Mienš za miesiac tamu śpiecpradstaŭnik Biełaha doma cisnuŭ ruku i ŭśmichaŭsia prezidentu Vieniesueły. Šmat chto pabačyŭ u tym vizicie maŭklivaje pryznańnie zakonnaści hetaha režymu. Adnak nie prajšło i miesiaca, jak administracyja Trampa zrazumieła, što ničoha nie dabiłasia. I syn prezidenta ŭžo zapisaŭ padkast ź lidarkaj vieniesuelskaj apazicyi.
Jak adznačaje The Wall Street Journal, prezident ZŠA Donald Tramp abjaviŭ pra admienu licenzii, vydadzienaj pry Bajdenie, jakaja dazvalała amierykanskaj naftavaj kampanii Chevron vieści zdabyču nafty ŭ Vieniesuele. Pa słovach Trampa, režym Nikałasa Madury nie vykanaŭ abaviazacielstvy pa pryjomie departavanych mihrantaŭ i nie pravioŭ demakratyčnych reformaŭ.
Rašeńnie Trampa adklikać licenziju stała razvarotam u palitycy jaho administracyi, jakaja na praciahu apošniaha miesiaca rabiła sproby zbližeńnia z Karakasam.
Jano taksama źjaŭlajecca surjoznym udaram dla Chevron, jakaja atrymała ŭ 2022 vyklučeńnie z sankcyj ZŠA. Tramp nie zhadaŭ kampaniju naŭprost, ale ŭ sacyjalnaj sietcy Truth Social abviaściŭ ab admienie licenzii ad 26 listapada 2022 hoda, kali Chevron atrymała dazvoł na pracu ŭ Vieniesuele.
Tramp padkreśliŭ, što z 1 sakavika licenzija Chevron budzie anulavana, i kampanii daviadziecca pastupova zharnuć svaju dziejnaść u krainie. Paźniej dziaržaŭny sakratar Marka Rubia zajaviŭ, što ŭ adpaviednaści z rasparadžeńniem prezidenta jon admianiaje ŭsie naftahazavyja licenzii, vydadzienyja pry Bajdenie, pakolki jany «finansavali nielehitymny režym Madury».
Rašeńnie Trampa źjaviłasia amal praź miesiac paśla taho, jak staršy pasłańnik Biełaha doma Ryčard Hreneł pravioŭ sustreču z Maduram u Karakasie, sprabujučy damovicca ab adnaŭleńni departacyjnych rejsaŭ u Vieniesuełu. Mnohija analityki tady mierkavali, što heta pahadnieńnie pryviadzie da praciahu naftavaha supracoŭnictva, ale administracyja Trampa pajšła ŭ inšym kirunku.
Vizit Hreneła, jaki z uśmieškaj paciskaŭ ruku Madura ŭ jaho prezidenckim pałacy, byŭ uspryniaty jak maŭklivaje pryznańnie Madury ŭ jakaści zakonnaha lidara Vieniesueły. Pieramovy tyčylisia departacyi socień tysiač nielehalnych mihrantaŭ z ZŠA ŭ Vieniesuełu — tema nielehalnych mihrantaŭ heta kaniok Trampa.
Adnak Tramp u vyniku zajaviŭ, što Madura nie vykonvaje pahadnieńnia — u pryvatnaści, nie pryniaŭ nazad vieniesuelskich złačyncaŭ z hrupoŭki Tren de Aragua, jakaja abvinavačvajecca ŭ hučnych złačynstvach u ZŠA. Tramp taksama zhadaŭ, što režym Madura, nasupierak svaich abiacańniam Bajdenu, nie pravioŭ svabodnych vybaraŭ.
Rašeńnie ab adklikańni licenzii supała z momantam, kali Donald Tramp-małodšy zapisvaŭ padkast ź lidarkaj vieniesuelskaj apazicyi Maryjaj Karynaj Mačada, jakaja chavajecca ŭ Vieniesuele. Jana nazvała hety krok dokazam padtrymki Trampam vieniesuelskaha naroda i zajaviła, što heta nablizić krainu da demakratyčnych reform.
Admiena licenzii na zdabyču amierykanskaj kampanijaj nafty — surjozny ŭdar pa ekanomicy Madury. Adnaŭleńnie zdabyčy Chevron było klučavym faktaram u vyžyvańni vieniesuelskaj ekanomiki, zabiaśpiečvajučy prytok zamiežnaj valuty.
Źnižeńnie ekspartu nafty abmiažuje jaho finansavyja resursy. U toj ža čas skaračeńnie pastavak vieniesuelskaj nafty moža paŭpłyvać na ceny syraviny na suśvietnym rynku.
Analityki ličać, što Tramp vykarystoŭvaje hety krok, kab nacisnuć na Maduru z metaj damahčysia palityčnych sastupak, u tym liku vyzvaleńnia palitviaźniaŭ i praviadzieńnia sumlennych vybaraŭ.
U toj ža čas rašeńnie Biełaha doma ŭzmacnić cisk na Maduru moža być nie tolki zamiežnapalityčnym krokam, ale i častkaj unutrypalityčnaj stratehii. Uzmacniajučy strohaść sankcyj suprać Vieniesueły administracyja Trampa moža raźličvać na padtrymku respublikancaŭ u Kanhresie pa pytańniach biudžetu.
Kansiervatyŭnyja zakanadaŭcy Fłarydy, dzie pražyvaje ŭpłyvovaja vieniesuelskaja dyjaspara, jakaja vystupaje suprać Madury, patrabujuć ad ZŠA viarnucca da tak zvanaj stratehii maksimalnaha cisku na režym Madury.
Ciapier čytajuć
Zakinutuju siadzibu Bahdanovičaŭ pierarobiać u bucikovy hatel FOTY6
Kamientary