Kamandzir Pałka Kalinoŭskaha: Biełaruskija dobraachvotniki majuć tyja ž sacyjalnyja harantyi, što i ŭkrainskija vajskoŭcy

Mierapryjemstva adbyłosia 28 listapada. Raniej anałahičnaja sustreča prajšła ŭ Vilni, taksama płanujucca spatkańni ŭ Hdańsku i Varšavie.

Adna z metaŭ arhanizacyi takich dyjałohavych placovak, jak adznačyŭ kamandzir Pałka imia Kalinoŭskaha Pavieł Šurmiej (pazyŭny «Dziadźka»), — naładžvańnie kantaktaŭ i bolš ciesnaja supraca ź biełarusami zamiežža (pierš za ŭsio Polščy i Litvy). Hetaje ŭzajemadziejańnie maje vieścisia ŭ niekalkich kirunkach. Naprykład, siońnia jość vostraja patreba (kiejs Vasila Vieramiejčyka heta paćviardžaje) u stvareńni inicyjatyvaŭ, što buduć zajmacca padtrymkaj biełarusaŭ, jakija vajavali na baku Ukrainy: lehalizacyja, adaptacyja da novych umovaŭ žyćcia, pošuk pracy, miedycynskaja reabilitacyja i psichałahičnaja dapamoha dy inšyja važnyja pytańni.

Vostraj źjaŭlajucca tema pałonnych i ich viartańnia. Pavodle słoŭ Paŭła Šurmieja, na siońnia Rasija ŭtrymlivaje niekalkich biełarusaŭ. Pra dvuch ź ich, jakich uziali ŭ pałon pad Lisičanskam, užo dva hady jak niama nijakaj infarmacyi.

Kamientujučy ŭzrovień uzajemadziejańnia z demakratyčnymi siłami Biełarusi, kamandzir Pałka adznačyŭ:

«Demakratyčnyja siły — Ofis Śviatłany Cichanoŭskaj, Kaardynacyjnaja rada — paźbiahajuć militarysckich temaŭ. Heta stvaraje peŭny razryŭ pamiž imi i vajarami. Dumaju, situacyja z Vasilom Vieramiejčykam prymusiła źviarnuć bolš uvahi na temu padtrymki biełarusaŭ, jakija vajavali i vajujuć, i niekatoryja padychody buduć pierahledžanyja. I ŭžo adčuvajucca źmieny».

Pavieł Šurmiej nahadaŭ, što Połk prachodzić etap refarmavańnia, i na hetym fonie važna zachavać davier i aŭtarytet struktury. «Našaja zadača — zrabić dziejnaść Pałka zrazumiełaj i prazrystaj, umacavać jaho reputacyju. Dla hetaha nieabchodny adkryty dyjałoh i dastupnaja spravazdačnaść. Ciapier u Pałku pravodzicca aŭdyt. Na žal, byłoje kiraŭnictva nie addaje ŭsie nieabchodnyja dakumienty, buchhałtar nie vychodzić na suviaź. Tym nie mienš, rachunki ŭžo adnoŭlenyja, i my kantralujem ich sami. Hałoŭnaje — absalutnaja bolšaść bajcoŭ padtrymlivaje tyja źmieny, jakija my pravodzim. I nam važna zachavać dy naraścić naš čałaviečy kapitał. Tamu rekrutynh — heta jašče adna tema, jakuju my abmiarkoŭvajem na takich sustrečach».

Pavieł Šurmiej padkreśliŭ, što Połk Kalinoŭskaha jak padraździaleńnie USU maje dastatkova dobryja ŭmovy dla słužby. Heta datyčyć i materyjalnaha zabieśpiačeńnia, i ŭmovaŭ kantraktu. Kali paraŭnać z pačatkam vajny, bačna, jak jany lepšajuć. Naprykład, značna skaraciŭsia čas zaličeńnia ŭ šerahi dobraachvotnikaŭ: ad momantu padačy zapytu ŭ čat-bot Pałka da pryniaćcia na słužbu prachodzić maksimum dva miesiacy. Raniej hety pieryjad byŭ značna bolšy.

Kamandzir taksama papiaredziŭ pra niebiaśpieku fejkavych čat-botaŭ. Kab jaje paźbiehnuć, treba karystacca infarmacyjaj i spasyłkami tolki z aficyjnaha sajta Pałka Kalinoŭskaha — kalinouski.org.

Biełaruskija dobraachvotniki majuć tyja ž sacyjalnyja harantyi, što i ŭkrainskija vajskoŭcy. Niadaŭna byli pryniatyja źmieny ŭ zakanadaŭstvie, što dazvalajuć zamiežnikam, jakija vajujuć u šerahach ukrainskaha vojska, atrymlivać aficerskija zvańni.

Na pytańnie, u jakoj dapamozie ciapier maje patrebu Połk, kamandzir adkazaŭ, što, niahledziačy na toje što Ukraina dastatkova dobra zabiaśpiečvaje bajcoŭ, zaŭsiody ŭźnikajuć peŭnyja vydatki, ale jany nieabchodnyja dla pavyšeńnia abaranazdolnaści, manieŭranaści, biaśpieki. Jon pryvioŭ prykład: «USU pieradali nam 50 dronaŭ, ale kab pačać imi pracavać, treba było ŭ kožny ŭkłaści pa 100 dołaraŭ. Taksama vialiki punkt vydatkaŭ — ramont techniki. Tamu materyjalnaja padtrymka Pałka važnaja. Heta moža być układam kožnaha z vas u našu supolnuju pieramohu. Bo nie kožny hatovy pajści vajavać. Ale ja ŭpeŭnieny, što bolšaść biełarusaŭ hatovyja padtrymlivać našych bajcoŭ».

Ad udzielnikaŭ sustrečy prahučała pytańnie pra toje, jaki nastroj u kalinoŭcaŭ ciapier, na fonie peŭnych kanfliktaŭ unutry arhanizacyi i jaje refarmavańnia, na fonie abvastreńnia situacyi na froncie i razmovaŭ pra mahčymaje pieramirje.

«Našaja pazicyja zastajecca niaźmiennaju: Rasija — supolny vorah Ukrainy i Biełarusi. My ŭpeŭnienyja, što pieramirje, kali jano zdarycca zaraz, — heta časovaja źjava i moža adyhrać na ruku Pucinu. Prykład 2014 hoda heta paćviardžaje. Tamu važna zachavać svaju bajazdolnaść, naroščvać muskuły, umacoŭvać duch».

• 12
• 2
• 1
• 2
• 0
• 0
• 1
• 3