«PVK Vahnier» zavierbavała na vajnu va Ukrainie ŭ kałonijach 48 tysiač źniavolenych. Ź ich pad Bachmutam zahinuli nie mienš za 17 tysiač
Emisary Pryhožyna naviedali jak minimum 341 z 500 rasijskich kałonij.
Zasnavanaja Jaŭhienam Pryhožynym «PVK Vahnier» zavierbavała na vajnu va Ukrainie nie mienš za 48 366 źniavolenych, padličyli «Miedyjazona» i Ruskaja słužba Bi-bi-si na asnovie ŭnutranych dakumientaŭ PVK ab vypłatach siemjam zahinułych najomnikaŭ.
Jeździć pa kałonijach dla viarbovak pradstaŭniki «PVK Vahniera», uklučajučy asabista Pryhožyna, pačali letam 2022 hoda. Asudžanych, jakija pahadzilisia vajavać, vypuskali paśla sakretnych ukazaŭ Pucina ab pamiłavańni. Praź niekalki miesiacaŭ heta ž stała rabić Minabarony Rasii, i da 2023 hoda «vahnieraŭcy» spynili nabor źniavolenych.
Va ŭnutranych dakumientach pryvodzilisia numary žetonaŭ «vahnieraŭcaŭ». Jak pakazaŭ analiz «Miedyjazony» i «Bi-bi-si», dla źniavolenych jany byli pa adnym pryncypie: im prysvoili asobnuju sieryju «K», da jakoj dadavali paradkavy numar kałonii i numar źniavolenaha.
Bolšaść «vahnieraŭcaŭ» zahinuła ŭ bajach za Bachmut.
Tam «PVK Vahniera» straciła zahinułymi 19,5 tysiač čałaviek, 17,1 tysiač ź jakich — heta źniavolenyja, a 2,4 tysiačy — «volnyja» najomniki. Za hety čas «PVK Vahniera» vydatkavała na vypłaty siemjam zahinułych najmitaŭ kala 108 młrd rasijskich rubloŭ (12 młn dalaraŭ, ź ich svajakam zavierbavanych źniavolenych nakiravali 92,5 młrd rasijskich rubloŭ.
«Miedyjazona» i Bi-bi-si ŭstalavali 341 kałoniju z 501, jakija zhadvalisia ŭ žetonach zavierbavanych źniavolenych. Ź ich 227 kałonij, jakija naviedali viarboŭščyki, heta strohi režym. Adtul na vajnu zabrali 33 tysiačy źniavolenych. Ź ich 21 tysiača pieražyła Bachmut i viarnułasia nazad u Rasiju.
Atrady Pryhožyna taksama pabyvali jak minimum u 75 kałonijach ahulnaha režymu i ŭ 28 kałonijach asablivaha režymu. Pad kaniec źniavolenych stali vierbavać u kałonijach-pasieliščach i lačebnych ustanovach.
Sam Pryhožyn u mai 2023 hoda, niezadoŭha da buntu, u intervju Z-błohieru Kanstancinu Daŭhovu pryznaŭ sapraŭdnuju ličbu strat svajoj PVK — 20 tysiač čałaviek. Pry hetym jon schłusiŭ, što źniavolenych zahinuła «roŭna stolki ž», kolki zvyčajnych kantraktnikaŭ.
Ciapier čytajuć
Pašparty biełarusaŭ, jakija hałasujuć na vybarach u KR, apracuje kampanija, u jakoj apošniuju ŭciečku vyjavili ŭ 2026-m, a zasnavalniki — rasijanie63
Kamientary
Było b pakazalna ŭbačyć, kolki z 21K acalełych orkaŭ viarnulisia ŭ kałonii paśla recydyvaŭ.