«Svaich nie kidajem». Biełarusy źniali dla rasijan prapahandyscki bajavik pra vajnu va Ukrainie

Fota sa zdymačnaj placoŭcy. Fota: Andrej Hołubieŭ

Z Varšavy — va Ukrainu

Biełaruskija kiniematahrafisty ščylna supracoŭničajuć z rasijanami pa stvareńni prapahandysckaha tele– i kinakantentu. Naprykład, letaś zdymali prapahandyscki sieryjał z pracoŭnaj nazvaj «Rašn hiejt», jaki ŭ ramantyčnym śviatle pakazvaje rasijskich dypłamataŭ u sutyknieńni z polskimi palitykami. 

Sieryjał zdymali ŭ Minsku, a vytvorčaściu zajmałasia pryvatnaja studyja «Biełraskino», čyjo kiraŭnictva akazałasia źviazanym ź Viktaram Łukašenkam. Sam prajekt voś-voś źjavicca na ekranach pad nazvaj «Varšava'21».

Ciapier sprava dajšła da bolš aktualnaj temy — vajny va Ukrainie.

Zdymačny pieryjad filma z pracoŭnaj nazvaj «Svaich nie kidajem» doŭžyŭsia z 6 pa 18 traŭnia. Dla jaho vykarystali naturnuju placoŭku «Biełaruśfilma» ŭ Smalavičach. Tam zdymalisia epizody bajavych dziejańniaŭ.

Režysioram stužki vystupiŭ rasijski kiniematahrafist uźbiekskaha pachodžańnia Rauf Kubajeŭ — aŭtar šmatlikich efirnych telesieryjałaŭ i telemieładram nakštałt «Psieŭdanim Ałbaniec» i «Adno žyćcio na dvaich». A scenarystam — maskoŭski teatralny i sieryjalny akcior Dźmitryj Safronaŭ, dla jakoha «Svaich nie kidajem» staŭ dramaturhičnym debiutam.

Źmiest filma ŭ pryvatnaj razmovie z žurnalistami pierakazaŭ jahony stvaralnik.

Ukrainiec z «Azova» z pazyŭnym… «Karnik»

Ideja prajekta Safronavu pryjšła 9 listapada 2022 hoda paśla prahladu telenavinaŭ. Za try miesiacy mužčyna napisaŭ scenaryj, aryjentujučysia na savieckaje vajennaje kino: «A zory tut cichija» i «Aty-baty šli sałdaty». A paśla razam z Kubajevym adredahavaŭ jaho i «abaraniŭ» u Minkulcie Rasii dla pastanoŭki. 

Hałoŭnym hierojem «Svaich nie kidajem» stanie Michałyč, jakoha hraje akcior Ivan Paršyn — vieteran Pieršaj čačenskaj vajny i baćka dvaich dziaciej. Mužčyna atrymlivaje pozvu na «SVA» («śpiecyjalnuju vajennuju apieracyju» — tak prapahanda nazyvaje vajnu) u miežach rasijskaj mabilizacyi 2022 hoda.

Pavialičyć

Sumiesnaje fota akcioraŭ filma z pazyŭnymi svaich hierojaŭ. Fota: d.a.safronov

U vajenkamacie jon znajomicca ​​z Voŭčykam, synam zahinułaha hieroja Pieršaj čačenskaj. Chłopiec choča stać hierojem, jak i baćka, mabilizavaŭšysia dobraachvotna.

Supraćstajać Voŭčyku i Michałyču budzie były adnapałčanin apošniaha. Za minułyja hady siabar staŭ adnym z samych žorstkich kamandziraŭ atrada «Azoŭ», za što i atrymaŭ mianušku… «Karnik». Jaho zadańnie: likvidavać atrad rasijskich mabilizavanych, jakija prybyli na pieradavuju paśla navučańnia. I mienavita ŭ hetym atradzie apynulisia Michałyč i Voŭčyk.

Paralelna razhorniecca drama byłoha nastaŭnika fizkultury danbaskaj škoły — Andreja Siarhiejeva, jaki pajšoŭ u apałčeńnie «DNR» z pazyŭnym «Kunica» — jaho hraje sam Safronaŭ. Mienavita jon, pad pryhniotam abstavinaŭ, adyhraje klučavuju rolu ŭ raźvićci padziej karciny.

«Na poli boju chłopcy praviaduć roŭna 24 hadziny, jakija dla adnaho — Michałyča, — stanuć viečnaściu, a dla druhoha — Voŭčyka — apošnimi», — spojleryć Safronaŭ.

Kiniematahrafist śćviardžaje, što siužet prajekta zasnavany na realnych padziejach z frontu i «realnym cudzie, jaki naziraŭ uvieś śviet». Jaki cud majecca na ŭvazie, aŭtar nie ŭdakładniŭ.

«Nokia» zamiest «Mataroły»

U prajekcie buduć fihuravać realnyja vajskoŭcy. Naprykład, zabity pałkoŭnik tak zvanaj «DNR», vajenny złačyniec Arsien Paŭłaŭ, viadomy pad pazyŭnym «Mataroła». Jon u scenaryi fihuruje jak bajec z pazyŭnym «Nokia», hraje jaho biełaruski režysior i akcior Andrej Hołubieŭ.

Pavialičyć

Kałaž fota sa zdymačnaj placoŭcy ŭ Smalavičach. Fota: d.a.safronov

Niahledziačy na ideałahičnuju zaradžanaść, aŭtar kaža, što kino budzie nie pra vajnu, a pra žyćcio i ludziej.

«Ahitak nie budzie. Tolki pa fakcie. Zakranutyja šmat tem, uklučna z relihijaj, ale ŭsie jany, tak ci inakš, buduć tranślavać adno: hałoŭnaje — čałaviek i niama ničoha bolš kaštoŭnaha za čałaviečaje žyćcio, siamju i dziaciej», — kaža surazmoŭca.

Hrošy ad Kramla na «ekśpierymientalnaje kino»

Što tyčycca finansaŭ, dyk film padtrymany ŭ 2023 hodzie Minkultam Rasii. Prajekt uvajšoŭ u śpis 35-ci finalistaŭ katehoryi «Aŭtarskaje i ekśpierymientalnaje kino», siarod jakich tolki dva prajekty pryśviečanyja vajnie va Ukrainie — «Śvincovyja niabiosy» i «Svaich nie kidajem».

Pavialičyć

U zajaŭcy prajekt apisany abstraktna:

«Patryjatyčny scenaryj u tradycyjach savieckaha kino pra toje, jak byłyja adnadumcy «razłučajucca dušami», jak zhubna ŭpłyvajuć na śviadomaść nacysckija znaki, jak pieraklikajecca i stanovicca adzinym cełym archietyp ruskaha čałavieka i archietyp ruskaha voina».

Zajmalna, što ŭ drymkaście značacca zapatrabavanyja rasijskija akciory — Aleh Mieńšykaŭ i Alaksandr Robak. Ale jany ŭ prajekcie nie źjavilisia. 

Zatoje ŭ filmie šmat biełaruskich kiniematahrafistaŭ: jak techničnych, tak i akcioraŭ. Apošnija zadziejničanyja pieravažna na druhim i trecim płanie.

«Ničoha jaskrava palityčnaha tam niama»

Pa fota zdymačnaj talerki ŭ žurnalistaŭ atrymałasia identyfikavać sieryjalnuju aktrysu Natallu Žuraŭskuju, jakaja hraje adnu z hałoŭnych rolaŭ, akciora Teatra biełaruskaj dramaturhii Aleha Vebiera, aktrysu Kupałaŭskaha teatra Kaciarynu Kačan, akciora Minskaha teatra imia Horkaha Alaksieja Kačana, akciora Teatra biełaruskaj armii Siarhieja Bielakoviča, kinaakciora Hienrycha Hiermana, teatralnaha i kinaakciora Andreja Alifirenku, režysiora i kinaakciora Andreja Hołubieva dy jašče adnaho akciora Teatra biełaruskaj armii Śviatasłava Astramoviča.

Za zbrojny rekvizit adkazvaŭ Uładzimir Kołat — homielski rekanstruktar, kiraŭnik Biełaruskaha vajenna-histaryčnaha abjadnańnia «Honar mundzira».

Žurnalisty «Jeŭraradyjo» źviazalisia z artystami z prośbaj prakamientavać udzieł u stužcy. Bolšaść pračytała paviedamleńnie i ničoha nie adkazała. Hienrych Hierman i Andrej Alifirenka tolki paćvierdzili ŭdzieł u prajekcie biez dadatkovych padrabiaznaściaŭ z pryčyn kamiercyjnaj tajamnicy.

Paŭnavartasna adkazaŭ tolki Andrej Hołubieŭ, jaki ŭ prajekcie vystupiŭ nie tolki akcioram, ale i druhim režysioram. 

«Ja nie maju prava kamientavać hetuju karcinu, bo padpisaŭ kantrakt ab nierazhałošvańni. Mahu tolki skazać, što ničoha jaskrava palityčnaha tam niama. I nie treba kałupacca, sprabujučy sarvać chajp na hetym. 

Hałoŭnaje pamiatać ab ličbie 183 kanfliktaŭ [jakija adbylisia] u hetym hodzie. Heta <…> vielizarny biznes ludziej, u jakich i dla jakich tema Ukrainy — usiaho tolki čarhovy artykuł dachodaŭ ad miljardnych ździełak. Jana, naša Ukraina, usiaho tolki ŭ śpisie sa 183 krain <…> i 350 miljardaŭ zamarožanych rasijskich aktyvaŭ, jakija <…> nichto addavać nie źbirajecca».

Na ciapierašni momant adbyvajecca postpradakšn prajekta. Data vychadu «Svaich nie kidajem» pakul nieviadomaja.

• 7
• 0
• 9
• 45
• 2
• 5
• 35
• 0