Pietycyju ab stvareńni horada Starbejs padali supracoŭniki kampanii SpaceX. Mer užo viadomy. U budučym horadzie pražyvaje kala 500 čałaviek, ź ich zvyš sotni — dzieci.
Razmovy pra toje, što Iłan Mask płanuje na bazie abščyny, raźmieščanaj pobač z bazaj Starbase (tam bazirujecca jaho kampanija pa zapusku rakiet SpaceX) stvaryć horad, stali realizoŭvacca na praktycy, piša The New York Times.
U hetym miesiacy supracoŭniki kampanii, jakija žyvuć na terytoryi adnajmiennaj abščyny kala bazy, nakiravali miascovym uładam aficyjnuju pietycyju z prośbaj pravieści vybary dla nadańnia joj statusu horada.
Abščyna Starbase raźmieščana na paŭdniovym uźbiarežžy Techasa, na plažy Boka Čyka, niedaloka ad miažy ź Mieksikaj. Zhodna ź pietycyjaj, nasielnictva Starbase składaje kala 500 čałaviek, ź jakich 219 — pastajannyja žychary, a taksama bolš za 100 dziaciej.
Praktyčna ŭsie žychary pracujuć u SpaceX ci majuć svajakoŭ, jakija pracujuć u hetaj kampanii. Bolšaść ź ich žyvie ŭ damach, jakija naležać kampanii i zhrupavany vakoł asnoŭnych budynkaŭ SpaceX. Na terytoryi znachodzicca jak minimum adzin restaran, jaki adkryty tolki dla supracoŭnikaŭ kampanii.
Płošča budučaha horada składaje kala 3,9 kvadratnaha kiłamietra, što trochi bolš za Centralny park u Ńju-Jorku.
U liście, prykładzienym da pietycyi, Ketryn Ljuders, hienieralny dyrektar SpaceX pa prajekcie Starbase, adznačyła: «Nam patrebna mahčymaść stvaryć Starbase jak supolnaść».
Jak jana tłumačyć, praz addalenaść Starbase kampanija SpaceX faktyčna vykonvaje funkcyi, jakija zvyčajna naležać miascovym uładam. Naprykład, jana kiruje kamunalnymi pasłuhami (vodazabieśpiačeńnie, elektryčnaść), a taksama arhanizuje adukacyju i miedycynskaje absłuhoŭvańnie dla rabotnikaŭ i ich siemjaŭ.
Stvareńnie horada dazvolić niekatoryja z hetych funkcyj pieradać u kiravańnie miascovym dziaržaŭnym orhanam, jakija zvyčajna zajmajucca takimi pytańniami, zamiest taho, kab ich vyrašała pryvatnaja kampanija.
Jak patłumačyŭ vydańniu advakat Ałan Bachorkies, jaki śpiecyjalizujecca na dapamozie ŭ prachodžańni jurydyčnych pracedur na šlachu da pryznańnia novaj administracyjnaj adzinki, aficyjnaje stvareńnie horada (inkarparacyja) daje supolnaści prava vybirać svaich miascovych kiraŭnikoŭ i stvarać haradskija sistemy žyćciezabieśpiačeńnia, naprykład, vodazabieśpiačeńnie.
Status horada dazvolić Starbejs atrymlivać dziaržaŭnyja i fiederalnyja hranty, mieć abaronu ad niekatorych vidaŭ sudovych iskaŭ i mahčymaść adbirać pryvatnuju ŭłasnaść dla hramadskich patreb.
Prapanavany Maskam novy horad moh by stvaryć ułasnyja słužby, takija jak palicyja i pažarnaja achova, a taksama prymać svaje miascovyja zakony. Ale apošniaje nieabaviazkova, bo, pa słovach advakata, harady pa zakonie abaviazanyja brać na siabie vielmi niašmat. Adnym z hałoŭnych praktyčnych pytańniaŭ, jakoje ŭvachodzić u kampietencyju haradskich uładaŭ, źjaŭlajecca absłuhoŭvańnie daroh.
Kali vybary buduć sankcyjanavanyja ŭładami, jany dazvolać vybarščykam prahałasavać za śpis z troch novych haradskich čynoŭnikaŭ, u tym liku pieršaha mera horada. U pietycyi havorycca, im budzie mieniedžar pa biaśpiecy SpaceX Hunar Miłbiern.
Žurnalisty NYT zaŭvažajuć, što žycharom novaha horada moža stać i sam Iłan Mask. Chacia jaho podpisu niama pad pietycyjaj, jon maje dom u akruzie Kamieron, dzie znachodzicca prajekt Starbase, i zajaviŭ, što prahałasavaŭ tam na prezidenckich vybarach u listapadzie.
Jak paviedamlaje vydańnie, Mask, vierahodna, nie abmiažujecca stvareńniem tolki adnaho novaha horada. Jon užo razhladaje mahčymaść budaŭnictva žyłych kompleksaŭ dla svaich supracoŭnikaŭ u rajonie, raźmieščanym niedaloka ad horada Bastrop, jaki znachodzicca ŭ štacie Techas, na poŭdzień ad stalicy štata, horada Ościn.
Tam raźmieščany zavod SpaceX, štab-kvatera kampanii Boring, jakaja zajmajecca raspracoŭkaj technałohii śvidravańnia tunelaŭ, a taksama chutka adkryjucca ofisy sacyjalnaj sietki X.
Ciapier čytajuć
Fiaduta rezka adkazaŭ Kaleśnikavaj: Za što vy zmahalisia ŭ 2020 hodzie, nie cikavić nikoha, akramia miadźviedziaŭ ź bierlinskaha zaaparka, jakija vas atačajuć4949
Kamientary