Napiaredadni Vialikadnia vydańnie Alovakmag.by padzialiłasia idejami, jak pryhoža i cikava možna sierviravać śviatočny stoł. Dla dekoru vykarystoŭvalisia pryrodnyja materyjały, nieskładanyja fłarystyčnyja techniki, a taksama vyraby ručnoj raboty ad biełaruskich majstroŭ. Atrymałasia prosta, hustoŭna i vielmi śviatočna.
Navošta patrebnaja śviatočnaja sierviroŭka?
Pryhoža nakryty stoł stvaraje atmaśfieru, abudžaje apietyt, adbivajecca na našym unutranym stanie i nastroi. Za hustoŭna nakrytym stałom prymać ježu značna pryjemniej, dy i smak straŭ raskryvajecca lepš. A dyjetołahi havorać, što sierviroŭka dapamahaje charčavacca śviadoma i navat źmianiać u lepšy bok charčovyja zvyčki. Darečy, pryhoža sierviravać stoł možna nie tolki na śviaty!
Padstaŭka dla jajek
Prosty, ale niečakana stylovy dekor — padstaŭka dla jajek z kardonnaj upakoŭki. Kali raskłaści ŭ joj jajki nie ŭ kožnaj jačejcy, a pakinuć pustyja miescy, da taho ž u niekatoryja ź ich zamiest jajek pakłaści kvietački, — kampazicyja budzie vyhladać cikava i dynamična. Niezvyčajna ŭ takich padstaŭkach vyhladajuć maleńkija kakiedamy ź viesnavymi cybulnymi kvietkami.
Vielikodnyja vianočki
Sapraŭdy pa-viesnavomu vyhladajuć vianočki ź biarozavych halinak. Jany mohuć być samych roznych pamieraŭ, ich možna pakłaści na stoł ci paviesić na ścianu, upryhožyć kvietkami i roznymi pryrodnymi materyjałami ci pakinuć jak samadastatkovy elemient dekoru.
Dla taho, kab zrabić taki vianočak, patrebnyja doŭhija biarozavyja halinki — jak heta robicca, raniej pakazvałasia na prykładzie kaladnaha vianka. Pavodle taho samaha pryncypu možna spleści dekaratyŭnaje hniaździečka, pakłaści ŭ jaho niekalki piorak i maleńkich pierapiołkavych jajek.
Kakiedama
Kakiedama — univiersalnaja ideja. Dla vielikodnaj sierviroŭki najbolš efiektnyja kakiedamy — z cybulnych kvietak. Cybulinka ŭžo maje ŭ sabie ŭsie nieabchodnyja rečyvy, dla rostu i kvitnieńnia joj nieabchodnyja tolki vilhać i śviatło, tamu nie abaviazkova farmiravać vakoł jaje ziemlany kom — dastatkova tolki zakryć usie kareńčyki ščylnym słojem imchu. Dla taho, kab moch nadziejna trymaŭsia, fiksujem jaho z dapamohaj bavaŭnianaj nitki.
Vaza ź imchom
Prazrystaja šklanaja vaza, napoŭnienaja mchom, moža być sama pa sabie elemientam dekoru, a možna raźmiaścić u joj cybulinki ŭ kviecieni — papiarednie admyjcie ich ad hleby vadoj. Kali hety dekor budzie ŭ vas karotkačasovy, to hetaha dastatkova, a kali chočacie, kab jon pastajaŭ daŭžej, to treba nalić u vazu paŭsantymietra vady, abo apyrskvać / uvilhatniać moch.
Pryrodny kałaryt
Prytrymlivajciesia pryrodnaj palitry koleraŭ (zialonyja i biełyja adcieńni) i naturalnych faktur (ilniany abrus, kieramičny posud). Vykarystoŭvajcie kantrasty: biełyja kvietki i ciomnyja biarozavyja halinki, miakkija piorki i ćviordyja pavierchni posudu, hładkija vazy i fakturnaje škło. Dadavajcie prazrystyja kielichi, vytančanyja śviečki, halinki bezu ź zialonymi pupyškami.
Ciapier čytajuć
U dzień, kali pamiłavali palitviaźnia Daronina, jahonaj žoncy prysudzili 8,5 hadoŭ kałonii za ŭdzieł u dvarovym čacie5
Kamientary
kokošnik-skomorochi-bałałajka-raśpisnoje pietuchami jajko