Papularny polski bank staŭ błakavać biełarusam dostup da anłajn-akaŭntaŭ. Što zdaryłasia?
Polski bank Santander vypuściŭ «unutrany dakumient», pavodle jakoha hramadzianam Biełarusi biez papiaredniaha paviedamleńnia błakujuć dostup da mabilnaha dadatku banka i anłajn-bankinhu, paviedamiŭ telehram-kanał «Biełarusy ŭ Polščy».
Pa słovach biełarusaŭ, jakija sutyknulisia z takim błakavańniem, dostup da akaŭnta možna razbłakavać, kali prynieści ŭ adździaleńnie banka dazvoł na žycharstva ŭ Polščy ci ŭ krainach ES, sapraŭdny ciaham najbližejšych 12 miesiacaŭ.
Pavodle najaŭnaj infarmacyi, błakavańnie źviazanaje z novymi praviłami, jakija polskija ŭłady pryniali dniami dla hramadzian Biełarusi i Rasii.
Ciapier hrošy na rachunak usio jašče možna atrymlivać, ale zdymać ich možna tolki ŭ adździaleńni banka. Papularnaja ŭ Polščy sistema mabilnych płaciažoŭ BLIK u niekatorych karystalnikaŭ taksama niedastupnaja. Pieravod złotych u inšy bank mahčymy z kamisijaj 10 złotych (kala 2,5 jeŭra), u zamiežnaj valucie kamisija bolšaja.
Dla razbłakavańnia rachunku nieabchodna pakazać płastykavaje paśviedčańnie ab najaŭnaści DNŽ. Štampu ŭ pašparcie ab tym, što dakumienty znachodziacca na razhladzie, ci navat papiery, što pryniata adpaviednaje rašeńnie, budzie niedastatkova.
Akramia taho, pa słovach kansultantaŭ Santander, hetyja novaŭviadzieńni zakranuć usie banki, u jakich da hetaha času rachunki biełarusam adkryvali prosta pa pašparcie.
Ciapier čytajuć
Błohier Siaroha z Rasii pryjechaŭ na Zybickuju z kachanaj błohierkaj Aniečkaj. Vynik: źbity im biełarus u komie, a Siaroha na 5,5 hoda za kratami10
Kamientary