Aficyjna ničoha nie paviedamlena, ale rachunki zabłakavanyja. Streamline vydaŭ aficyjnuju zajavu ŭ spravie svajoj likvidacyi
Eduard Caluk, zasnavalnik i dyrektar Navučalnaha centra «Adukacyjnyja technałohii», pad ehidaj jakoha pracavali moŭnyja kursy Streamline, «z hłybokim škadavańniem» paviedamiŭ pra «niaprostyja pravavyja abstaviny, jakija skłalisia ŭ dačynieńni da Navučalnaha centra».
Pavodle słoŭ Eduarda Caluka, 22 kastryčnika va ŭpraŭleńni justycyi Minharvykankama da supracoŭnikaŭ centra była daviedziena infarmacyja ab pačatku pracedury jaho likvidacyi.
Pry hetym u daviedzienaj infarmacyi
«pravavych padstaŭ, jakija pasłužyli padstavaj dla likvidacyi, nie źmiaščajecca. Aficyjnym šlacham samo rašeńnie ab likvidacyi Navučalny centr nie atrymaŭ, pracedura i paradak likvidacyi da nas nie daviedzienyja».
U suviazi z hetym Navučalny centr nakiravaŭ list u Minharvykankam z prośbaj dać dostup da rašeńnia ab likvidacyi i paviedamić pra paradak jaje praviadzieńnia.
Pry hetym raźlikovyja rachunki centra z 3 kastryčnika zabłakavanyja, što robić niemahčymymi lubyja raźliki, u tym liku vypłaty pa zarabotnaj płacie, viartańnie hrošaj za nieakazanyja pasłuhi i inšyja vypłaty supracoŭnikam i klijentam.
Pakul što ŭsie zvaroty ab razbłakavańni rachunkaŭ dziela vykanańnia finansavych abaviazkaŭ zastajucca biez adkazu.
«Uličvajučy situacyju, jakaja skłałasia (rašeńnie Minharvykankama ab likvidacyi i błakavańnie ŭsich rachunkaŭ navučalnaha centra), u najbližejšy čas my budziem vymušanyja spynić ažyćciaŭleńnie vykładčyckaj dziejnaści, akazańnie pasłuh klijentam i pracu z kontrahientami; pry hetym u ciapierašni čas Navučalny centr nie maje abjektyŭnaj mahčymaści viarnuć hrašovyja srodki navučencam za nieakazanyja pasłuhi», — kanstatuje Eduard Caluk.
Źviartacca pa tłumačeńni i adnosna abarony svaich zakonnych pravoŭ jon raić u Hałoŭnaje ŭpraŭleńnie justycyi Minharvykankama, a taksama ŭ inšyja ŭpaŭnavažanyja dziaržaŭnyja orhany i ŭ sud.
«My ščyra dziakujem usim i kožnamu z vas za toje, što vy byli z nami ŭsie hetyja hady, za davier i sumiesnyja dasiahnieńni ŭ zasvajeńni novych viedaŭ», — zaviaršaje svaju zajavu dyrektar Navučalnaha centra «Adukacyjnyja technałohii».
Ciapier čytajuć
Stała viadoma imia jašče adnaho pałkoŭnika DFR, aryštavanaha KDB. Jon raskazvaŭ sukamiernikam, jak jaho katavali6
Kamientary