Tur zajaviŭ, što marš u Varšavie z drona zdymali łukašenkaŭcy. Akazałasia, jany padmanuli polskaha apieratara
Viadučy ANT Ihar Tur u prahramie, pryśviečanaj akcyjam biełaruskaj dyjaspary za miažoj, pakazaŭ videa z drona ŭ Varšavie i zajaviŭ, što rolik źniali jaho adnadumcy. Jak vyśvietliła «Jeŭraradyjo», jon schłusiŭ.
Ihar Tur zajaviŭ, što prapahandysty «sami zdymali» marš biełaruskaj dyjaspary ŭ Varšavie 26 studzienia z kvadrakoptara. Videa akcyi z vyšyni ptušynaha palotu raźlaciełasia pa mnohich pablikach i ŚMI.
U paćvierdžańnie svaich słoŭ Tur pakazaŭ fatahrafii pulta kiravańnia dronam z tymi samymi kadrami.
«Viedajučy počyrk svaich miedyjnych apanientaŭ, jany buduć dakazvać, što my skrali zychodniki. Heta haniebna, viadoma, dla źbiehłych. Ale chaj by jany padumali krychu ŭ inšym kirunku. Moža, my nie skrali, a sami jaho i źniali, i vam łaskava dali, zhulaŭšy vami ŭ patrebny nam bok», — zajaviŭ Tur.
Jak akazałasia, prapahandyst skazaŭ niapraŭdu. Kab atrymać zapisy, łukašenkaŭcy padmanuli polskaha apieratara.
Videa zdymaŭ polski apieratar Rafał Hanoŭski. Jon raskazaŭ, što pierad maršam ź im źviazalisia ad imia adnoj z arhanizacyj, jakaja nibyta pracuje sa Śviatłanaj Cichanoŭskaj.
Užo paźniej, kali jon zdymaŭ marš, Hanoŭskaha spytali, ci znachodzicca jon na miescy — u adkaz jon adpraviŭ fota pulta ad koptara. Hetyja zdymki paśla i pakazali na ANT.
«Videa apublikavała Cichanoŭskaja, i jano šyroka razyšłosia. Dumaju, heta nie toje, čaho prapahandysty chacieli. Ja zdymaŭ materyjał ad usioj dušy, i atrymałasia pryhoža», — raspavioŭ Hanoŭski.
26 studzienia biełarusy prajšli maršam pa centry Varšavy ŭ znak pratestu suprać čarhovaha pierapryznačeńnia Łukašenki. Pa vulicach polskaj stalicy pranieśli 330-mietrovy bieł-čyrvona-bieły ściah.
Kamientary