Za ambicyjnym prajektam staić kupka studentaŭ-entuzijastaŭ. Kali hulnia zdabudzie papularnaść, raspracoŭščyki padumvajuć stvaryć nastupnuju pra Połackaje kniastva.
Hulniu Tales of Meadows (Kazki pra łuhi) pra Turaŭskaje kniastva XIII stahodździa raspracoŭvaje nievialikaja minskaja indy-studyja Qualestory Games. Heta histaryčnaja pryhodnickaja RPG z adkrytym śvietam, demanstracyju hulniavoha pracesu na dniach pakazali publicy.
Rolik pačynajecca z adsyłki da rasijskaj hulni «Smuta», vypuščanaj sioleta studyjaj Cyberia Nova. Tales of Meadows prezientuje siabie jak biełaruski adkaz «Smucie». Za biełaruskim prajektam stajać čaćviora studentaŭ-pieršakurśnikaŭ z BNTU, BDMU i fiłfaka BDU, jakija pracujuć na ŭłasnym entuzijaźmie.
Dziejańnie ŭ hulni budzie razhortvacca ŭ adnym z najstaražytniejšych biełaruskich haradoŭ — Turavie, stalicy niekali ŭpłyvovaha kniastva. Hulcy voźmuć na siabie rolu rycara Filipa, syna pasadnika, jakomu treba budzie razhadać tajamnicu staražytnaha ordena, vyratavać baćku i adoleć vorahaŭ.
Siužetnaja halina Tales of Meadows budzie davoli karotkaj — usiaho 4-5 hadzin, ale jaje kampiensuje adkryty śviet biełaruskaj minuŭščyny. Natchnieńnie chłopcy čerpali ŭ takich zvyšpapularnych hulniach, jak Assassinʼs Creed i «Viadźmar».
Vybar Turaŭskaha kniastva ŭ jakaści łakacyi raspracoŭščyki tłumačać tym, što ŭ XIII stahodździ jano pryjšło ŭ zaniapad, i im cikava było ŭznavić toje, jak ludzi pieražyvali padziei taho času. Dakładnaj infarmacyi pra horad taho času amal niama, abapirajucca na karotkija źviestki z «Apovieści minułych hadoŭ» i padručnikaŭ.
«My adnaŭlajem Turaŭ, jaho navakolli. Hetym letam pajedziem u horad našaj družnaj kamandaj, kab fatahrafavać usio navokał, naviedvać muziei. Budziem sprabavać jak maha starańniej uznavić Turaŭ taho času. Taksama chočam dadać u naš śviet niejkich miascovych lehiend, mahčyma, kamiea histaryčnych asob», — adznačaje adzin z chłapcoŭ u intervju dziaržaŭnaj haziecie.
U studyi Qualestory Games nie chavajuć, što ichniaja hulnia — heta alternatyŭnaja historyja, zasnavanaja na realnych padziejach. Dla mnohich lehiendy staražytnych časoŭ asacyjujucca z žanram fentezi. Ale ad pieršapačatkovaj idei ŭvieści ŭ hulniu vydumanych čaroŭnych piersanažaŭ usio ž vyrašyli admovicca.
«Chočacca pakazać niešta realnaje. My dumali zapravić usio biełaruskaj mifałohijaj, tamu što jana vielmi šyrokaja, ale admovilisia ad hetaj zadumy. Mahčyma, jana budzie pradstaŭlena ŭ jakaści lehiend i paschałak, a nie ŭpłyvać pramym čynam na siužet», — adznačaje adzin z chłapcoŭ.
U najbližejšyja miesiacy vyjdzie dema-viersija hulni, jakuju płanujuć pakazać na štohadovaj biełaruskaj hulniavoj vystaŭcy Unicon, što prachodzić u pačatku vieraśnia i ŭ studzieni.
Vychad hulni čakajecca tolki ŭ druhoj pałovie 2025 hoda. Kali zapusk projdzie paśpiachova, to ŭ studyi dumajuć pra praciah, jaki achopić inšuju viachu historyi Biełarusi, naprykład, Połackaje kniastva pierad uvachodžańniem u skład Vialikaha Kniastva Litoŭskaha.
Ale dla dalejšaha raźvićcia studyi patrebnaje bolš mahutnaje i prasunutaje abstalavańnie. Tamu chłopcy chočuć padać svoj prajekt na dziaržaŭny hrant. Siońnia prajekt isnuje tolki na ichnim entuzijaźmie i na płatnych padpiskach ludziej, jakim cikavy prajekt.
«My płanujem zasnavać sapraŭdnuju studyju, pakazać śvietu, na što zdolnyja biełaruskija chłopcy. Ambicyi vielizarnyja, hałoŭnaje — zrabić našu pieršuju hulniu, kab u nas byli srodki dla dalejšaha prasoŭvańnia. Mnohija chočuć pahulać u hulniu svajoj mary, i kruta, kali ty sam možaš vykanać svajo žadańnie».
«Naša Niva» — bastyjon biełaruščyny
PADTRYMAĆŁukašenka pieraabuŭsia: Pozna ŭviečary Minsk pahruzili ŭ ciemru. Navošta? Ja ž ad vas hetaha nie patrabavaŭ20
Kamientary
"šlachTič[]", echchch.