«Tytanik» na dnie akijana pastupova razburajecca. Kolki jon jašče vytrymaje?
Abrysy nosa łajniera stali adnym z samych viadomych vobrazaŭ, źviazanych z patanułym karablom. Adnak novaja ekśpiedycyja da miesca hibieli łajniera ŭstanaviła, što reštki karabla pavolna razburajucca: na im abvaliłasia častka mietaličnaj aharodžy, piša Bi-bi-si.
Novyja zdymki nosa «Tytanika» (a ŭ hetym miescy adbyvałasia dziejańnie adnoj z samych znakamitych scen filma ź Leanarda Dzi Kaprya i Kiejt Uinślet) byli zroblenyja padvodnymi dronami padčas apuskańniaŭ hetym letam. Atrymanyja fatahrafii demanstrujuć, jakim čynam reštki źmianilisia za bolš čym 100 hadoŭ pad vadoj.
«Dziakujučy pop-kultury, nos «Tytanika» staŭ mamientalna viadomym. Mienavita pra jaho ludzi dumajuć, kali ŭspaminajuć pra patanuły karabiel. Ale ciapier jon vyhladaje inakš, — kaža Tamasina Rej z kampanii RMS Titanic Inc, jakaja pravodziła ekśpiedycyju. — Heta jašče adzin napamin pra jaho štodzionnaje razbureńnie. Pastajanna hučyć pytańnie — ci doŭha jašče «Tytanik» budzie tam lažać? Adkazu my nie viedajem, ale možam prasačyć za tym, što adbyvajecca ŭ realnym časie».
Aŭtary daśledavańnia ličać, što siekcyja aharodžy daŭžynioj prykładna 4,5 m abvaliłasia na praciahu apošnich dvuch hadoŭ.
Fatahrafii i ličbavy skan abrysaŭ karabla, zroblenyja padčas ekśpiedycyi 2022 hoda, pakazvajuć, što ŭ toj momant aharodža jašče była na miescy, choć užo pačynała chistacca. «U niejki momant mietał nie vytrymaŭ, i jana ŭpała», — kaža Rej.
Heta nie adzinaja častka karabla, jakuju razburyła mora. Mietaličnyja častki «Tytanika» pastupova pahłynajuć mikroby, što pryvodzić da źjaŭleńnia asablivych stałaktytaŭ ź iržy.
Apuskańni vyjavili razbureńnie aficerskich kajut u pravaj častcy sudna, źniščeńnie sałona i źniknieńnie niekatorych pamiaškańniaŭ, takich, jak kapitanski vanny pakoj.
Ekśpiedycyja, arhanizavanaja kampanijaj RMS Titanic Inc, adbyłasia ŭ lipieni i žniŭni hetaha hoda.
Padčas jaje dva padvodnyja aparaty z dystancyjnym kiravańniem zrabili bolš za 2 młn zdymkaŭ i 24 hadziny dobrych videakadraŭ. Na ich zachavany jak draby karabla, razłamanyja napałovu ŭ momant krušeńnia (jaho nos i karma lažać prykładna za 800 mietraŭ adzin ad adnaho), tak i vialikaja kolkaść abłomkaŭ.
Ciapier kampanija staranna vyvučaje atrymanyja vyjavy, kab identyfikavać usie zachavanyja abjekty i praź niekatory čas stvaryć 3D-skan usiaho miesca karablekrušeńnia.
Ciapier čytajuć
Koŭł Łukašenku: Tabie treba być bolš aściarožnym, za stałom kiepskich pacanoŭ zastaŭsia adzin ty10
Kamientary