Kačałoŭskaja: Na «Mis Suśviet» ja zrazumieła, što takoje žanočaja žorstkaść. A ŭ prybiralniu nas vadzili achoŭniki
Pradstaŭnica Biełarusi na konkursie «Mis Suśviet» Eleanora Kačałoŭskaja raskazała, jak u Miechika ŭpieršyniu sutyknułasia z žanočaj kankurencyjaj.
Kačałoŭskaja padzialiłasia, što na konkursie «Mis Biełarusi» nie adčuvała kankurencyi, atmaśfiera była pryjaznaja.
Ale na «Mis Suśviet» usio było inakš, raskazała Eleanora ŭ efiry «Pieršaha infarmacyjnaha».
«Kankurencyja jość. Mienavita na hetym konkursie ja zrazumieła, što takoje žanočaja žorstkaść. Ale nie ŭ takim pramym sensie, jak padkładać ihołki ŭ sukienku abo škło ŭ abcasy — heta ŭžo podła. Kankurencyja adčuvajecca na psichałahičnym uzroŭni. Heta nievierbalnaja ahresija, dzieści viečnyja sprečki, dzieści taktylnaje fizičnaje supraćstajańnie. Heta jość.
Zrazumieła, što žanočy kalektyŭ sam pa sabie raznapłanavy. A kali ciabie atačajuć 127 dziaŭčat, jakija prylatajuć prezientavać svaju krainu, siabie, svaje ŭmieńni, jakija viedajuć sabie canu, to kanflikt intaresaŭ vielmi chutka złučyŭsia», — adznačyła Kačałoŭskaja.
Pry hetym Eleanora, pa jaje słovach, paśpieła pahutaryć z usimi dziaŭčatami. Joj było cikava, jak jany rychtavalisia da konkursu, a taksama daviedacca bolš pra ich krainy.
Taksama ŭ Kačałoŭskaj jość pretenzii da arhanizacyi konkursu.
«Ja b parekamiendavała arhanizataram pryjechać u Biełaruś i ŭziać majstar-kłas u zdymačnaj hrupy i inšych śpiecyjalistaŭ našaj krainy, jak arhanizoŭvać bujnyja šou i ahułam naładžvać unutranyja pracesy.
Vialikaja kolkaść dziaŭčat, i my sutykalisia ź niearhanizavanymi niekatorymi momantami, jakija stavili nas u stupar. Nie zaŭsiody chapała ježy, niejkich bytavych, bazavych rečaŭ, jakija čałaviek pavinien atrymlivać sto adsotkaŭ. Heta ŭskładniała naša znachodžańnie.
Tamu zaprašaju arhanizataraŭ «Mis Suśviet» da nas u krainu, nam jość čamu ich navučyć», — ličyć Kačałoŭskaja.
Siarod samych aburalnych momantaŭ jana nazyvaje abmiežavanaść u dziejańniach i nieadnolkavaje, na jaje dumku, staŭleńnie da ŭdzielnic.
«Z adnaho boku, heta dziela biaśpieki. Ale časam nie chapała kisłarodu. Nam nie davali mahčymaści vyjści na vulicu, my znachodzilisia ŭ zakrytym pamiaškańni. Nie mahli pakidać naš pakoj biez achovy, achova supravadžała nas da prybiralni. Heta parušała našy asabistyja miežy, jakija my tak adstojvajem. Heta rabiłasia, tamu što praściej usich u adnu kuču źvieści, kab jany siadzieli.
Byli niekatoryja pryjarytetnyja krainy, jakija šmat hadoŭ udzielničajuć, da ich było troški inšaje staŭleńnie. Kali ty ŭ adzinym kalektyvie, heta vielmi adčuvajecca, što chtości maje vip-pakiet. Praz heta ŭnutranyja kanflikty taksama ŭźnikali», — raskazała Kačałoŭskaja.
Adnak, niahledziačy na heta, klimat ŭnutry kalektyvu ŭsio roŭna padtrymlivaŭsia pazityŭnymi emocyjami. Pry hetym Eleanora kaža, što zrazumieła: unutry konkursu ŭsio nie tak, jak na malunku.
Nahadajem, Eleanora Kačałoŭskaja nie zmahła vyjści ŭ finał na konkursie «Mis Suśviet». Pieršapačatkova Biełaruś pavinna była pradstaŭlać Karyna Kisialova. Adnak jaje raptam zamianili, a zatym jana apynułasia ŭ SIZA.
Stała viadoma, čamu pieramožca biełaruskaha adboru «Mis Suśviet» nie jedzie na konkurs. Jana znajšłasia ŭ SIZA
Biełaruska ŭpieršyniu pajedzie na konkurs pryhažości «Mis Suśviet». Ale nie taja, jakaja pieramahła ŭ nacyjanalnym adbory
«Mis Biełaruś» Eleanora Kačałoŭskaja ažyćciaviła daŭniuju maru, źjeździŭšy ŭ Bransk na kancert «Lube»
Ciapier čytajuć
Knyrovič raskazaŭ, čamu były dyrektar aršanskich zavodaŭ paśla vyzvaleńnia pajšoŭ vajavać za Rasiju, dzie i zahinuŭ1
Kamientary