, jakija sprabujuć sfarmavać Vialikabrytanija i Francyja, piša Bi-bi-si.
«Ja nie daviaraju Pucinu. — Ja ŭpeŭnieny, što Pucin pasprabuje nastajać na tym, kab Ukraina paśla damovy zastałasia biezabaronnaj, tamu što heta daść jamu toje, čaho jon choča, a mienavita mahčymaść zajści [va Ukrainu] znoŭ».
Pasłańnik Donalda Trampa Styŭ Uitkaf u dvuch intervju na hetym tydni skazaŭ, što jon daviaraje Pucinu, nie vieryć u jaho imknieńnie zavajavać Jeŭropu, a jeŭrapiejskija lidary, takija jak Starmier, imknucca vystaŭlać siabie jak «Čerčyli». Heta prahučała jak čarhovaje śviedčańnie narastańnia supiarečnaściaŭ pamiž ZŠA pry Trampie i ich jeŭrapiejskimi sajuźnikami.
Ale Starmier zajaviŭ, što Vialikabrytanija nie budzie vybirać pamiž ZŠA i Jeŭropaj, i taksama zhadaŭ Čerčyla.
«Šmat chto zaklikaje nas vybrać pamiž ZŠA i Jeŭropaj. Čerčyl hetaha nie rabiŭ. Ettli hetaha nie rabiŭ. Na moj pohlad, było b vialikaj pamyłkaj rabić vybar ciapier», — skazaŭ Starmier. Uzhadany im Klemient Ettli, lejbaryst, jak i Starmier, pryjšoŭ da ŭłady ŭ Vialikabrytanii na pieršych vybarach paśla Druhoj suśvietnaj vajny, jakija Čerčyl prajhraŭ. Urad Ettli aktyŭna ŭdzielničaŭ u stvareńni NATO, a taksama stvaryŭ u Vialikabrytanii sistemu biaspłatnaj achovy zdaroŭja.
Prykładam padychodu Starmiera da «asablivych adnosinaŭ» z ZŠA pry Trampie stała toje, što jon rabiŭ paśla skandału ŭ Biełym domie padčas vizitu tudy Uładzimira Zialenskaha 28 lutaha. U toj momant, skazaŭ brytanski premjer, mnohija zaklikali jaho adkryta padtrymać Zialenskaha i asudzić Trampa. «Ja paličyŭ, što lepš padniać telefonnuju słuchaŭku, pahavaryć z abodvuma bakami i pasprabavać ich prymiryć», — cytuje Starmiera hazieta.
Nie abmiažoŭvajučysia hetym, Starmier nakiravaŭ u Kijeŭ svajho daradcu pa nacyjanalnaj biaśpiecy Džonatana Paŭeła, kab navučyć Zialenskaha, jak naładzić adnosiny z Trampam.
Na niekalkich siesijach, raskazali dva vysokapastaŭlenyja brytanskija čynoŭniki, jany prydumali farmuloŭki dla taho, kab źmiakčyć tryvohu Zialenskaha z nahody spynieńnia ahniu, u jakim rasijanie praciahnuć stralać.
Ciapier čytajuć
Hety biełarus daśleduje rak — voś što jon kaža pra SPF ad miełanomy, navukovy prahres i samy składany ŭ lačeńni rak3
Kamientary