Hamialčanka pad pahrozaj abvinavačvańniaŭ u «ekstremiźmie» addała ašukancam 124 tysiačy rubloŭ
Z žančynaj źviazaŭsia nibyta pradstaŭnik Kamiteta dziaržkantrolu i zajaviŭ, što jaje abvinavačvajuć u finansavańni ekstremizmu.
U kancy žniŭnia 56-hadovaja hamialčanka atrymała zvanok ad nieviadomaha abanienta. Jon pradstaviŭsia rabotnikam mabilnaha apieratara i prapanavaŭ pierazaklučyć damovu dystancyjna. Žančyna padvochu nie zaŭvažyła — u apieratara, jaki telefanavaŭ na avatarcy, stajaŭ łahatyp apieratara — i pierajšła pa prapanavanaj spasyłcy, pakinuŭšy tam pašpartnyja źviestki.
Nieŭzabavie z hamialčankaj źviazaŭsia inšy mužčyna. Jon pradstaviŭsia aficeram KDK i zajaviŭ, što žančyna nibyta źjaŭlajecca fihurantkaj kryminalnaj spravy ab finansavańni ekstremizmu. Dla paćviardžeńnia svajoj asoby jon navat dasłaŭ fota padroblenaha paśviedčańnia.
U razmovie z žančynaj mužčyna daviedaŭsia pra papiaredni zvanok. Jon zapeŭniŭ jaje, što heta byli ašukancy, jakija ciapier voźmuć na jaje pašpart kredyty. Tamu «pradstaŭnik KDK» prapanavaŭ zhulać na apiaredžańnie: uziać niekalki kredytaŭ i pieravieści hrošy na niejkija rachunki, napisaŭšy pry hetym raśpisku ab nievydavańni apieratyŭnych mierapryjemstvaŭ.
Machlar uhavaryŭ žančynu pradać jaje mašynu Renault Logan i pieravieści hrošy na niejki nibyta biaśpiečny rachunak. Zatym hamialčanku pierakanali pradać kvateru. Adnak apieratyŭna jana zrabić hetaha nie zmahła, tamu ŭziała pad zakład nieruchomaści vialiki kredyt — usie hrošy taksama pieraviała na prapanavany rachunak.
Taksama nieviadomyja pierakanali žančynu, što na jaje pracoŭnym kampjutary vyjaŭlenaja škodnasnaja prahrama, i jana «dla vyratavańnia srodkaŭ pracadaŭcy» pa paradzie machlaroŭ vyvieła na nibyta biaśpiečnyja rachunki 78 tysiač rubloŭ, jakija naležali arhanizacyi.
Paśla hetaha «pradstaŭnik KDK» skazaŭ žančynie, što hrošy joj nie viernuć. Tolki tady jana raskazała pra situacyju kaleham pa pracy. Ahułam hamialčanka pieraviała ašukancam blizu 124 tysiač rubloŭ (37,4 tysiač dalaraŭ).
Śledčyja raspačali kryminalnuju spravu pa artykule ab zavałodańni majomaściu šlacham padmanu, ździejśnienaje ŭ asabliva bujnym pamiery.
Ciapier čytajuć
Łukašenka: biez halštuka ŭ razmovach z pasłańnikami Trampa, u halštuku z rasijskimi hubiernatarami7
Kamientary