Adny ŭ ejfaryi, druhija ŭ rospačy. Z-kanały padzialilisia ŭ acenkach sustrečy ŭ Er-Ryjadzie
Rasijskaja prapahanda jašče nie viedaje, ci vieryć Trampu.
Pieramovy ŭ Er-Ryjadzie nie zastalisia biez uvahi Z-vajenkaraŭ.
Dźmitryj Sielaźnioŭ u telehram-kanale WarGonzo adznačaje, što «achviarnym kazłom vybrany Zialenski», dni jakoha źličany, pradrakaje padzieł Ukrainy i maluje vobraz słaboj i biazvolnaj Jeŭropy.
«Miarkujučy pa zajavach Trampa paśla sustrečy rasijskich i amierykanskich delehacyj u Saudaŭskaj Aravii, abrany achviarny kazioł — heta Zialenski. (…) Dni jaho paličanyja. Jak i paličanyja dni Ukrainy, narodžanaj u 90-ja, budzie jaje pieršy padzieł. I tut Amieryka nachabna adsoŭvaje niaśmiełuju inkluziŭnuju Jeŭropu, Tramp prahna raziaŭlaje rot i patrabuje 50% ukrainskich resursaŭ».
Aŭtar adznačaje što Rasii vyhadna zaciahvańnie kanfliktu, bo heta moža pryvieści da jašče bolšaha zachopu terytoryi: «Rasii vyhadniej, kab hetaja błytanina i pierapałoch u stanie vorahaŭ praciahvalisia daŭžej, kab finansavańnie Ukrainy z boku ZŠA spyniłasia, kab, narešcie, abrynulisia franty. Tak što budučyja aficyjnyja rasijskija miežy vielmi tumannyja».
A voś aŭtar telehram-kanała Fighterbomber nie chavaje svajho rasčaravańnia:
«Dobra, što ja ŭ hetym ničoha nie razumieju, ale takimi tempami my mirnuju damovu pabačym vielmi-vielmi nie chutka».
Aŭtar telehram-kanała ColonelCassad padkreślivaje, što istotnyja źmieny ŭ kanflikcie pakul niemahčymyja. A fakt praviadzieńnia pieramoŭ ab Ukrainie biez Ukrainy zusim nie aznačaje, što ZŠA źbirajucca iści na sastupki Rasii:
«Niekatoryja naiŭnyja ludzi čakali niejkich praryvaŭ ad pieršaha raŭnda pieramoŭ u Er-Ryjadzie. Jašče treba prajści pramym pieramovam kiraŭnikoŭ CRU / SZR (Słužby zamiežnaj raźviedki — NN), jašče pavinna adbycca pieršaja sustreča Trampa i Pucina + ennaja kolkaść kułuarnych kantaktaŭ. Vajna ŭ lubym vypadku budzie praciahvacca až da padpisańnia jakichści značnych damoŭlenaściej, jakich na dadzieny momant niama i jakija raniej sustrečy Trampa i Pucina dakładna nie źjaviacca. Sam fakt pieramoŭ pra Ukrainu biez Ukrainy, užo sam saboju značny, što razumiejuć usie ŭdzielniki, ale heta zusim nie aznačaje, što ZŠA źbirajucca iści nam na sastupki».
Ź im salidarny i aŭtar telehram-kanała «Rybar», jaki nazyvaje pieramovy ŭ Er-Ryjadzie «pieršaj viachoj bolš bujnych pierahavoraŭ». U toj ža čas jon źviartaje ŭvahu na toje, što hetaja padzieja prademanstravała, što «dvuchbakovyja kansultacyi pa roznych linijach buduć praciahvacca. A formuła «ničoha pra Ukrainu biez Ukrainy» ščaśliva zabytaja».
Aŭtar telehram-kanała «Staršie Eddy» zaŭvažaje, što narmalizacyja adnosin z ZŠA patrebna, ale nieabchodna pamiatać, što nastupny prezident moža zaniać supraćlehłuju pazicyju:
«Nichto nie spračajecca, što narmalizacyja adnosin i stratehičnaja stabilnaść z ZŠA nieabchodnaja. Nie žyćciova nieabchodnaja, ale dakładna nie pieraškodzić, praŭda, u hetaj stabilnaści jość niekalki pieramiennych i samaja asnoŭnaja ź ich, heta admiena dziejańniaŭ papiaredniaj administracyi Biełaha doma.
Vyznačać adnosiny z Amierykaj možna tolki na pieryjad kadencyi dziejnaha prezidenta, nastupny moža zaniać dyjamietralna supraćlehłuju pazicyju i zajavić, što vy pra ŭsio damaŭlalisia z papiaredniaj administracyjaj, ja da hetaha staŭleńnia nie maju».
Jašče bolš piesimistyčny ŭ acenkach aŭtar telehram-kanała «Živov Z». Jon śćviardžaje, što «pieramovy buduć iści jašče doŭha, i nie fakt, što zakončacca zaviaršeńniem kanfliktu». Vajenkar źviartaje ŭvahu, što ES hatovy dapamahać Ukrainie adstajać svaju niezaležnaść.
«Pakul Rasija šukaje dyjałohu z ZŠA, ES uvodzić 16-y pakiet sankcyj, jaki pavinien maksimalna baluča ŭdaryć pa našym enierhietyčnym siektary i syravinnym eksparcie. (…) Pakul hałoŭnaje pytańnie takoje: ci advažycca Jeŭropa vajavać z nami biez padtrymki ZŠA. Pakul usio idzie da hetaha», — piša aŭtar.
Kamientary