U Rumynii partyja premjer-ministra pieramahaje na parłamienckich vybarach
Paśla padliku 90 pracentaŭ hałasoŭ lidziruje Sacyjał-demakratyčnaja partyja, jakuju ŭznačalvaje dziejny premjer-ministr Marčeł Čałaku.
U Rumynii ŭ niadzielu adbylisia parłamienckija vybary. Bolš za 18 miljonaŭ vybarščykaŭ vybirali 136 sienataraŭ i 329 deputataŭ z bolš čym 10 tysiač kandydataŭ. Za chodam hałasavańnia sačyła Rumynskaja słužba Radyjo Svaboda.
Jaŭka pieravysiła 52 pracenty, heta značna vyšej, čym na vybarach 2020 i 2016 hoda (31,8 i 39,4 pracenta adpaviedna). Takaja jaŭka sioleta była zafiksavanaja ŭ pieršym tury prezidenckich vybaraŭ.
Paśla padliku 90 pracentaŭ hałasoŭ lidziruje Sacyjał-demakratyčnaja partyja, jakuju ŭznačalvaje dziejny premjer-ministr Marčeł Čałaku. Jana moža nabrać 23,4 pracenta ŭ Pałatu deputataŭ i 23,9 pracenta ŭ Sienat. Jaje sajuźnica pa ŭradavaj kaalicyi, pravacentrysckaja Nacyjanalnaja Libieralnaja partyja, nabiraje 14 i 14,6 pracenta adpaviedna.
Druhoje miesca, pavodle apytańniaŭ, u Aljansa pravapapulisckich partyj «Aljans za abjadnańnie rumyn» (17,5 i 17,8 pracenta), treciaje miesca — u centrysckaha Sajuza vyratavańnia Rumynii (11,1 u abiedźvie pałaty).
Parłamienckija vybary pravodziacca praz tydzień paśla pieršaha tura vybaru prezidenta.
U im niečakanuju pieramohu atrymaŭ niezaležny kandydat Kelin Džardžesku, jaki raniej znachodziŭsia ŭ «Aljansie za abjadnańnie». Druhoje miesca atrymała lidar «Sajuza vyratavańnia» Alena Łaskoni. Jana ŭsiaho na niekalki tysiač hałasoŭ abyšła premjer-ministra Čałaku.
28 listapada Kanstytucyjny sud Rumynii abaviazaŭ Centralnaje vybarčaje biuro pieraličyć vyniki pieršaha tura z-za vyjaŭlenych parušeńniaŭ. U vypadku, kali sud nie zaćvierdzić vyniki hałasavańnia, jaho daviadziecca pravodzić paŭtorna.
Ciapier čytajuć
Kaleśnikava: Ja nie razumieju, čamu Jeŭropa nie pačała pieramovy z Łukašenkam raniej za ZŠA65
Kamientary