U Vaŭkavysku žyvuć bliźniaty-rekardsmienki — žančynam spoŭniłasia pa 99 hadoŭ
Na dvaich u siostraŭ 9 unukaŭ i 10 praŭnukaŭ.
U Vaŭkavysku zafiksavali nacyjanalny rekord: u horadzie žyvuć babuli-bliźniatki, jakim spoŭniłasia 99 hadoŭ.
Tamara i Łarysa naradzilisia vosieńniu 1925-ha. U siamji dzień naradžeńnia siostraŭ adznačajuć 22 vieraśnia, choć u pašparcie zapisanaja inšaja data — 25 listapada: standartnaja historyja dla taho pieryjadu. Zafiksavać rekord doŭhažycharak vyrašyli ŭnučki: mienavita jany i źviarnulisia ŭ Nacyjanalny rejestr rekordaŭ Biełarusi, piša «Anłajnier».
Łarysa Antonaŭna Bajbus usio žyćcio prapracavała stamatołaham, a Tamara Antonaŭna Kalinoŭskaja — buchhałtaram na chlebazavodzie. Jak raskazała jaje ŭnučka Alaksandra, babula dahetul usie važnyja vyličeńni robić na draŭlanych ličylnikach.
Na dvaich u siostraŭ 9 unukaŭ i 10 praŭnukaŭ.
«Abiedźvie babuli ŭ zdarovym rozumie i dobraj pamiaci, badzioryja i viasiołyja. Ja prašarściła internet i znajšła babul-rekardsmienak ź Japonii — im pa 107 hadoŭ! Ale my raźličvajem hety rekord pabić», — uśmichajecca Alaksandra.
Aficyjnuju datu naradžeńnia rodnyja žančyn daviedalisia tolki tady, kali vyrašyli zafiksavać rekord. Choć pa dakumientach dzień naradžeńnia siostraŭ budzie tolki ŭ paniadziełak, vialikaja siamja ŭžo adznačyła śviata ŭ vieraśni.
Na pytańnie «U čym sakret daŭhalećcia?» unučka ŭpeŭniena adkazvaje: u zdarovaj ježy, pracavitaści, dabryni i lubovi. Jaje babula Tamara da hetaha času ŭ siezon pracuje ŭ aharodzie.
«Što tyčycca charčavańnia, to hałoŭny sakret — usiaho pavinna być u mieru. Całkam admaŭlać sabie ŭ zadavalnieńniach nielha. Naprykład, babulin lubimy napoj — «Koka-koła». A hałoŭnaje firmovaja strava — piačonačny paštet. Jana zaŭsiody jaho robić sama, pakul nikomu nie daviaraje sakretny recept», — raskazała ŭnučka.
Dasiahnieńnie ŭniesiena ŭ Nacyjanalny rejestr rekordaŭ Biełarusi. Sami rekardsmienki prysutničać na ŭračystym uručeńni nie zmahli, siertyfikat im pieradaść unučka Alaksandra.
Kamientary