Kitaj uvodzić kantrol nad ekspartam tavaraŭ padvojnaha pryznačeńnia na fonie vajny va Ukrainie
Ułady Kitaja pajšli na taki krok z-za ŭviadzieńnia sankcyj ZŠA suprać niekalkich kitajskich kampanij za pastaŭku Rasii bieśpiłotnikaŭ i inšaj vajskovaj dapamohi.
Ułady Kitaja ŭvodziać z 1 śniežnia ekspartny kantrol za pastaŭkami pradukcyi, jakaja moža być vykarystanaja ŭ vajskovaj pramysłovaści inšych krain. Novyja patrabavańni rehulujuć abmiežavańni i paradak vydačy licenzij na pastaŭki za miažu «pradmietaŭ, jakija majuć jak cyvilnaje, tak i vajskovaje prymianieńnie, albo dapamahajuć pavysić vajskovy patencyjał», — napisana na aficyjnym sajcie kitajskaha ŭrada.
Pavodle novych pravił, kitajskija ŭłady składuć padrabiazny śpis tavaraŭ, jakija padpadajuć pad abmiežavańni, i abaviažuć eksparcioraŭ raskryvać danyja pra kančatkovych atrymalnikaŭ pradukcyi i mierkavanuju śfieru jaje vykarystańnia. Hetyja miery nakiravanyja na «abaronu nacyjanalnaj biaśpieki i intaresaŭ, sadziejničańnie hłabalnamu supracoŭnictvu ŭ halinie nieraspaŭsiudžańnia zbroi, a taksama na ŭzmacnieńnie i standartyzacyju kantrolu nad ekspartam tavaraŭ padvojnaha pryznačeńnia».
Jak paviedamlaje telekanał CNBC, urad Kitaja pajšoŭ na taki krok na fonie ŭzmacnieńnia sankcyj ZŠA, nakiravanych suprać kitajskich kampanij, jakija, pa infarmacyi Biełaha domu, pastaŭlali tavary padvojnaha pryznačeńnia, takija jak bieśpiłotniki, dla dapamohi rasijskaj ahresii va Ukrainie.
Pry hetym, na dumku ekśpiertaŭ CNBC, Rasija chutčej za ŭsio budzie vyzvalenaja ad mahčymych abmiežavańniaŭ kitajskaha ekspartnaha kantrolu, a sam Kitaj uvodzić kantrol demanstratyŭna, bo byŭ schopleny za ruku i sprabuje dakazać, što nie parušaje mižnarodnyja normy.
17 kastryčnika Ministerstva finansaŭ ZŠA dadało ŭ śpis sankcyj dźvie kitajskija kampanii, śćviardžajučy, što jany datyčnyja da vytvorčaści rasijskich udarnych dalnabojnych dronaŭ «Harpija».
MZS Kitaja ŭ adkaz na heta zaklikała ZŠA «nieadkładna spynić vykarystańnie ŭkrainskaha pytańnia dla dyskredytacyi i cisku na Kitaj, a taksama biezrazborna ŭvodzić niezakonnyja adnabakovyja sankcyi suprać kitajskich jurydyčnych i fizičnych asob».
U vieraśni namieśnik dziaržsakratara ZŠA Kurt Kempbieł pieršym zajaviŭ, što Kitaj niepasredna dapamahaje rasijskaj vajskovaj mašynie, padtrymlivajučy jaje namahańni pa viadzieńni vajny suprać Ukrainy.
ZŠA nieadnarazova zaścierahali Kitaj ad padtrymki rasijskaj abaronnaj pramysłovaści i ŭviali sotni sankcyj, nakiravanych na abmiežavańnie mahčymaściaŭ Maskvy vykarystoŭvać peŭnyja technałohii ŭ vajskovych metach.
Ciapier čytajuć
ZŠA paviedamili, što vyzvaleńnie palitviaźniaŭ u Biełarusi «adkładzienaje na niekatory čas»21
ZŠA paviedamili, što vyzvaleńnie palitviaźniaŭ u Biełarusi «adkładzienaje na niekatory čas»
Nivodnaha minskaha, homielskaha, italjanskaha ci francuzskaha. Zatoje ŭ Mahilovie budujuć užo čaćviorty rasijski dvoryk, hetym razam — ź miadźviedziem1313
Kamientary