Kavaleŭski piarečyć Łatušku i raskazvaje, što zapavolvaje praces z pašpartam Novaj Biełarusi
Pradstaŭnik pa zamiežnych spravach Abjadnanaha pierachodnaha kabinieta Valer Kavaleŭski raspavioŭ «Našaj Nivie» pra hałoŭnuju pryčynu, jakaja tarmazić praces z pašpartami Novaj Biełarusi.
Adna z asnoŭnych prablem, jakaja prypyniła ruch prajekta — niemahčymaść padabrać kadry pad orhan vydačy pašpartoŭ.
«Mnohija biełarusy razumiejuć, što publičnaść na čale takoha prajekta budzie aznačać padvyšany intares da ich z boku režymu. Nie ŭsie hatovyja iści tak daloka. Užo nie adna kandydatura admoviłasia ad spravy. Kali b u nas byli ludzi na zapaŭnieńnie asnoŭnych miescaŭ u orhanie vydačy, my b ruchalisia chutčej. Bo najaŭnaść jurydyčnaha orhana vydačy z projdzienym aŭdytam źjaŭlajecca važnaj častkaj pracesu pryznańnia pašpartoŭ», — kamientuje Valer Kavaleŭski.
«Tak što, kali niechta z čytačoŭ ličyć, što pasuje na hetuju rolu, kali łaska, źviartajciesia da nas».
Razam z tym Valer Kavaleŭski asprečvaje zajavu Paŭła Łatuški pra toje, što prajekt padvisaje.
«Pavieł Łatuška nikoli nie mieŭ dačynieńnia da hetaha prajekta, heta nie jaho zona adkaznaści. Situacyja nie źjaŭlajecca statyčnaj, choć z boku moža vyhladać, što ničoha nie adbyvajecca. Nasamreč viadziecca šmat unutranaj pracy. My raspracavali novy padychod da pryznańnia dakumienta, kab prajekt staŭ paśpiachovym — my vyjšli na novyja formuły i ludziej, na razumieńnie, jak heta pavinna być zroblena pravilna.
Naprykład, zaraz my znachodzimsia ŭ Luksiemburhu, i na kanfierencyi Luxembourg Solutions hučyć tema mihracyi. I tut jość razumieńnie i prymańnie našych arhumientaŭ nakont taho, što ŭ pašparta jość značny sens, što jon vyrašyć surjoznuju prablemu, jakaja paŭstała pierad sotniami tysiač biełarusaŭ. Ale paŭtarusia: pakul my nie sfarmujem orhan vydačy i nie budziem mieć fizična vydrukavanyja ŭzory dakumientaŭ na rukach, nivodny dypłamat nie paabiacaje, što budzie pryznavać jaho».
Valer Kavaleŭski taksama raspavioŭ, što kamanda prajekta praciahnie supracoŭnictva z Hieraldyčnaj radaj «Pahonia».
«Taja infarmacyja, jakaja była padśviečanaja ŭ rasśledavańni BRC nakont Mikity Zabuhi, razhladaje fakty ź jaho minułaha. Mikita Zabuha zrabiŭ važnuju pracu pa raspracoŭcy dyzajnu, u jakoj taksama ŭdzielničali Garsų pasaulis — jany nasyčali dakumient elemientami biaśpieki, pryvodzili jaho ŭ adpaviednaść ź mižnarodnymi standartami. Hetaja ž funkcyja zastaniecca za Hieraldyčnaj radaj. Kali buduć patrebnyja niejkija dapracoŭki pa dyzajnie, my budziem iści tudy. Ale na hetym usio: jany nie buduć mieć dačynieńnia da techničnaj častki, da druku. U hetym sensie ŭ nas niama nijakich padstaŭ kazać, što jany nie spraŭlajucca sa svaimi funkcyjami ci ŭ ich niejkija prablemy z reputacyjaj».
U vypadku, kali Departamient dziaržbiaśpieki Litvy pryznaje kampaniju Garsų pasaulis niadobranadziejnaj, kamanda pašparta «Novaj Biełarusi» taksama budzie šukać novych partnioraŭ dla druku dakumientaŭ.
«Nie mahu pahadzicca z ahučanymi raniej tezisami, što znajści alternatyvu Garsų pasaulis budzie składana. Ja dakładna viedaju, što jość ceły šerah kampanij u Polščy, Šviejcaryi, Vialikabrytanii, Hiermanii, ZŠA, u mnohich krainach jość svaje damy, jakija drukujuć dakumienty. Ja nie baču nijakich prablem z tym, kab znajści novuju kampaniju, jakaja budzie mieć dobruju reputacyju».
Ci staviać palityki pa pašparcie novyja dedłajny, bo raniejšyja ŭžo praterminavanyja?
«Nie mahu nazvać novyja terminy. Jość abstaviny, jakija znachodziacca pa-za našym kantrolem. Prašu zrazumieć, što my robim spravu, jakuju nikoli nie rabili. Mahu tolki prasić ab ciarplivaści. U prajekta dakładna jość pierśpiektyva», — reziumuje Valer Kavaleŭski.
Kampanija, jakaja prapanoŭvała svaje pasłuhi druku «pašparta Novaj Biełarusi», źviazanaja ź biznesoŭcam, nabližanym da Łukašenki
«Zakazny artykuł z metaj dyskredytacyi». Hieroj rasśledavańnia pra pašpart Novaj Biełarusi raskazvaje svaju viersiju padziej
Premjerka Litvy prakamientavała rasśledavańnie ŭ dačynieńni da kampanii, źviazanaj z prajektam pašparta Novaj Biełarusi
Kamientary