Łukašenka: biez halštuka ŭ razmovach z pasłańnikami Trampa, u halštuku z rasijskimi hubiernatarami
Alaksandr Łukašenka paśladoŭna prychodzić na sustrečy z pradstaŭnikami ZŠA biez halštuka. Takaja detal vyhladaje asabliva rezka ŭ kantraście ź jaho vyhladam na pieramovach z rasijskimi hubiernatarami, dzie Łukašenka zaŭsiody prytrymlivajecca poŭnaha pratakolnaha dres-koda.
U hetym hodzie ŭ Minsku rehularna byvajuć pradstaŭniki administracyi Donalda Trampa. Niekatoryja vizity zastalisia pa-za publičnaj uvahaj, ale červieńskija i vieraśnioŭskija sustrečy šyroka aśviatlalisia i kamientavalisia.
Paśla vieraśnioŭskaj sustrečy stała zrazumieła: svaim dres-kodam Alaksandr Łukašenka imkniecca vykazać svaju niepavahu da amierykanskaha boku.
U červieni, analizujučy sustreču Alaksandra Łukašenki sa śpiecpradstaŭnikom prezidenta ZŠA Donalda Trampa Kitam Kiełaham i jaho namieśnikam Džonam Koŭłam, kanał «Biełaruski siłavik», za jakim stajać supracoŭniki Ministerstva ŭnutranych spraŭ, pisaŭ:
«Alaksandr Łukašenka biez halštuka, ale ŭ zašpilenym pinžaku. U toj čas jak usie astatnija ŭdzielniki sustrečy, u tym liku samoha Kiełaha, vykonvali poŭny pratakolny dres-kod.
U dypłamatyi takija detali nie vypadkovyja. Admova ad halštuka pry aficyjnaj sustrečy moža ŭsprymacca jak žest daminavańnia, demanstracyja ŭnutranaj upeŭnienaści i statutnaj pieravahi.
Heta sihnał: «Na majoj terytoryi ja dyktuju praviły». Zašpileny pinžak pry hetym zachoŭvaje ramki farmalnaści, ale padkreślivaje, chto tut haspadar. Taki vizualny dysbałans — forma kamunikacyi biez słoŭ».
Takaja acenka moža padacca zanadta samaŭpeŭnienaj, adsutnaść halštuka mahła zdacca vypadkovaj — žadańniem adčuvać siabie kamfortna, sprobaj padać siabie jak «čałavieka bieź lišnich farmalnaściaŭ». Ale kali ŭ vieraśni Łukašenka znoŭ pryjšoŭ na sustreču z Džonam Koŭłam biez halštuka, stała vidavočna: heta ŭžo zakanamiernaść.
U toj ža čas hety palityk nie zabyvaje zaviazać halštuk na sustrečy z rasijskimi hubiernatarami.
I navat prymajučy z dakładam pastajannaha pradstaŭnika Biełarusi ŭ AAN Valancina Rybakova, jaki jamu pastajanna pierakładaje padčas sustreč z amierykancami, Łukašenka — u halštuku.
Viadomy jašče adzin cikavy vypadak. 28 lipienia 2020 hoda, kali Łukašenka naviedvaŭ bryhadu 3214, jon spačatku asłabiŭ halštuk, a potym i zusim jaho źniaŭ.
Ciapier čytajuć
«Mis Biełaruś» usio bolš nahadvaje konkurs pryhažości ŭ haremie14
Kamientary