U kancy śniežnia rasijski prapahandyst Tyhran Kieasajan pieražyŭ kliničnuju śmierć i ŭpaŭ ŭ komu.
Jaho žonka, taksama prapahandystka Marharyta Simańjan siońnia paviedamiła, što Kieasajanu pakul nie stała lepiej.
«Na žal, mnie niama čaho paviedamić. Stan raniejšy. Naš lubimy śpić, a my ź dziećmi i abiedźviuma našymi mamami čakajem», — napisała Simańjan u svaim telehram-kanale.
Tyhranu Kieasajanu 59 hadoŭ. Z 2016 hoda jon viadzie na telekanale NTV viačerniaje zabaŭlalnaje satyryčnaje šou «Mižnarodnaja piłarama», praź jakoje pravodzić usie asnoŭnyja rasijskija prapahandysckija naratyvy.
28 lutaha 2022 hoda, paśla ŭvarvańnia Rasii va Ukrainu, Tyhran Kieasajan byŭ uklučany ŭ sankcyjnyja śpisy Jeŭrapiejskaha sajuza za padtrymku palityki, jakaja padryvaje terytaryjalnuju cełasnaść Ukrainy i pahražaje jaje niezaležnaści i suvierenitetu. Pavodle arhumientacyi, u svajoj prahramie Kieasajan «paśladoŭna adlustroŭvaŭ Ukrainu jak słabuju i karumpavanuju krainu, jakaja trymałasia tolki dziakujučy dapamozie Zachadu… Jon mierkavaŭ, što ŭkrainskija ŭłady nielehitymnyja. Jon nieadnarazova śćviardžaŭ, što Krym naležyć Rasii i što Danbas nie častka Ukrainy».
Paśla taho Tyhrana Kieasajana ŭnosili ŭ sankcyjnyja śpisy mnohich krain, u tym liku i za padtrymku poŭnamaštabnaj vajny va Ukrainie.
Z Marharytaj Simańjan Kieasajan aficyjna pabraŭsia šlubam u 2022 hodzie, ale faktyčna jany žyli razam z 2012-ha, majučy troch ahulnych dziaciej.
Viadoma, što raniej Kieasajan pieranios dva infarkty. Adbyłosia heta ŭ 2008 i 2010 hadach.
Kamientary