Byłoha kalinoŭca, jakoha zatrymali ŭ Vjetnamie, imhnienna vydali śpiecsłužbam Łukašenki FOTA
Kadry ź im źjavilisia ŭ dziaržaŭnaj prapahandzie, jaho pakazali pa TB. Pa infarmacyi «Našaj Nivy», zatrymali jaho 13 listapada, a vydali 14-ha — što pakazvaje na spłanavanaść apieracyi.
Jak stała raniej viadoma «Našaj Nivie», były dobraachvotnik Vasil Vieramiejčyk byŭ zatrymany z tydzień tamu ŭ Vjetnamie.
Sasłužyŭcam słaba viadomyja abstaviny, jany nazyvajuć ich ćmianymi. Nibyta jon paśpieŭ adpisacca, što jaho zatrymlivajuć.
Dakładna było nieviadoma, jak ułady Biełarusi vyjšli na jahony śled i daviedalisia, što jon znachodzicca ŭ paŭdniovaazijackaj krainie. U kožnym razie, Biełarusi jaho vydali. Pryčym, pa infarmacyi «Našaj Nivy», zatrymali jaho 13 listapada, a vydali 14-ha — što pakazvaje na spłanavanaść apieracyi.
34-hadovy Vieramiejčyk skončyŭ Vajskovuju akademiju Biełarusi i słužyŭ u Piečach. Sa słužby jon zvolniŭsia ŭ 2016 hodzie, paśla čaho pracavaŭ u IT.
U 2020 hodzie jon padtrymaŭ ruch za svabodnyja vybary, udzielničaŭ u mitynhach i maršach. U listapadzie 2020 hoda jaho zatrymali pa padazreńni ŭ padpałach aŭtamabilaŭ supracoŭnikaŭ prakuratury — jakaja ŭžo tady stała adnym z hałoŭnych arhanizataraŭ masavych represij. Ale paśla 10 sutak aryštu jon vyjšaŭ na volu: dokazaŭ nie znajšli.
Napačatku 2021 hoda praz pahrozu paŭtornaha aryštu emihravaŭ va Ukrainu i žyŭ ź siamjoj u Lvovie.
Paśla napadu Rasii na Ukrainie jon adrazu, u lutym 2022 hoda, dałučyŭsia da biełaruskaha bataljona imia Kastusia Kalinoŭskaha. Słužyŭ u im namieśnikam kamandzira bataljona «Vołat» i byŭ uznaharodžany miedalom «Ukraina pierš za ŭsio».
Viadomy pad pazyŭnym «Pacuk», jon udzielničaŭ u bajach u Chiersonskaj, Mikałajeŭskaj i Łuhanskaj abłaściach.
Čamu były bajec Pałka Kalinoŭskaha ŭvohule apynuŭsia ŭ toj azijackaj krainie? Litva pryznała jaho pahrozaj nacyjanalnaj biaśpiecy na padstavie farmalnaj prykmiety — jaho raniejšaj słužby ŭ biełaruskaj armii, a jon prapuściŭ termin padačy apielacyi, bo ŭ toj čas žyŭ u Hruzii. Jon sprabavaŭ pryziamlicca ŭ Polščy, ale nie schacieŭ prachodzić patrebnyja dla hetaha doŭhija pracedury, raskazali «Našaj Nivie» jaho siabry.
Zamiest hetaha Vieramiejčyk rašyŭ vyjechać u dalokuju krainu, doŭha pražyŭ tam. Tamu koła asobaŭ, jakija viedali, što jon žyvie tam, było davoli šyrokaje. Nie vyklučana, što infarmacyju pra jaho znachodžańnie ŭ Vjetnamie pieradaŭ łukašenkaŭskim śpiecsłužbam krot u kole kalinoŭcaŭ.
Ciapier čytajuć
Rabotnikam Centra alimpijskaj padrychtoŭki pa frystajle zabaranili iści na pachavańnie Mikałaja Kazieki15
Rabotnikam Centra alimpijskaj padrychtoŭki pa frystajle zabaranili iści na pachavańnie Mikałaja Kazieki
U Biełarusi zaćvierdzili praviły evakuacyi kaštoŭnaściaŭ na vypadak vajny: cehłu z Bresckaj krepaści z nadpisami buduć ratavać pierš za karciny Šahała i Sucina1515
Kamientary