Praz sankcyi prodažy novych aŭto ŭ Biełarusi rekordnyja za apošnija piać hadoŭ
Sankcyjny cisk z boku Jeŭrasajuza dapamoh prodažam aficyjnych aŭtadyleraŭ — vynikaje sa statystyki, apublikavanaj Biełaruskaj aŭtamabilnaj asacyjacyjaj.
Prahnozy, jakija nie spraŭdzilisia
Paśla abvału prodažaŭ u 2022—2023 hadach u Biełaruskaj aŭtamabilnaj asacyjacyi (BAA) mierkavali, što ŭ 2024 hodzie prodažy vyrastuć. Adnak, jak pakazała statystyka, ich padliki akazalisia zanadta ścipłymi.
Spačatku ŭ BAA prahnazavali, što ŭ 2024 hodzie rynak dasiahnie i, mahčyma, pieravysić płanku ŭ 35 tysiač realizavanych novych aŭtamabilaŭ.
Ale naviny z Zachadu, a mienavita novyja abmiežavańni na ekspart aŭtamabilaŭ ź Jeŭropy ŭ Biełaruś, prymusili ekśpiertaŭ dvojčy pierahladać prahnoz u bok pavieličeńnia.
Užo pa vynikach 8 miesiacaŭ aficyjnym dyleram udałosia realizavać amal 30 tysiač aŭto.
Pa kastryčnickim prahnozie, prodažy novych mašyn (tolki lehkavych aŭto) pavinny byli skłaści 45-48 tysiač adzinak. Ale ŭ realnaści akazałasia jašče bolš.
Što ŭ vyniku?
«Naša Niva» padličyła hadavyja ličby na padstavie štomiesiačnych spravazdač ad asacyjacyi.
Za pieryjad sa studzienia pa žnivień prodažy lehkavych aŭto i lohkaha kamiercyjnaha transpartu skłali 29 987 adzinak.
Ź vieraśnia pa listapad apublikavanaja BAA statystyka achoplivała tolki lehkavyja aŭto, na jakija ŭ papiarednija miesiacy prychodziłasia ad 92 da 94% ad ahulnaj ličby prodažaŭ. Tamu, kab atrymać ahulnyja ličby prodažaŭ, my dadali siarednija 7% da ličbaŭ lehkavych mašyn, jakija pradali za try miesiacy vosieni.
Za śniežań jość poŭnaja statystyka.
Zhodna z padlikami, za 2024 hod dyleram udałosia realizavać kala 53 200 novych lehkavych aŭto razam ź lohkim kamiercyjnym transpartam.
Najlepšyja pakazčyki za apošnija 5 hadoŭ
Takim čynam atrymlivajecca, što prodažy novych aŭto ŭ 2024 hodzie pieravysili vyniki davajennaha 2021 hoda, kali było pradadziena 46 837 adzinak techniki. A taksama było realizavana bolš mašyn, čym u 2020-m ( 52 768 štuk) i 2019-m (52 835).
Vynikaje, što lepš, čym u 2024-m, spravy ŭ dyleraŭ išli tolki ŭ rekordnym 2019 hodzie, kali było pradadziena 64 504 novych aŭto.
Jakija jašče tendencyi naziralisia?
Lidaram rynku zastajucca ajčynnyja Geely i BelGee. Na ich prychodziłasia bolš za pałovu prodažaŭ novych lehkavych aŭto ŭ Biełarusi.
Raście popyt na elektramabili. Kali ŭ sakaviku na elektramabili prypadała kala 5% ad ahulnych prodažaŭ členami BAA, to ŭ śniežni hety pakazčyk dasiahnuŭ amal 8%.
Kala 2/3 prodažaŭ novych aŭto ŭ Biełarusi prypadaje na aŭtamabili kitajskich brendaŭ.
Ciapier čytajuć
Kiraŭnik Lidy zaklikaŭ siłavikoŭ nie spyniać palityčnych represij29
Kamientary