Sud u Mahilovie vynies prysud piaci miascovym žycharam za ŭdzieł u mirnych akcyjach pratestu ŭ 2020 hodzie ŭ Minsku
Jaki prysud im vynieśli praz čatyry hady?
Sud Leninskaha rajona Mahilova 13 červienia abviaściŭ prysud u dačynieńni da piaci miascovych žycharoŭ, jakich abvinavacili ŭ «hrupavych dziejańniach, jakija parušajuć hramadski paradak» (č. 1 art. 342 KK RB), paviedamlaje Mayday.team.
Sudździa Natalla Panasienka pryznała vinavatymi Andreja Cimonina, Valeryja Iŭčyna, Michaiła Piščału, Śviatłany Kotavu i Dzianisa Kotava ŭ tym, što ŭ 2020 hodzie ŭ žniŭni i vieraśni jany ŭdzielničali ŭ mirnych šeściach u Minsku. U tym liku, što jany «vychodzili na prajeznuju častku», z-za čaho nibyta błakiravali ruch hramadskaha transpartu.
Usie padsudnyja pryznali vinu.
Realnaje pazbaŭleńnie voli było pryznačana tolki adnamu čałavieku — Andreju Cimoninu. Panasienka pryniała rašeńnie pakarać jaho 2 hadami kałonii va ŭmovach ahulnaha režymu. Nahadajem, u studzieni 2024 hoda Cimonin byŭ taksama padvierhnuty administracyjnamu aryštu za raspaŭsiudžvańnie «ekstremisckich materyjałaŭ».
Uładzimir Iŭčyn i Dzianis Kotaŭ byli pryhavorany da 2 hadoŭ i 6 miesiacaŭ abmiežavańnia voli z nakiravańniem na chimiju.
Śviatłana Kotava i Michaił Piščała atrymali abmiežavańnie voli biez nakiravańnia («chatniaja chimija») terminam na 2 hady.
Varta adznačyć, što Dzianis Kotaŭ i Śviatłana Kotava — siamja. Na ich utrymańni znachodziacca małaletnija dzieci.
Ciapier čytajuć
Amal usie čaty i supołki kałonij i SIZA Biełarusi pryznali ekstremisckimi farmavańniami. Pad pahrozaj tysiačy čałaviek5
Kamientary