Jak tort, fota ŭ vańnie i śviatočny manikiur dapamahajuć raskryć zdradu? Siužety z žyćcia biełarusaŭ, jakim pazajzdrościła b Ahata Kryści

Historyja dziaŭčyny, jakaja vypadkova raskryła niaviernaść čužoha muža praz svoj vodhuk na sumačku, uraziła šmat kaho. My sabrali jašče niekalki siužetaŭ vypadkovaha raskryćcia zdrady.

…vodhuki

— Vyrašyła niejak pierad Novym hodam nabyć sabie pryhožuju bializnu — płanavali z mužam ramantyku. Zajšła ja na staronku adnaho davoli nie tannaha brenda, pačała hladzieć fotavodhuki, što i jak na žančynach siadzić. I raptam pabačyła dziaŭčynu, jakaja sfatahrafavałasia ŭ majoj vańnie. Tam navat nabor majoj lubimaj kaśmietyki ŭ kadr trapiŭ. Na emocyjach skinuła mužu skrynšot. Jon spačatku kazaŭ, što heta nie našaja vanna — prosta padobnaja. Potym pačaŭ niešta brachać pra kalehu, jakaja pobač z našym domam abliłasia kavaj i paprasiłasia zajści, kab zamyć sukienku.

— U svoj dzień naradžeńnia muž prynios damoŭ šykoŭny tort (vidavočna, nie z kramy) byccam by ad kaleh. A praź niekalki dzion pabačyła zdymak taho torta ŭ instahramie kandytarki, jakaja jaho rabiła, z podpisam: «Klijentka zamoviła dla svajho kachanaha na dzień naradžeńnia».

— U mianie jość pastajannaja klijentka, jakaja zamaŭlaje ŭpryhožvańni. I vodhuki jana lubić pisać, zdymki dasyłaje. Karaciej, prosta mara luboj majstrychi. My ŭžo amal jak siabroŭki. Adnojčy jana dasłała mnie fota ź niejkaha śviata, kab čokier na sabie pakazać. Na fota jana siadzieła na kaleniach majho muža (jaho fota niama ŭ maim pracoŭnym akaŭncie), a jaho ruka była ŭ jaje amal što na hrudziach.

…storys

— Ja rabiła naroščanyja viejki ŭ adnoj majstrychi davoli doŭha. Potym tak atrymałasia, što zrabiła pierapynak prykładna na hod. I voś znoŭ vyrašyła viarnucca da hetaj pracedury. Zachodžu ŭ instahram majstrychi i baču, što ŭ jaje ŭ «viečnych storys» zamacavana «raman z mužam klijentki». Ciapier ža modna prasoŭvać svaje akaŭnty praz asabistyja historyi. A ja lublu čužyja dramy. Dumaju, kłas, zaraz pahladžu jak sieryjalčyk. Adkryvaju, čytaju, chichikaju. I voś na adnoj storys baču fota mužčyny — tvar zakryty smajlikam tyhra. Ale na im švedar i kurtka, jakija ja svajmu mužu ź Italii pryvoziła! Prycisnuła muža da ścienki — jon sprabavaŭ adniekvacca, ale ŭ vyniku pryznaŭsia.

— Ja daŭno žyvu ŭ inšaj krainie, ale letam pryjechała da baćkoŭ. Zajšła ŭ kaviarniu, zamoviła kavu, pačała zapisvać storys. A potym pierahladaju videa i baču, što za mnoj niejkija zakachanyja ledź nie ledź nie źjeli adno adnaho — tak užo całavalisia, što zdavałasia, što jany voś-voś zojmucca seksam na stale. Ja vykłała storys u svoj instahram (u mianie nievialiki akaŭnt tolki dla znajomych) i ŭ podpisy aburyłasia: «Jak tak možna siabie pavodzić u hramadskim miescy?!». Paskardziłasia siabroŭkam u naš čat i zabyłasia. A praź niekalki hadzin mnie pačynaje pisać aburany mužyk ź videa — vyśvietliłasia, što heta muž majoj adnakłaśnicy, jakaja ŭžo paśpieła jamu skandał zakacić.

— Niekalki hadoŭ tamu ciapier užo były muž majoj siabroŭki vykłaŭ storys fota z karparatyvu — kadr vidavočna byŭ abrezany, a na jaho plačy lažała žanočaja ruka z davoli prykmietnym manikiuram. Horad u nas nievialiki — my ź siabroŭkaj vyrašyli prahladzieć akaŭnty manikiurščyc. I ŭ adnym sapraŭdy znajšlisia ruki z takim manikiuram. Potym siarod łajkaŭ vyličyli dziaŭčynu, jakoj i zrabili toj manikiur. A ŭžo na jaje staroncy chapała ahulnych fotazdymkaŭ z čužym mužam.

…rekamiendacyi

— Try miesiacy sustrakałasia z chłopcam, jaki ŭ niejki momant adzin pajechaŭ u adpačynak. Pakul kachanaha nie było, instahram padsunuŭ akaŭnt niejkaj błohierki. Ja pačała hladzieć storys — i tak daviedałasia, što chłopiec u adpačynku zrabiŭ prapanovu ruki i serca toj samaj błohiercy.

— Ałharytmy sacsietki prapanavali mnie rolik adnaho davoli papularnaha błohiera, jaki padychodziŭ da paračak. Ja paznała na videa svajho muža, jaki išoŭ za ruku ź dziaŭčynaj, pra jakuju jon mnie šmat razoŭ kazaŭ, što jana «prosta kaleha».

…tyktok

— Na pracy byŭ zavał, treba było zastavacca amal da nočy, tamu muž pajšoŭ na kancert, pra jaki my daŭno maryli, bieź mianie. Praź dzień ci dva ja vyrašyła pahladzieć, jak usio prajšło, i pačała hartać roliki ŭ tyktoku. I voś u čarhovym videa dziaŭčyna pakazvaje, jak tančyć, a pobač ź joj moj muž horača całujecca z majoj ža siabroŭkaj.

…dziŭnyja pavodziny ŭ sacsietkach

— Zaŭvažyła, što z akaŭnta majho muža ŭ instahramie raptam źnikli našy sumiesnyja fota. Kaniečnie, spytała, što adbyvajecca. Toj pačaŭ kazać, byccam instahram ich sam vydaliŭ i navat pačaŭ pry mnie pisać skarhu ŭ słužbu padtrymki. Ja zrabiła vyhlad, što pavieryła. A sama nastupnyja niekalki miesiacaŭ pačała analizavać, kaho jon dadaŭ u siabry i chto jaho pačnie aktyŭna łajkać. Tak i vyjšła na dziaŭčynu, jakaja ŭ niejki momant pačała vykładać u storys fota i videa z maim mužam.

• 6
• 2
• 18
• 22
• 4
• 5
• 0
• 1