21-hadovy litoŭski atlet pabiŭ suśvietny rekord, jaki trymaŭsia 38 hadoŭ. I moža pabić alimpijski rekord svajho baćki
Historyju napisaŭ Mikołas Alekna. Možna addavać jamu zołata Alimpijady ŭ Paryžy ŭžo zaraz?
14 krasavika 2024 hoda moža nadoŭha ŭvajści ŭ historyju lohkaj atletyki. Mienavita ŭ hety dzień byŭ pabity «viečny» rekord niemca Jurhiena Šulta, jaki amal 38 hadoŭ tamu nazad kinuŭ dysk na 74,08 m, piša Championat.com.
Dasiahnieńnie Šulta pierabiŭ Mikołas Alekna, jaki naradziŭsia praz 16 hadoŭ paśla taho, jak sudździ zafiksavali suśvietny rekord niemca.
U niadzielu ŭ Akłachomie adbyŭsia turnir siarod kidalnikaŭ dyska. Adnym ź jaho ŭdzielnikaŭ byŭ 21-hadovy Mikołas. Chłopiec, što praŭda, užo daŭno nie noŭnejm, na jaho rachunku zołata čempijanatu Jeŭropy, a taksama srebra i bronza čempijanataŭ śvietu na darosłym uzroŭni.
Mikołas — samy małady pryzior ČS i ŭładalnik kidka bolš čym na 70 m. Da taho ž Alekna — pradaŭžalnik spravy svajho baćki, dvuchrazovaha alimpijskaha čempijona, słavutaha Virhiliusa Alekny.
Niahledziačy na ŭsie vyšejpieraličanyja dasiahnieńni, mała chto moh vykazać zdahadku, što mienavita Alekna-małodšy raptam voźmie i ŭstaluje novy suśvietny rekord, bo ŭsie pryvykli, što vynik Šulta niedasiahalny!
Da 14 krasavika asabisty rekord litoŭca składaŭ 71,39 m. tak što pieršaja ž sproba z vynikam 72,21 m užo była vialikim pośpiecham dla 21-hadovaha chłopca. Praŭda, sam Mikołas spyniacca na hetym nie źbiraŭsia.
Druhaja sproba była horšaj — 70,32 m, a trecim kidkom spartsmien zmoh pabić svoj ža rekord, ustalavany ŭ pačatku turniru. Alekna kinuŭ dysk na 72,89 m, a heta ŭžo vielmi surjozna! Jak ni kruci, čaćviorty vynik za ŭsiu historyju isnavańnia vidu sportu!
Ale i hetaha było mała. Piataja sproba pryniesła Mikołasu suśvietny rekord. Upieršyniu na aficyjnych spabornictvach dysk pryziamliŭsia na adlehłaści 74,35 m. Takim čynam, 21-hadovy Alekna pierasiahnuŭ Jurhiena Šulta.
Vierniemsia da baćki Mikołasa. I zaŭvažym, što Virhilius nie prosta ŭładalnik zołata Hulniaŭ, ale i rekardsmien. Na Alimpijadach nichto nie kidaŭ dysk dalej za jaho. Rekord byŭ ustalavany im u 2004 hodzie — 69,89 m.
Pahadziciesia, a pryhožaja historyja atrymajecca, kali alimpijski rekord baćki zmoža pabić jaho syn. I treba pryznać, što ŭ Mikołasa jość usie šancy zrabić heta ŭžo letam 2024-ha ŭ Paryžy.
Ciapier čytajuć
«Jon kazaŭ, što zołata z saboj nie zabiareš, lepiej zrabić niešta dla inšych». Dačka biznesmiena Kalina raskazała, jak razam z bratam čakaje jaho z kałonii
Kamientary