Адміністрацыя Дональда Трампа ўпершыню пакарала Кітай за набыццё нафты, якая знаходзіцца пад амерыканскімі санкцыямі. У чацвер Міністэрства фінансаў ЗША ўключыла ў чорны спіс незалежны кітайскі НПЗ за тое, што ён купляў у Ірана паліва, якое да таго ж было звязана з вайскоўцамі і тэрарыстамі. Гэтая мера можа рыкашэтам ударыць і па пастаўках расійскай нафты, піша The Moscow Times.
Кампанія Shandong Shouguang Luqing Petrochemical з правінцыі Шаньдун стала першым НПЗ у краіне, які Вашынгтон пакараў за куплю нафты ў Ірана насуперак раней уведзеным амерыканскім санкцыям.
Shandong Shouguang Luqing закупіла мільёны барэляў на суму каля 0,5 мільярда даляраў, заявіў амерыканскі Мінфін. Яна атрымлівала нафту, якая перавозіцца судамі ценявога флоту, некаторыя з якіх трапілі пад санкцыі за іх ролю ў забеспячэнні еменскіх хусітаў, якіх у ЗША лічаць тэрарыстычнай арганізацыяй. Акрамя таго, гэтая нафта звязаная з іранскімі ўзброенымі сіламі і Корпусам вартавых ісламскай рэвалюцыі.
Гендырэктар кітайскай кампаніі таксама ўключаны ў чорны спіс.
Гэта ўжо чацвёрты раўнд санкцый, прынятых з таго часу, як прэзідэнт ЗША Дональд Трамп 4 лютага абвясціў пра кампанію па аказанні максімальнага ціску на Іран зыходзячы з меркаванняў нацыянальнай бяспекі.
Для гэтага Вашынгтон імкнецца абмежаваць продажы іранскай нафты, у тым ліку каб прымусіць Тэгеран адмовіцца ад праграмы ядзернага ўзбраення.
Амерыканскія санкцыі, хоць і ўведзеныя за аперацыі з іранскай нафтай, могуць паўплываць і на расійскія пастаўкі.
Правінцыя Шаньдун, дзе размешчаны і Shandong Shouguang Luqing Petrochemical, з'яўляецца цэнтрам нафтаперапрацоўкі для прыватных кітайскіх кампаній. Яны актыўна скуплялі расійскую нафту да нядаўняга часу, хоць яе паток скараціўся пасля маштабных санкцый супраць расійскай нафтавай галіны і ценявога флоту, якія 10 студзеня ўвяла адміністрацыя Джо Байдэна.
Невядома, ці набывала Shandong Shouguang Luqing расійскую прадукцыю апошнім часам, але раней яна гэтая рабіла — між іншым, атрымлівала грузы з Расіі падчас пандэміі кавіду, калі цэны на нафту ўпалі пасля таго, як Кітай пачаў абвяшчаць лакдаўны праз распаўсюд каранавірусу.
Цяпер чытаюць
Пасля беларускай вёскі Шнайдэраў больш не бянтэжыць пытанне ЛГБТ. Сям'я з Германіі, якая стала героямі прапаганды, вяртаецца ў ЕС27
Каментары