Izrail abjaviŭ, što šeść zakładnikaŭ u Hazie znojdzieny miortvymi, adzin ź ich rasijanin
Izrail zajaviŭ, što jaho vajskoŭcy vyjavili cieły šaści zakładnikaŭ, jakija ŭtrymlivalisia CHAMAS u siektary Haza. Ich zabili niezadoŭha da hetaha.
U zajavie Armii abarony Izraila havorycca, što cieły byli znojdzienyja ŭ subotu ŭ padziemnym tuneli ŭ rajonie Rafacha. CACHAŁ nazvaŭ imiony zakładnikaŭ: heta Karmel Hat, Eden Jerušałmi, Chierš Holdbierh-Palin, Alaksandr Łobanaŭ, Almoh Sarusi i siaržant Ory Danina, piša BBC.
Pres-sakratar CACHAŁ kontr-admirał Daniel Chahary skazaŭ, što, pavodle papiaredniaj acenki, jany byli «žorstka zabityja terarystami CHAMAS niezadoŭha da taho, jak my zdoleli da ich dabracca».
Forum siemjaŭ zakładnikaŭ — hrupa, jakaja pradstaŭlaje siemji zakładnikaŭ u Hazie, — zapatrabavaŭ ad premjer-ministra Izraila Bińjamina Nietańjachu «źviarnucca da nacyi i ŭziać na siabie adkaznaść za toje, što zakładnikaŭ kinuli na volu losu».
Forum zajaviŭ, što ŭsie šaściora pałonnych byli «zabityja ŭ apošnija niekalki dzion, pieražyŭšy amal 11 miesiacaŭ ździekaŭ, katavańniaŭ i hoładu ŭ pałonie ŭ CHAMAS».
«Zatrymka z padpisańniem ździełki pryviała da ich hibieli i hibieli mnohich inšych zakładnikaŭ», — havorycca ŭ zajavie.
Hrupa taksama abjaviła ab płanach «spynić žyćcio ŭ krainie» ŭ niadzielu, paprasiŭšy izrailskuju hramadskaść dałučycca da pratestaŭ u Ijerusalimie, Tel-Avivie i inšych haradach Izraila, kab zaklikać da ździełki pa abmienie zakładnikaŭ.
U svajoj zajavie ŭ niadzielu ranicaj CACHAŁ paviedamiŭ, što cieły zahinułych byli «viernutyja na terytoryju Izraila». «Usie jany byli ŭziatyja ŭ zakładniki 7 kastryčnika 2023 h. i zabityja terarystyčnaj arhanizacyjaj CHAMAS u siektary Haza», — havorycca ŭ zajavie vojska.
«Ad imia dziaržavy Izrail ja ad usiaho serca abdymaju ich siemji i prašu prabačeńnia za toje, što nie zmoh viarnuć ich dadomu ŭ cełaści i zachavanaści», — zajaviŭ prezident Izraila Icchak Hiercah.
Vysokapastaŭleny pradstaŭnik CHAMAS Izat El-Rešyk zajaviŭ, što Izrail, jaki admoviŭsia padpisać pahadnieńnie ab spynieńni ahniu, niasie adkaznaść za hibiel ludziej.
Alaksandr Łobanaŭ byŭ adnym z dvuch rasiejcaŭ, jakija zastavalisia ŭ pałonie ŭ CHAMAS. Jon pradavaŭ marožanaje i napoi na muzyčnym fiestyvali Nova, kali napali bajeviki.
Kamientary