Pad Viciebskam instruktary PVK «Vahnier» trenirujuć afrykanskich bajcoŭ kiravać dronami
Pra heta paviedamiła francuzskaje vydańnie Intelligence Online sa spasyłkaj na krynicy ŭ Varšavie. Publikacyju zaŭvažyŭ Reform.by.
Słužba vajennaj vyviedki Polščy zaniepakojenaja rostam kolkaści navučalnych kursaŭ pa viadzieńni bajavych dziejańniaŭ z dapamohaj bieśpiłotnikaŭ, jakija pravodziacca instruktarami PVK «Vahnier» u Viciebsku, piša Intelligence Online.
Pavodle infarmacyi vydańnia, kožny miesiac centr pad Viciebskam prymaje na navučańnie zamiežnych vajskoŭcaŭ z Afryki. Apošnimi ŭdzielnikami kursaŭ, jakija zaviaršyli padrychtoŭku ŭ kancy lutaha, stali bajcy 36-ha bataljona śpiecyjalnaha pryznačeńnia Livijskaj nacyjanalnaj armii pad kamandavańniem Chalify Chaftara.
Niekalki dzion tamu na aeradromie ŭ Viciebsku źjaviŭsia jaho syn sadam Chaftar, a razam ź im — Rusłan Čłalan, viadomy pad pazyŭnym «Radzimir», jaki kuryruje apieracyi PVK «Vahnier» u Livii ad imia Maskvy. Jany prybyli dla nazirańnia za vajennymi manieŭrami ŭ trenirovačnym łahiery.
Čakajecca, što najbližejšym časam na anałahičny kurs prybuduć vajskoŭcy z Mali. Varšava vykazvaje zaniepakojenaść raspaŭsiudžvańniem takich viedaŭ i sprabuje papiaredzić sajuźnikaŭ pa NATA.
Kursy prachodziać u žorstka strukturavanym farmacie: na praciahu troch tydniaŭ udzielniki asvojvajuć asnovy kiravańnia taktyčnymi raźviedvalnymi i ŭdarnymi dronami Autel Robotics Evo II i DJI Mavic 3 Pro, a taksama vyvučajuć mietady prymianieńnia kamplektaŭ dla skidu bojeprypasaŭ.
Častka prahramy pryśviečana zborcy bieśpiłotnikaŭ FPV z vykarystańniem 3D-pryntaraŭ, prahramavańniu bartavoha PA, kiravańniu latalnymi aparatami i prymianieńniu supraćpiachotnych i procitankavych zaradaŭ.
Palihon pad Viciebskam uklučaje razhalinavanuju sietku tranšej i spalenuju braniatechniku — umovy, nabližanyja da tych, što jość na poli boju va Ukrainie.
Udzielniki prachodziać i kurs pa baraćbie ź bieśpiłotnikami, vykarystoŭvajučy sistemy radyjoelektronnaha padaŭleńnia SERP-VS6D, pastaŭlenyja Rasijskaj dziaržkarparacyjaj «Rostiech».
U červieni 2023 hoda Łukašenka damoviŭsia z PVK «Vahnier» ab tym, kab pryniać ich u Biełarusi. Z tych časoŭ polskaja vyviedka zaniepakojena aktyŭnaściu bajevikoŭ. Śpiecsłužby pa vyviedcy i Ahienctva ŭnutranaj biaśpiecy aścierahajucca, što členy PVK mohuć być uciahnutyja ŭ dyviersijnuju dziejnaść i inšyja tajemnyja apieracyi, nakiravanyja suprać Polščy.
Ciapier čytajuć
«Moža, bajaŭsia zastavacca ŭ šlubie sa mnoj, bo pracuje na BT». Nastaŭnica, jakaja źjechała praz danosy Bondaravaj, raspaviała pra razvod i žyćcio ŭ emihracyi4
Kamientary