Cichanoŭskaja pra prapahandyscki film BT: My nikoli nie budziem ryzykavać ludźmi
Demakratyčnaja lidarka prakamientavała prapahandyscki film «Čužoje nieba», prademanstravany ŭčora, i padman ludziej dla jaho stvareńnia.
«Toje, što adbyvajecca, — aburalna. Vykarystoŭvać ludziej va ŭraźlivym stanie, jakija davierylisia znajomym ci «žurnalistam» u spadziavańni atrymać dapamohu, i pieratvaryć ich historyi ŭ instrumient prapahandy — heta čarhovaje śviedčańnie taho, što režym abyjakavy da čałaviečaha žyćcia. Ludzi, jakija apynulisia ŭ ciažkich umovach mienavita z-za režymu, zasłuhoŭvajuć padtrymki i razumieńnia, a nie vykarystańnia dla «karcinki» pra toje, jak «drenna» ŭciekačam. Ciažka ŭjavić, što adčuli hieroi hetaha filma, kali pabačyli, što ich słovy, jakija zapisvalisia nibyta dla atrymańnia padtrymki, apynulisia na ekranie dziaržaŭnaha telebačańnia», — zaznačyła Śviatłana Cichanoŭskaja.
«Niekatoryja hieroi kažuć, što zdymki vialisia nibyta ad imia Ofisa Śviatłany Cichanoŭskaj. Ale my nikoli nie budziem ryzykavać ludźmi. Usie inicyjatyvy, jakija iduć ad našaha Ofisa abo pry našym sadziejničańni, abaviazkova prytrymlivajucca ŭsich pryncypaŭ biaśpieki: maja kamanda nie zhadvaje imiony biez zhody i nie dzielicca ni z kim vašymi piersanalnymi danymi», — dadała jana.
Palityk zaklikaje być pilnymi, a kali brać udzieł u apytańniach, intervju ci prajektach dapamohi — udakładniać, z kim majecie spravu.
«Źviartajciesia da redakcyjaŭ, kab pravieryć žurnalista, ź jakim kamunikujecie. Nie saromiejciesia kazać «nie», kali niešta vyklikaje sumnieŭ. Bieražycie siabie, raskazvajcie inšym pra nieabchodnyja miery biaśpieki i nie dazvalajcie nikomu vykarystoŭvać vašuju davierlivaść», — zaznačyła Śviatłana Cichanoŭskaja.
Kamientary