У Ваўкавыску жывуць блізняты-рэкардсменкі — жанчынам споўнілася па 99 гадоў
На дваіх у сёстраў 9 унукаў і 10 праўнукаў.
У Ваўкавыску зафіксавалі нацыянальны рэкорд: у горадзе жывуць бабулі-блізняткі, якім споўнілася 99 гадоў.
Тамара і Ларыса нарадзіліся восенню 1925-га. У сям'і дзень нараджэння сёстраў адзначаюць 22 верасня, хоць у пашпарце запісаная іншая дата — 25 лістапада: стандартная гісторыя для таго перыяду. Зафіксаваць рэкорд доўгажыхарак вырашылі ўнучкі: менавіта яны і звярнуліся ў Нацыянальны рэестр рэкордаў Беларусі, піша «Анлайнер».
Ларыса Антонаўна Байбус усё жыццё прапрацавала стаматолагам, а Тамара Антонаўна Каліноўская — бухгалтарам на хлебазаводзе. Як расказала яе ўнучка Аляксандра, бабуля дагэтуль усе важныя вылічэнні робіць на драўляных лічыльніках.
На дваіх у сёстраў 9 унукаў і 10 праўнукаў.
«Абедзве бабулі ў здаровым розуме і добрай памяці, бадзёрыя і вясёлыя. Я прашарсціла інтэрнэт і знайшла бабуль-рэкардсменак з Японіі — ім па 107 гадоў! Але мы разлічваем гэты рэкорд пабіць», — усміхаецца Аляксандра.
Афіцыйную дату нараджэння родныя жанчын даведаліся толькі тады, калі вырашылі зафіксаваць рэкорд. Хоць па дакументах дзень нараджэння сёстраў будзе толькі ў панядзелак, вялікая сям'я ўжо адзначыла свята ў верасні.
На пытанне «У чым сакрэт даўгалецця?» унучка ўпэўнена адказвае: у здаровай ежы, працавітасці, дабрыні і любові. Яе бабуля Тамара да гэтага часу ў сезон працуе ў агародзе.
«Што тычыцца харчавання, то галоўны сакрэт — усяго павінна быць у меру. Цалкам адмаўляць сабе ў задавальненнях нельга. Напрыклад, бабулін любімы напой — «Кока-кола». А галоўнае фірмовая страва — пячоначны паштэт. Яна заўсёды яго робіць сама, пакуль нікому не давярае сакрэтны рэцэпт», — расказала ўнучка.
Дасягненне ўнесена ў Нацыянальны рэестр рэкордаў Беларусі. Самі рэкардсменкі прысутнічаць на ўрачыстым уручэнні не змаглі, сертыфікат ім перадасць унучка Аляксандра.
Каментары