Tur: Biełaruskija śpiecsłužby buduć padtrymlivać «apazicyju da apazicyi»
Spryjańnie budzie «ad miedyjnaha da apieratyŭnaha», abiacaje źviazany sa śpiecsłužbami prapahandyst.
Prapahandyst Ihar Tur napisaŭ post, u jakim zaachvočvaje apazicyjanieraŭ u vymušanaj mihracyi da supracoŭnictva. Najpierš jaho cikaviać zakliki źniać sankcyi z režymu.
«Taja apazicyja da apazicyi, jakaja adnosna ŭstojliva sfarmavałasia ŭ źbiehłych i maje namier inicyjavać publičnyja zakliki da ZŠA i ES źniać adnabakovyja złačynnyja sankcyi suprać Biełarusi ŭ jakaści razumnaha pieršaha kroku dla vybudoŭvańnia dyjałohu, — praciahvajcie svaju palityčnuju dziejnaść, vašu pracu bačać i aceńvajuć», — piša Tur.
Jon dadaje intryhi, kažučy, što takim ludziam, chto vystupaje suprać sankcyj, śpiecsłužby akazvajuć dapamohu.
«Vidavočna taksama (niekatoryja navat prosta ŭ kursie), što hetaj kaalicyi samavyhnańnikaŭ Radzima akazvaje sadziejničańnie, ad miedyjnaha da apieratyŭnaha. Miežy dla hetaha pracesu — naohuł nie prablema», — abiacaje jon.
Prapahandyst kaža, što intaresy tych, chto vystupaje suprać sankcyj, «sychodziacca ŭ punkcie, što bandu / siektu, jakaja vyprošvaje sankcyi suprać Biełarusi ci chacia b prosić dziejnyja sankcyi nie zdymać, — treba hasić. Nie fizična, samo saboj», — sa śpiecyfičnym humaram kaža Tur.
Na siońnia isnujuć dźvie asnoŭnyja hrupy, jakija rezka krytykujuć Śviatłanu Cichanoŭskuju i Paŭła Łatušku i vystupajuć za biezumoŭnaje źniaćcie sankcyj z łukašenkaŭcaŭ.
Adna składajecca ź Zianona Paźniaka i Paŭła Usava, jakija ŭtvaryli ruch «Volnaja Biełaruś».
Inšaja hurtujecca vakoł aktyvistaŭ byłoha štaba Viktara Babaryki i arhkamiteta partyi «Razam». Da ich naležać Ivan Kraŭcoŭ i Anton Radniankoŭ, a taksama siastra Maryi Kaleśnikavaj Taćciana Chomič.
Suprać Cichanoŭskaj vystupaje taksama koła «Chartyi» i takija asoby, jak Valer Capkała i Dźmitryj Bałkuniec, ale ŭ pytańni sankcyj jany zajmajuć najbolš radykalnuju pazicyju i vystupajuć za samyja rašučyja mietady ŭździejańnia.
Ciapier čytajuć
65‑hadovaha hamielčuka asudzili za sprobu dyviersii na čyhuncy i zdradu dziaržavie. Što viadoma?1
Kamientary
Jeśli by tak było na samom diele, oni by pro eto nie hovorili v słuch.