ZŠA ŭpieršyniu ŭviali sankcyi suprać Kitaja za kuplu padsankcyjnaj nafty
Administracyja Donalda Trampa ŭpieršyniu pakarała Kitaj za nabyćcio nafty, jakaja znachodzicca pad amierykanskimi sankcyjami. U čaćvier Ministerstva finansaŭ ZŠA ŭklučyła ŭ čorny śpis niezaležny kitajski NPZ za toje, što jon kuplaŭ u Irana paliva, jakoje da taho ž było źviazana z vajskoŭcami i terarystami. Hetaja miera moža rykašetam udaryć i pa pastaŭkach rasijskaj nafty, piša The Moscow Times.
Kampanija Shandong Shouguang Luqing Petrochemical z pravincyi Šańdun stała pieršym NPZ u krainie, jaki Vašynhton pakaraŭ za kuplu nafty ŭ Irana nasupierak raniej uviedzienym amierykanskim sankcyjam.
Shandong Shouguang Luqing zakupiła miljony barelaŭ na sumu kala 0,5 miljarda dalaraŭ, zajaviŭ amierykanski Minfin. Jana atrymlivała naftu, jakaja pieravozicca sudami cieniavoha fłotu, niekatoryja ź jakich trapili pad sankcyi za ich rolu ŭ zabieśpiačeńni jemienskich chusitaŭ, jakich u ZŠA ličać terarystyčnaj arhanizacyjaj. Akramia taho, hetaja nafta źviazanaja ź iranskimi ŭzbrojenymi siłami i Korpusam vartavych isłamskaj revalucyi.
Hiendyrektar kitajskaj kampanii taksama ŭklučany ŭ čorny śpis.
Heta ŭžo čaćviorty raŭnd sankcyj, pryniatych z taho času, jak prezident ZŠA Donald Tramp 4 lutaha abviaściŭ pra kampaniju pa akazańni maksimalnaha cisku na Iran zychodziačy ź mierkavańniaŭ nacyjanalnaj biaśpieki.
Dla hetaha Vašynhton imkniecca abmiežavać prodažy iranskaj nafty, u tym liku kab prymusić Tehieran admovicca ad prahramy jadziernaha ŭzbrajeńnia.
Amierykanskija sankcyi, choć i ŭviedzienyja za apieracyi ź iranskaj naftaj, mohuć paŭpłyvać i na rasijskija pastaŭki.
Pravincyja Šańdun, dzie raźmieščany i Shandong Shouguang Luqing Petrochemical, źjaŭlajecca centram naftapierapracoŭki dla pryvatnych kitajskich kampanij. Jany aktyŭna skuplali rasijskuju naftu da niadaŭniaha času, choć jaje patok skaraciŭsia paśla maštabnych sankcyj suprać rasijskaj naftavaj haliny i cieniavoha fłotu, jakija 10 studzienia ŭviała administracyja Džo Bajdena.
Nieviadoma, ci nabyvała Shandong Shouguang Luqing rasijskuju pradukcyju apošnim časam, ale raniej jana hetaja rabiła — miž inšym, atrymlivała hruzy z Rasii padčas pandemii kavidu, kali ceny na naftu ŭpali paśla taho, jak Kitaj pačaŭ abviaščać łakdaŭny praz raspaŭsiud karanavirusu.
Ciapier čytajuć
«Heta była žyvaja kamiera sačeńnia». Što rabiła viciablanka Kaciaryna, kab vyzvalicca praz 5 hadoŭ zamiest prysudžanych 12 hadoŭ5
Kamientary